ఎల్‌నినో ప్రభావం.. 2027 నాటికి భారత్‌లో వంటనూనెల కొరత..!

న్యూఢిల్లీ: భారత్‌లో వంటనూనెల ధరలు రానున్న రోజుల్లో మరింత పెరిగే ప్రమాదం కనిపిస్తోంది. ఎల్‌నినో ప్రభావంతో దేశీయంగా నూనెగింజల దిగుబడులు తగ్గే అవకాశం ఉంది. అలాగే, ఆగ్నేయాసియాలో పామాయిల్ ఉత్పత్తికి ఆటంకాలు ఏర్పడే సూచనలు కనిపిస్తున్నాయి. ఈ పరిణామాలు 2027 నాటికి వంటనూనెల కొరతను తీవ్రతరం చేయవచ్చని అంచనాలు వెలువడుతున్నాయి. ఫలితంగా దిగుమతులపై ఆధారపడే భారత్‌కు అంతర్జాతీయ మార్కెట్‌లో ధరల పెరుగుదల భారంగా మారే అవకాశం ఉంది.

ఉత్పత్తి, డిమాండ్ మధ్య భారీ వ్యత్యాసం

భారత్‌లో ఏటా వంటనూనెల వినియోగం 2.5 కోట్ల టన్నులు దాటుతోంది. అయితే, దేశీయంగా ఉత్పత్తి కోటి టన్నులకూ చేరడం లేదు. దీంతో అవసరాల్లో సుమారు 60 శాతం నూనెలను విదేశాల నుంచి దిగుమతి చేసుకోవాల్సి వస్తోంది. 2024-25 ఆర్థిక సంవత్సరంలో భారత్ వంటనూనెల దిగుమతుల కోసం ఏకంగా 17.59 బిలియన్ డాలర్లు ఖర్చు చేసింది.

ఎల్‌నినోతో దిగుబడులపై ప్రభావం

ఎల్‌నినో కారణంగా వర్షపాతం అస్థిరంగా మారడం, ఉష్ణోగ్రతలు పెరగడం పంటలపై ప్రతికూల ప్రభావం చూపవచ్చు. మహారాష్ట్రలోని కొన్ని సోయాబీన్ సాగు ప్రాంతాల్లో కరవు పరిస్థితులు నెలకొనే అవకాశం కనిపిస్తోంది. దీంతో 2026-27 సీజన్‌లో దేశీయ వంటనూనెల ఉత్పత్తి 5 నుంచి 10 శాతం వరకు తగ్గవచ్చని కమోడిటీ మార్కెట్ విశ్లేషకులు అంచనా వేస్తున్నారు. అయితే, మధ్యప్రదేశ్‌లోని మాల్వా ప్రాంతంలో అనుకూల వర్షపాతం కొంత ఊరటనిస్తోంది.

పామాయిల్ సరఫరాకు దెబ్బ

భారత్ ఎక్కువగా పామాయిల్‌ను ఇండోనేషియా, మలేషియా నుంచి దిగుమతి చేసుకుంటుంది. ఈ దేశాల్లో ఎండలు, నీటి కొరత కారణంగా ఆయిల్‌పామ్ దిగుబడులు తగ్గితే.. దాని పూర్తి ప్రభావం 8 నుంచి 12 నెలల తర్వాత కనిపించవచ్చు. అందువల్ల 2026 చివరి నుంచి 2027 వరకు అంతర్జాతీయ సరఫరా తగ్గే ప్రమాదం ఉంది.

ధరల పెరుగుదలపై ఆందోళన

అంతర్జాతీయంగా సరఫరా తగ్గితే దిగుమతి వ్యయం పెరగడమే కాకుండా.. దేశీయంగా వంటనూనెల ధరలు, ఆహార ద్రవ్యోల్బణంపై ఒత్తిడి పెరగవచ్చు. అయితే, ప్రత్యామ్నాయ దేశాల నుంచి దిగుమతులు, ప్రభుత్వ చర్యలు కొంత ఉపశమనం కలిగించవచ్చు. దేశీయ నూనెగింజల దిగుబడులను పెంచడం, దిగుమతులపై ఆధారపడటాన్ని తగ్గించడం ద్వారా ఈ ముప్పును దీర్ఘకాలంలో ఎదుర్కోవచ్చు.

ఈ వార్తలు కూడా చదవండి

పండుగ సీజన్ వేళ అమాంతం పెరిగిన గోల్డ్ రేట్స్.. ఎంతంటే..

అమెరికా గ్రీన్ కార్డ్ సస్పెన్షన్‌పై టీసీఎస్ స్పందన..