Heavy Rains In AP: బిగ్ అలర్ట్.. పిడుగులతో కూడిన భారీ వర్షాలు..
ABN , Publish Date - Sep 21 , 2025 | 04:21 PM
రాష్ట్రాన్ని వానలు వీడడం లేదు. పలు జిల్లాల్లో పిడుగులతోపాటు భారీ వర్షాలు కురవనున్నాయి. ఈ నేపథ్యంలో ప్రభుత్వం అప్రమత్తమైంది. అందులో భాగంగా ప్రజలకు కీలక సూచన చేసింది.
అమరావతి, సెప్టెంబర్ 21: ఆంధ్రప్రదేశ్లోని పలు జిల్లాల్లో భారీ వర్షాలతోపాటు పిడుగులు పడే అవకాశం ఉందని వాతావరణ శాఖ ఆదివారం వెల్లడించింది. ఈ నేపథ్యంలో ఏపీ రాష్ట్ర విపత్తుల నిర్వహణ సంస్థ ఎండీ ప్రఖర్ జైన్ స్పందించారు. అమరావతిలో సంస్థ ఎండీ ప్రఖర్ జైన్ మాట్లాడుతూ.. రాగల మూడు గంటల్లో కాకినాడ, అనకాపల్లి, పల్నాడు జిల్లాల్లో అక్కడక్కడా పిడుగులతో కూడిన భారీ వర్షాలు కురుస్తాయని తెలిపారు.
దాంతో రెడ్ అలర్ట్ జారీ చేసినట్లు చెప్పారు. అలాగే శ్రీకాకుళం, అల్లూరి, ప్రకాశం జిల్లాల్లోని పలు చోట్ల పిడుగులపాటు ఒక మోస్తరు నుంచి భారీ వర్షాలు కురుస్తాయని వివరించారు. దీంతో ఈ జిల్లాల్లో ఆరెంజ్ అలర్ట్ ప్రకటించామన్నారు. ఇక ఎన్టీఆర్, ఉత్తరాంధ్ర, రాయలసీమ జిల్లాల్లో పలు చోట్ల పిడుగులతో కూడిన వర్షాలు కురుస్తాయని చెప్పారు.
ఈ జిల్లాల్లో తేలికపాటి నుంచి ఒక మోస్తరు వర్షాలు కురిసే అవకాశం ఉందన్నారు. ఆ సమయంలో ఈదురుగాలులు సైతం వీచే అవకాశం ఉందని చెప్పారు. దీంతో భారీ హోర్డింగ్స్, చెట్ల కింద నిలబడవద్దని సూచించారు. ఇక శిథిలావస్థలో ఉన్న భవనాల్లో ఉండవద్దని ప్రజలకు తెలిపారు. భారీ వర్షాలతో పిడుగులు పడే అవకాశం ఉన్న నేపథ్యంలో అప్రమత్తంగా ఉండాలని ఈ సందర్భంగా ప్రజలను హెచ్చరించారు. అత్యవసరమైతే తప్ప బయటకు రావద్దని.. జాగ్రత్తగా ఉండాలంటూ ప్రజలకు ఎండీ ప్రఖర్ జైన్ సూచించారు.
ఈ వార్తలు కూడా చదవండి..
మహాలయ అమావాస్య ఎఫెక్ట్.. కపిల తీర్థానికి పోటెత్తిన భక్తులు
క్యాప్స్ గోల్డ్ కార్యాలయాల్లో కొనసాగుతున్న సోదాలు.. కీలక పత్రాలు స్వాధీనం..
For More AP News And Telugu News
