జేఈఈ మెయిన్- 2027 జనవరి సెషన్ పరీక్షా తేదీలు విడుదల.. వివరాలివే..

న్యూఢిల్లీ: దేశవ్యాప్తంగా ఇంజినీరింగ్‌ కోర్సుల్లో ప్రవేశాల కోసం నిర్వహించే జాయింట్ ఎంట్రన్స్ ఎగ్జామినేషన్-2027 (JEE Main 2027)కు సంబంధించి నేషనల్ టెస్టింగ్ ఏజెన్సీ (NTA) కీలక ప్రకటన చేసింది. జేఈఈ మెయిన్-2027 తొలి సెషన్ పరీక్షలను జనవరి నెలలో నిర్వహించనున్నట్లు తెలిపింది. జనవరి 22, 23, 24, 28, 29, 30 తేదీల్లో పరీక్షలు నిర్వహించనున్నట్లు వెల్లడించింది. అయితే తొలి సెషన్‌కు సంబంధించిన ఆన్‌లైన్ దరఖాస్తుల ప్రక్రియ ఇంకా ప్రారంభం కాలేదు. రిజిస్ట్రేషన్ తేదీలను NTA త్వరలో ప్రకటించనుంది. దరఖాస్తు ప్రక్రియ ప్రారంభమైన తర్వాత అభ్యర్థులు అధికారిక వెబ్‌సైట్ jeemain.nta.nic.in ద్వారా అప్లై చేసుకోవచ్చు.

దరఖాస్తు విధానం..

జేఈఈ మెయిన్ 2027 జనవరి సెషన్‌కు దరఖాస్తు చేసుకోవాలనుకునే అభ్యర్థులు అధికారిక వెబ్‌సైట్‌కు వెళ్లాలి. అక్కడ జేఈఈ మెయిన్ జనవరి సెషన్ దరఖాస్తు లింక్‌పై క్లిక్ చేసి, అడిగిన వివరాలను నమోదు చేయాలి. అనంతరం అవసరమైన పత్రాలను అప్‌లోడ్ చేసి, దరఖాస్తు రుసుమును చెల్లించాలి. చివరగా దానిని సబ్మిట్ చేసి, అప్లికేషన్ ఫారమ్‌ కాపీని డౌన్‌లోడ్ చేసుకుని భద్రంగా ఉంచుకోవాలి. దరఖాస్తు చేయడానికి ముందు అభ్యర్థులు తమ ఫొటో, సంతకం, 10వ తరగతి సర్టిఫికేట్ లేదా మార్కుల మెమో, అవసరమైతే దివ్యాంగ ధ్రువీకరణ పత్రాలను సిద్ధంగా ఉంచుకోవాలి.

విద్యార్హత

జేఈఈ మెయిన్‌కు దరఖాస్తు చేసుకునే అభ్యర్థులు గుర్తింపు పొందిన బోర్డు లేదా సంస్థ నుంచి 10+2 లేదా దానికి సమానమైన విద్యార్హతను కలిగి ఉండాలి. గుర్తింపు పొందిన సెంట్రల్ లేదా స్టేట్ బోర్డు నిర్వహించే 10+2 తుది పరీక్ష, ఇంటర్మీడియట్ లేదా రెండేళ్ల ప్రీ-యూనివర్సిటీ పరీక్ష, నేషనల్ డిఫెన్స్ అకాడమీకి సంబంధించిన రెండేళ్ల కోర్సు తుది పరీక్ష వంటి వాటిని అర్హత పరీక్షలుగా పరిగణిస్తారు. అలాగే నేషనల్ ఇన్‌స్టిట్యూట్ ఆఫ్ ఓపెన్ స్కూలింగ్ నిర్వహించే సీనియర్ సెకండరీ పరీక్షలో కనీసం ఐదు సబ్జెక్టులతో ఉత్తీర్ణులై ఉండాలి. భారతదేశంలో లేదా విదేశాల్లో నిర్వహించే 10+2కు సమానమైనదిగా అసోసియేషన్ ఆఫ్ ఇండియన్ యూనివర్సిటీస్ (AIU) గుర్తించిన పరీక్షలూ అర్హత కిందకు వస్తాయి. హయ్యర్ సెకండరీ సర్టిఫికేట్ వొకేషనల్ పరీక్ష కూడా అర్హత పరీక్షగా పరిగణించబడుతుంది.

అవసరమైన పత్రాలు

జేఈఈ మెయిన్ దరఖాస్తు సమయంలో అభ్యర్థులు కింది పత్రాలను సిద్ధంగా ఉంచుకోవాలి.

• తాజా పాస్‌పోర్ట్ సైజు ఫొటో

• సంతకం

• 10వ తరగతి లేదా తత్సమాన పరీక్ష సర్టిఫికేట్/మార్కుల మెమో

• వర్తించే అభ్యర్థులకు PwD/PwBD సర్టిఫికేట్

అభ్యర్థి ఫొటో కలర్‌లో ఉండాలి. తెల్లని బ్యాక్‌గ్రౌండ్‌తో, మాస్క్ లేకుండా ముఖం, చెవులు స్పష్టంగా కనిపించేలా ఫొటో ఉండాలి. ఫొటో ఫైల్‌ను JPG లేదా JPEG ఫార్మాట్‌లో 10 KB నుంచి 300 KB మధ్య పరిమాణంలో అప్‌లోడ్ చేయాలి. సంతకం JPG లేదా JPEG ఫార్మాట్‌లో 10 KB నుంచి 50 KB మధ్య పరిమాణంలో ఉండాలి. 10వ తరగతి సర్టిఫికేట్ లేదా మార్కుల మెమోను PDF ఫార్మాట్‌లో 10 KB నుంచి 300 KB మధ్య పరిమాణంలో అప్‌లోడ్ చేయాలి.

దివ్యాంగ ధ్రువీకరణ పత్రం అవసరమైన అభ్యర్థులు దానిని PDF ఫార్మాట్‌లో 10 KB నుంచి 300 KB మధ్య పరిమాణంలో అప్‌లోడ్ చేయాలి. జేఈఈ మెయిన్ 2027 దరఖాస్తు తేదీలు, పరీక్షకు సంబంధించిన ఇతర వివరాలను NTA త్వరలో అధికారికంగా ప్రకటించనుంది. అభ్యర్థులు తాజా సమాచారం కోసం jeemain.nta.nic.in వెబ్‌సైట్‌ను క్రమం తప్పకుండా పరిశీలించాలి.

ఈ వార్తలు కూడా చదవండి

ఏపీపీఎస్సీ గ్రూప్‌-1 ప్రిపరేషన్‌ సిలబస్సే సరిహద్దు

ఏపీపీఎస్సీ హాస్టల్ వెల్ఫేర్ ఆఫీసర్ గ్రేడ్-2 పోస్టులు.. రూ.1,15,500 వరకు జీతం