వంట నూనె కొనేటప్పుడు ఈ తప్పు చేయొద్దు..

ఇంటర్నెట్ డెస్క్: మన ఇంట్లో ప్రతి రోజు ఉపయోగించే ముఖ్యమైన వస్తువుల్లో వంట నూనె ఒకటి. చాలామంది 'హార్ట్‌కు మంచిది', 'కొలెస్ట్రాల్ ఫ్రీ' అనే ప్రకటనలను నమ్మి నూనెను కొనుగోలు చేస్తుంటారు. కానీ వంట నూనె విషయంలో చేసే కొన్ని చిన్న పొరపాట్లు కూడా ఆరోగ్యంపై తీవ్ర ప్రభావం చూపే ప్రమాదం ఉందని వైద్య నిపుణులు హెచ్చరిస్తున్నారు.

ఒకే నూనెను సంవత్సరాల పాటు వాడటం మంచిది కాదని.. వేర్వేరు నూనెల్లో వేర్వేరు పోషకాలు ఉంటాయని.. అందుకే అప్పుడప్పుడు నూనె మార్చడం మంచిదని చెబుతున్నారు.

ఉదాహరణకు:

• ఆవ నూనె గుండె ఆరోగ్యానికి మంచిదిగా భావిస్తారు.

• వేరుశెనగ నూనె డీప్ ఫ్రై వంటి వంటలకు బాగుంటుంది.

• పొద్దుతిరుగుడు నూనెలో మంచి కొవ్వులు ఉంటాయి.

• ఆలివ్ ఆయిల్ తేలికపాటి వంటలకు అనుకూలం.

ఒకసారి వేయించిన నూనెను మళ్లీ మళ్లీ వేడి చేసి వాడటం ఏ మాత్రం మంచిది కాదని నిపుణులు హెచ్చరిస్తున్నారు. ఇలా చేస్తే నూనెలో హానికర పదార్థాలు తయారై గుండె, రక్తనాళాలు, కొలెస్ట్రాల్‌పై చెడు ప్రభావం చూపుతాయి. ఆరోగ్య నిపుణుల సమాచారం ప్రకారం, ఆరోగ్యకరమైన కొవ్వులు ఉన్న నూనెలు గుండెకు మేలు చేస్తాయి. కానీ ఏ నూనె అయినా మితంగా వాడటమే ముఖ్యమని నిపుణులు చెబుతున్నారు.

ఆరోగ్యంగా ఉండాలంటే:

• ఒకే నూనెను ఎక్కువకాలం వాడకూడదు.

• వాడిన నూనెను మళ్లీ వేడి చేయకూడదు.

• బాగా వేయించిన ఆహార పదార్థాలు తినడం తగ్గించాలి

• సమతుల్య ఆహారం తీసుకోవాలి.

• రోజూ వ్యాయామం చేయాలి.

గుండె జబ్బులు ఒక్కరోజులో రావు. మన రోజువారీ అలవాట్ల వల్ల నెమ్మదిగా పెరుగుతాయి. అందులో వంట నూనె ఎంపిక కూడా చాలా ముఖ్యమైన పాత్ర పోషిస్తుంది.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

సిగరెట్లు తాగకపోయినా పెదాలు నల్లగా ఉన్నాయా? ఈ చిట్కాలు ట్రై చేయండి

రాగి బాటిల్‌లో నీళ్లు తాగుతున్నారా? ఈ తప్పులు మాత్రం చేయొద్దు