PM Modi Speech: ఈ రోజు సాయంత్రం 5 గంటలకు ప్రధాని మోదీ కీలక ప్రసంగం..ట్విస్ట్ ఉంటుందా..
ABN , Publish Date - Sep 21 , 2025 | 12:33 PM
ఈ రోజు సాయంత్రం 5 గంటలకు ప్రధాని మోదీ దేశాన్ని ఉద్దేశించి ప్రసంగించనున్నట్టు ప్రధానమంత్రి కార్యాలయం ప్రకటించింది. కానీ ఆయన ఏ విషయంపై మాట్లాడతారన్నది అధికారికంగా ప్రకటించలేదు. దీంతో దేశవ్యాప్తంగా ఉత్కంఠ నెలకొంది.
ఈరోజు (సెప్టెంబర్ 21న) సాయంత్రం 5 గంటలకు ప్రధానమంత్రి నరేంద్ర మోదీ (Prime Minister narendra Modi) దేశ ప్రజలను ఉద్దేశించి కీలక ప్రసంగం చేయనున్నట్లు పీఎంఓ ప్రకటించింది. కానీ దేని గురించి మాట్లాడతారనేది మాత్రం తెలియలేదు. ఈ క్రమంలో దీని వెనుక ఉన్న కారణాల గురించి దేశవ్యాప్తంగా ఊహాగానాలు షికారు చేస్తున్నాయి.
ఈ ప్రసంగం రేపటి నుంచి అమలులోకి రానున్న GST 2.0 సంస్కరణలు, అమెరికా H1B వీసా హోల్డర్లపై విధించిన కఠిన నిబంధనలు లేదా భారత్-అమెరికా మధ్య వాణిజ్య సంబంధాల గురించి ఉండవచ్చని అంచనాలు ఉన్నాయి. ఈ సందర్భంగా ప్రధాని ఏం చెప్పబోతున్నారనే ఆసక్తి అందరిలో నెలకొంది.
ప్రధాని మోదీ ప్రసంగాల చరిత్ర
2014లో ప్రధానమంత్రిగా బాధ్యతలు స్వీకరించినప్పటి నుంచి, నరేంద్ర మోదీ కీలకమైన ప్రభుత్వ నిర్ణయాలను ప్రకటించడానికి దేశ ప్రజలను ఉద్దేశించి పలు సార్లు ప్రసంగించారు. నవంబర్ 8, 2016న, రూ.500, రూ.1000 నోట్ల నిషేధాన్ని (డీమోనిటైజేషన్) ప్రకటించారు. మార్చి 12, 2019న, పుల్వామా ఉగ్రదాడి తర్వాత బాలాకోట్ ఎయిర్స్ట్రైక్ల గురించి దేశానికి వివరించారు.
మార్చి 24, 2020న, కోవిడ్-19 మహమ్మారిని కట్టడి చేసేందుకు మూడు వారాల దేశవ్యాప్త లాక్డౌన్ను ప్రకటించారు. ఆ తర్వాత ఏప్రిల్ 14, 2020న లాక్డౌన్ను పొడిగించినట్లు తెలిపారు. ఇటీవల, మే 12, 2025న, పహల్గామ్ ఉగ్రదాడి తర్వాత భారత్ నిర్వహించిన ఆపరేషన్ సిందూర్ గురించి ప్రజలకు సమాచారం అందించారు. దీంతో ఈ రోజు ప్రసంగం కూడా ఒక ముఖ్యమైన అంశంపై ఉంటుందని అందరూ భావిస్తున్నారు.
GST 2.0 సంస్కరణలు
ఈ రోజు ప్రసంగం GST 2.0 సంస్కరణలపై దృష్టి సారించే అవకాశం ఎక్కువగా ఉంది. ఈ సంస్కరణలు రేపటి నుంచి, అంటే నవరాత్రి మొదటి రోజు నుంచి అమలులోకి రానున్నాయి. GST (గూడ్స్ అండ్ సర్వీసెస్ ట్యాక్స్) ప్రస్తుతం 5, 12, 18, 28 శాతం నాలుగు శ్లాబులలో వసూలు చేస్తున్నారు. కానీ, కొత్త GST 2.0 సంస్కరణలతో ఈ శ్లాబులను 5, 18 శాతానికి తగ్గించారు.
ఈ రెండు శ్లాబులు చాలా వస్తువులను కవర్ చేస్తాయి. లగ్జరీ వస్తువులపై మాత్రం 40 శాతం GST విధించబడుతుంది. ఈ సంస్కరణల వల్ల అనేక వస్తువుల ధరలు తగ్గనున్నాయి. ముఖ్యంగా వంటగది అవసరాలైన నెయ్యి, కెచప్, కాఫీ, పనీర్, ఎలక్ట్రానిక్ ఉపకరణాలు, ఔషధాల ధరలు తగ్గుతాయి. ఈ మార్పులు పండుగ సీజన్లో వినియోగాన్ని పెంచే అవకాశం ఉంది. ఎందుకంటే ఈ సమయంలో ప్రజలు ఎక్కువగా షాపింగ్ చేస్తారు.
ఇవి కూడా చదవండి
మరో స్కామ్ అలర్ట్.. మీ డబ్బు, ఫోన్ను ఇలా కాపాడుకోండి
సెప్టెంబర్ 2025లో బ్యాంక్ సెలవుల పూర్తి లిస్ట్..
మరిన్ని జాతీయ, తెలుగు వార్తల కోసం క్లిక్ చేయండి
