Indian Stock Markets: స్వల్ప నష్టాలతో ప్రారంభమైన దేశీయ స్టాక్‌ మార్కెట్లు

దేశీయ స్టాక్ మార్కెట్లు (Stock Markets) ఈరోజు (సెప్టెంబర్ 22, 2025) నష్టాలతో ప్రారంభమయ్యాయి. బీఎస్ఈ సెన్సెక్స్ 150 పాయింట్లు పడిపోయి 82,151 స్థాయిలో ఉండగా, నిఫ్టీ 89 పాయింట్లు తగ్గి 25,238 పరిధిలో ట్రేడ్ అవుతోంది. అమెరికా కొత్తగా హెచ్-1బీ వీసాలకు $100,000 ఒకేసారి ఫీజు విధించడంతో భారత ఐటీ కంపెనీల షేర్లు కుప్పకూలాయి. ప్రధానంగా టెక్ మహీంద్రా, ఇన్ఫోసిస్, టీసీఎస్, హెచ్ఎస్ఎల్ టెక్నాలజీస్ నష్టాల్లోనే కొనసాగుతున్నాయి.

లాభాల్లో ఉన్న షేర్లు

ఇదే సమయంలో SBI లైఫ్ ఇన్సురెన్స్, హీరో మోటో కార్పొరేషన్, ట్రెంట్, బజాజ్ ఫైనాన్స్, హిందాల్కో వంటి కంపెనీల షేర్లు టాప్ 5 లాభాల్లో ఉన్నాయి. రంగాల వారీగా చూస్తే నిఫ్టీ ఐటీ సూచీ 3% పడిపోయింది. మిడ్‌స్మాల్ ఐటీ, టెలికాం రంగాలు 1.75% తగ్గాయి. ఫార్మా, కన్స్యూమర్ డ్యూరబుల్స్ సూచీలు స్వల్ప నష్టాల్లో ఉన్నాయి.ఆటో, మీడియా, మెటల్ రంగాలు లాభాల్లో ఉన్నాయి.

గ్లోబల్ మార్కెట్లు

అమెరికా అధ్యక్షుడు ట్రంప్, చైనా అధ్యక్షుడు జీ జిన్‌పింగ్ మధ్య జరిగిన టెలిఫోన్ సంభాషణ తర్వాత ఆసియా స్టాక్ మార్కెట్లు పాజిటివ్ సెంటిమెంట్‌తో పెరిగాయి. రాబోయే ఆసియా ఆర్థిక సహకార సదస్సు సందర్భంగా జిన్‌పింగ్‌ను కలుస్తానని ట్రంప్ అన్నారు. బ్యాంక్ ఆఫ్ జపాన్ (BOJ) తన ఎక్స్ఛేంజ్-ట్రేడెడ్ ఫండ్ హోల్డింగ్‌లను విక్రయించే ప్రణాళికలను వెల్లడించిన తర్వాత జపాన్ నిక్కీ 1.4 శాతం పెరిగింది.

ఇదే సమయంలో దక్షిణ కొరియా కోస్పి 0.9 శాతం పెరిగింది. వడ్డీ రేటు కోతల అంచనాల మధ్య శుక్రవారం వాల్ స్ట్రీట్ స్టాక్ మార్కెట్లు లాభపడ్డాయి. S&P 500 ఇండెక్స్, నాస్‌డాక్ వరుసగా 0.49 శాతం, 0.72 శాతం పెరిగాయి.

ఈరోజు IPOలు

మెయిన్‌బోర్డ్ విభాగంలో iValue ఇన్ఫోసొల్యూషన్స్ ఇష్యూ ఈరోజు ముగుస్తుంది. GK ఎనర్జీ, సాత్విక్ గ్రీన్ ఎనర్జీ IPOలు రెండో రోజులోకి ప్రవేశిస్తాయి. అట్లాంటా ఎలక్ట్రికల్స్, గణేష్ కన్స్యూమర్ ప్రొడక్ట్స్ ఇష్యూలు ఈరోజు సబ్‌స్క్రిప్షన్ కోసం రాబోతున్నాయి. SME విభాగంలో టెక్‌డి సైబర్ సెక్యూరిటీ లిస్టింగ్‌తో సహా నాలుగు ఇష్యూలు ఈరోజు సబ్‌స్క్రిప్షన్ కోసం అందుబాటులో ఉన్నాయి.

ఇవి కూడా చదవండి

మరో స్కామ్‌ అలర్ట్.. మీ డబ్బు, ఫోన్‌ను ఇలా కాపాడుకోండి

సెప్టెంబర్ 2025లో బ్యాంక్ సెలవుల పూర్తి లిస్ట్..

మరిన్ని జాతీయ, తెలుగు వార్తల కోసం క్లిక్ చేయండి