తానా ఫౌండేషన్ ‘మహిళా సాధికారత’ భారీగా కుట్టు మిషన్లు పంపిణీ

విజయవాడ, మార్చి 13: ఉత్తర అమెరికా తెలుగు సంఘం (తానా)కి అనుబంధ సంస్థ తానా ఫౌండేషన్(TANA Foundation). ఈ ఫౌండేషన్ ఆధ్వర్యంలో మహిళా సాధికారతను ప్రోత్సహించే లక్ష్యంతో“Stitching Hope – Sewing Machines to Empower the Needy” పలు కార్యక్రమాలు చేపట్టింది. ఈ కార్యక్రమాన్ని విజయవాడ వేదికగా తానా ఫౌండేషన్ ఘనంగా నిర్వహించింది.

మహిళలకు100 కుట్టు మిషన్ యంత్రాలను పంపిణీ చేసింది. ఈ సేవా కార్యక్రమానికి తానా కోశాధికారి రాజా కసుకుర్తి ప్రాయోజకత్వం వహించగా.. తానా అధ్యక్షుడు డా. నరెన్ కోడాలి, ఎగ్జిక్యూటివ్ వైస్ ప్రెసిడెంట్ శ్రీనివాస్ లావు, తానా ఫౌండేషన్ చైర్మన్ డా. ప్రసాద్ నల్లూరి శుభాకాంక్షలు తెలిపారు.

విజయవాడలో గురునానక్ కాలనీలోని ఎన్.ఏ.సి కళ్యాణ వేదిక (N.A.C Kalyana Vedika)గా ఈ కార్యక్రమాన్ని నిర్వహించారు. ఈ కార్యక్రమానికి విజయవాడ లోక్‌సభ సభ్యులు కేశినేని చిన్ని, విజయవాడ నగర తూర్పు ఎమ్మెల్యే గద్దె రామ్మోహన్, టిడిపి ఎన్టీఆర్ జిల్లా అధ్యక్షురాలు, కృష్ణాజిల్లా జెడ్పీ మాజీ చైర్మన్ గద్దె అనురాధ ముఖ్య అతిథులుగా హాజరయ్యారు.

అలాగే నగరంలోని పలువురు కార్పొరేటర్లు, స్థానిక నాయకులు, సామాజిక కార్యకర్తలతోపాటు మహిళలు పెద్ద సంఖ్యలో ఈ కార్యక్రమంలో పాల్గొన్నారు. సమాజ సేవలో తానా ఫౌండేషన్ చేస్తున్న కార్యక్రమాలపై ముఖ్య అతిథులు ప్రశంసల వర్షం కురిపించారు. మరి ముఖ్యంగా మహిళలకు ఉపాధి అవకాశాలు కల్పించే ఈ కార్యక్రమం.. ఎంతో ప్రేరణ కలిగిస్తుందని అభినందించారు.

ఈ సందర్భంగా తానా కోశాధికారి రాజా కసుకుర్తి మాట్లాడుతూ.. ఈ కార్యక్రమం వెనుకనున్న లక్ష్యాన్ని వివరించారు. ‘Stitching Hope – Sewing Machines to Empower the Needy’ అనే ఈ కార్యక్రమం ద్వారా అవసరమైన వారికి ఉపాధి అవకాశాలు కల్పించడానికి తానా ఫౌండేషన్ చిన్న ప్రయత్నం చేస్తోందని వివరించారు. తానా ఫౌండేషన్ నిత్యం “సేవే లక్ష్యం” అనే భావనతో పనిచేస్తోందన్నారు.

అమెరికాలోని తెలుగు వారిని ఒకటిగా చేర్చి.. సమాజానికి తిరిగి ఇవ్వడం ప్రధాన లక్ష్యమని స్పష్టం చేశారు. విద్య, ఆరోగ్యం, రైతుల సంక్షేమం, మహిళా సాధికారత వంటి వివిధ రంగాల్లో తానా ఫౌండేషన్ అనేక సేవా కార్యక్రమాలు నిర్వహిస్తుందని గుర్తు చేశారు. ఈ రోజు పంపిణీ చేస్తున్న కుట్టు యంత్రాలు కేవలం యంత్రాలు మాత్రమే కాదని.. ఇవి ఆత్మవిశ్వాసానికి, ఆర్థిక స్వావలంబనతోపాటు ఒక కుటుంబానికి కొత్త ఆశకు ప్రతీకలని అభివర్ణించారు.

ఈ యంత్రాలు అందుకునే మహిళలు ప్రతిభతోపాటు కృషితో తమ కుటుంబాల జీవనోపాధిని మెరుగు పరుచుకుంటారని ఆయన ఆశాభావం వ్యక్తం చేశారు. ఒక చిన్న అవకాశం సైతం చాలా పెద్ద మార్పును తీసుకువస్తుందని పేర్కొన్నారు. ఈ కార్యక్రమాన్ని విజయవంతం చేయడానికి సహకరించిన తానా ఫౌండేషన్ నాయకత్వానికి, స్థానిక నిర్వాహకులతోపాటు వాలంటీర్లకు ఆయన ప్రత్యేక కృతజ్ఞతలు తెలిపారు. సమాజానికి ఉపయోగపడే కార్యక్రమాల్లో భాగం కావడం తనకు గర్వకారణమన్నారు.

తానా ఫౌండేషన్‌పై ముఖ్య అతిథుల ప్రశంసల వర్షం

ఎంపీ కేశినేని చిన్ని, ఎమ్మెల్యే గద్దె రామ్మోహన్ దంపతులు ఈ సందర్భంగా తానా ఫౌండేషన్ సేవలను ప్రశంసించారు. మహిళలు స్వయం ఉపాధి ద్వారా ఆర్థికంగా స్వావలంబన సాధించేందుకు ఈ కార్యక్రమం ఎంతో ఉపయోగపడుతుందని వారు ఆశాభావం వ్యక్తం చేశారు. విదేశాల్లో ఉన్నప్పటికీ భారతదేశంలో సేవా కార్యక్రమాలు నిర్వహిస్తున్న తానా ఫౌండేషన్ సేవా స్ఫూర్తి అభినందనీయమని తెలిపారు. ఈ కార్యక్రమంలో పెద్ద సంఖ్యలో మహిళలు పాల్గొన్నారు. ఈ కుట్టు యంత్రాల ద్వారా తమ కుటుంబాల జీవనోపాధిని మెరుగుపరుచుకుంటామని వారు ఆనందం వ్యక్తం చేశారు.