H-1B Visa Changes: H-1B వీసా గురించి కీలక అప్డేట్..వచ్చే ఏడాది ఫిబ్రవరి నుంచి కొత్త రూల్స్..

అమెరికాలో ఉద్యోగాల కోసం చూసే వారికి H-1B వీసా ఒక కీలకమైన మార్గం. ఈ వీసా ద్వారా ప్రపంచవ్యాప్తంగా నైపుణ్యం కలిగిన కార్మికులు, భారతీయ నిపుణులు, అమెరికాలో తమ కెరీర్‌ను నిర్మించుకునే అవకాశం పొందుతారు. ఈ వీసా విధానంలో ఫిబ్రవరి 2026 నుంచి గణనీయమైన మార్పులు రాబోతున్నాయని అమెరికా వాణిజ్య కార్యదర్శి హోవార్డ్ లుట్నిక్ ప్రకటించారు. ఈ మార్పులు భారతీయ నిపుణులతో సహా H-1B వీసా కోసం చూస్తున్న వారిపై ప్రభావం చూపనున్నాయి.

H-1B వీసా అంటే ఏంటి?

H-1B వీసా 1990లో అమెరికా ప్రభుత్వం ప్రవేశపెట్టిన ఒక ప్రత్యేక వీసా విధానం. ఇది నైపుణ్యం కలిగిన విదేశీ కార్మికులను అమెరికాలోని కంపెనీలు నియమించుకునేందుకు అనుమతిస్తుంది. సాంకేతిక, ఇంజనీరింగ్, ఇతర ప్రత్యేక రంగాల్లో నిపుణులైన వారికి ఈ వీసా ద్వారా అమెరికాలో పనిచేసే అవకాశం లభిస్తుంది. ప్రతి సంవత్సరం లక్షలాది మంది ఈ వీసా కోసం దరఖాస్తు చేస్తారు. భారతీయ నిపుణులు కూడా ఈ వీసా ద్వారా అమెరికాలో ఉద్యోగాలు పొందుతారు.

కొత్త నిబంధనలు

H-1B వీసా విధానంలో లోపాలను సరిచేసి ఫిబ్రవరి 2026 నుంచి కొత్త సంస్కరణలను అమలు చేయనున్నట్లు అమెరికా వాణిజ్య కార్యదర్శి హోవార్డ్ లుట్నిక్ తెలిపారు. ప్రస్తుతం H-1B వీసాల కేటాయింపు లాటరీ పద్ధతి ద్వారా జరుగుతోంది. ఈ వ్యవస్థను రద్దు చేసి, నైపుణ్యం ఆధారంగా వీసాలను కేటాయించే అవకాశం ఉందని లుట్నిక్ అన్నారు. ఈ మార్పు ద్వారా నైపుణ్యం కలిగిన వారికి మాత్రమే అవకాశాలు లభించేలా చేస్తామన్నారు.

లుట్నిక్ ప్రకారం

ట్రంప్ ఇటీవల H-1B వీసా రుసుమును US$100,000కు పెంచారు. ఈ భారీ రుసుము పెంపు కంపెనీలపై ఆర్థిక భారాన్ని పెంచుతుంది. ముఖ్యంగా చిన్న, మధ్య తరగతి కంపెనీలపై ప్రభావం చూపించనుంది. లుట్నిక్ ప్రకారం H-1B వీసా ద్వారా చౌకైన సాంకేతిక సలహాదారులను లేదా ఇంటర్న్‌లను నియమించుకోవడం సరికాదని ఆయన అభిప్రాయపడ్డారు. అమెరికా అత్యంత నైపుణ్యం కలిగిన నిపుణులను మాత్రమే ఆహ్వానించాలని చూస్తోందని, వారి కుటుంబాలను తీసుకురావడానికి అనుమతించడం సరికాదని ఆయన అన్నారు.

భారతీయ నిపుణులపై ప్రభావం

H-1B వీసా విధానంలో ఈ మార్పులు భారతీయ నిపుణులపై ప్రభావం చూపనున్నాయి. భారతదేశం నుంచి ప్రతి సంవత్సరం లక్షలాది మంది సాఫ్ట్‌వేర్ ఇంజనీర్లు, ఐటీ నిపుణులు, ఇతర రంగాల నిపుణులు H-1B వీసా ద్వారా అమెరికాలో ఉద్యోగ అవకాశాలను పొందుతున్నారు. ఈ కొత్త నిబంధనలు వీసా దరఖాస్తు ప్రక్రియను మరింత కఠినతరం చేయనున్నాయి. రుసుము పెంపు వల్ల కంపెనీలు తక్కువ దరఖాస్తులను సమర్పించే అవకాశం ఉంది.

దీంతోపాటు లాటరీ వ్యవస్థ రద్దు కావడం వల్ల నైపుణ్యం ఆధారిత ఎంపిక ప్రక్రియ అమలులోకి వస్తే, అత్యంత అర్హత కలిగిన వారికి మాత్రమే అవకాశాలు లభించే అవకాశం ఉంది. ఇది భారతీయ నిపుణులకు పోటీని మరింత తీవ్రతరం చేయనుంది.

ఇవి కూడా చదవండి

మరో స్కామ్‌ అలర్ట్.. మీ డబ్బు, ఫోన్‌ను ఇలా కాపాడుకోండి

రూ.485కే 72 రోజుల ప్లాన్..అన్‌లిమిటెడ్ కాలింగ్, 2 జీబీ డేటా

మరిన్ని జాతీయ, తెలుగు వార్తల కోసం క్లిక్ చేయండి