శివరాత్రి వేళ.. ఇలా చేయండి..

పరమ పవిత్ర మాసాల్లో ఒకటైన మాఘమాసంలో వచ్చే చిట్టచివరి పర్వదినం శివరాత్రి. సృష్టి, స్థితి, లయ కారకుడైన పరమ శివుడు లింగోద్భవం చెందిన పవిత్ర దినమే ఈ మహా శివరాత్రి. అభిషేక ప్రియుడికి భక్తులంటే మహా ప్రీతి. ఇలా శివనామస్మరణ చేస్తే చాలు.. అలా భక్తులకు ఆయన ఇట్టే వరాలు ఇచ్చేస్తాడట. అందుకే శివుడంటే భక్తులకు అంత నమ్మకం. ఈ మహా శివరాత్రి వేళ.. దేశంలోని అన్ని శైవక్షేత్రాలు శివనామస్మరణతో మార్మోగడమే కాకుండా.. భక్తులతో కిక్కిరిసిపోయి ఉంటాయి. ఈ రోజు ఏ నియమాలు ఆచరిస్తే.. ఎలాంటి పుణ్యఫలం దక్కుతుందనే విషయాన్ని పండితులు వివరిస్తున్నారు. మాఘమాసం.. సూర్యుడికి అత్యంత ప్రీతికరమైన రోజు. ఆదివారం మాహాశివరాత్రి సందర్భంగా సూర్యారాధనతో పాటు శివారాధనను కలిపి చేయడం వల్ల పాపాలు హరిస్తాయని పండితులు చెబుతున్నారు.

ఈ నియమాలు ఆచరించాలి.?

శివరాత్రి.. పండగ మాత్రమే కాదు.. ఆత్మజాగరణకు దారి చూపే పవిత్రమైన రోజు. భక్తులు ఉపవాసం, జాగరణతో పాటు శివనామస్మరణ చేయాలంటారు. సాగర మథనంలో ఉద్భవించిన హాలాహలాన్ని శివుడు సేవించింది కూడా ఈ రోజే అంటారు. ఈ పవిత్రమైన రోజు.. సూర్యోదయానికి ముందే నిద్రలేచి ఇంటిని పరిశుభ్రం చేసేకోవాలి. ప్రతిఒక్కరూ తలస్నానం చేయాలి. దేవుని గదిలో శివుడి పటం ముందు ఆవునెయ్యితో దీపారాధన చేయాలి. శక్తి కొలదీ నైవేద్యం సమర్పించాలి. కనీసం చిన్న బెల్లంముక్క అయినా ఆ శివయ్యకు నివేదించాలి. శివాలయానికి వెళ్లి శివయ్యకు అభిషేకం చేయించాలి. ఉపవాసాన్ని సంకల్పించుకోవాలి. ఉదయం, ప్రదోష కాలంలో.. రాత్రి సమయంలో మరీ ముఖ్యంగా అర్ధరాత్రి లింగోద్భవ కాలం అంటే.. రాత్రి 11:30 నుంచి 12:30 గంటల మధ్య కాలంలో శివారాధన చేయాలి. అలా చేయడం వల్ల విశేష ఫలితం వస్తుందంటారు పండితులు.

దోష నివారణ ఫలితాలు..

ఆదివారం మహా శివరాత్రి రావడం వల్ల ఈ రోజు శివారాధన చేసిన వారికి అనారోగ్య సమస్యలు తొలగుతాయంటారు పండితులు. పితృదేవతలు కూడా తరిస్తారట. ఇలా చేయడం వల్ల ఆరోగ్యం, ఆయుష్షు, కీర్తి, విజయాలు అందుకుంటారని చెబుతున్నారు. ఇక శత్రు పీడ, గ్రహ బాధలు సైతం తొలగిపోతాయంటారు. ఈ రోజు 'ఓం నమః శివాయ' మంత్ర జపం, రుద్రాభిషేకం, బిల్వార్చన చేయాలని చెబుతున్నారు. ఈ రోజు దానం చేయడం వల్ల పాపాలు తొలగి ఆరోగ్యం, ఐశ్వర్యం, సంతాన సౌఖ్యం, మానసిక ప్రశాంతత కలుగుతాయని పండితులు స్పష్టం చేస్తున్నారు.

ఈ ఏడాదిలో..

ఈ ఏడాదిలో పలు కారణాల వల్ల పలువురు పెద్దలకు తర్పణం వదలకుండా ఉంటారు. అలాంటి వారు.. ఈ పరమ పవిత్రమైన శివరాత్రి రోజు పెద్దలకు తర్పణం వదలడం వల్ల విశేష ఫలితాలను వారసులు అందుకుంటారని చెబుతారు.

ఈ వార్తలు కూడా చదవండి..

శివరాత్రి రోజున చేయకూడని తప్పులు ఏంటో తెలుసా?

మహా శివరాత్రి సందర్భంగా శైవక్షేత్రాలకు పోటెత్తిన భక్తులు

For Devotional News And Telugu News