Health Tips: ఎక్కువ సమయం కూర్చుని పని చేస్తున్నారా? బిగ్ అలర్ట్ మీకోసమే..!

Long Sitting Side Effects: ఎక్కువ సమయం కుర్చీలో కూర్చిన పని చేస్తు్న్నారా? అయితే, తస్మాత్ జాగ్రత్త. ఎక్కువ సమయం కూర్చుని పని చేసే వ్యక్తులలో 16 శాతం ఎక్కువ మరణ ప్రమాదం ఉందని తైవాన్‌కు చెందిన పరిశోధనా సంస్థ వెల్లడించింది. ఇందుకు సంబంధించిన వివరాలను జామా నెట్‌వర్క్ ఓపెన్ జర్నల్‌లో ప్రచురించారు. ఎక్కువ సమయం కూర్చునే వారిపై 13 ఏళ్ల పరిశోధన తరువాత దీనిని ప్రచురించినట్లు పరిశోధకులు తెలిపారు. మరి ఈ పరిశోధనలో ఇంకా ఏం తేలిందో ఓసారి చూద్దాం..

గుండెపోటు ప్రమాదం..

నిరంతరాయంగా పని చేస్తూ.. ఎక్కువ గంటలు కూర్చొని, తక్కువ నడిచే వారు అప్రమత్తంగా ఉండాలి. 4,81,688 మందిపై జరిపిన పరిశోధనలో.. ఎక్కువ సమయం కూర్చుని పని చేసే వారు కార్డియో వాస్కులర్ డిసీజ్‌తో మరణించే ప్రమాదం ఎక్కువ అని తేలింది. ఇతర వ్యక్తులకు కంటే 34 శాతం ఎక్కువ మరణ ప్రమాదం ఉందని పేర్కొన్నారు. ఇక ఇతర వ్యాధుల కారణంగా మరణించే ప్రమాదం 16 శాతం వరకు ఉన్నట్లు పేర్కొనడం జరిగింది.

ఈ వ్యాధులు కూడా వచ్చే అవకాశం..

నిరంతరం కూర్చోవడం వల్ల బ్లడ్ షుగర్, అధిక రక్తపోటు, ఊబకాయం, నడుము చుట్టూ కొవ్వు పేరుకుపోయే ప్రమాదం పెరుగుతుంది. ఇది కొలెస్ట్రాల్ సమస్యలను కలిగిస్తుంది. ఫలితంగా గుండె జబ్బులు, క్యాన్సర్ ప్రమాదాన్ని పెంచుతాయి. అందుకే.. ప్రతి రోజూ నడవాలని నిపుణులు సూచిస్తున్నారు. నడక శరీరాన్ని చురుకుగా ఉంచడమే కాకుండా.. వృద్ధాప్య ఛాయలను తగ్గిస్తుంది. ఎక్కువ కాలం జీవించడానికి ఆస్కారం ఉంటుంది.

మహిళలు మరింత అప్రమత్తత అవసరం..

8 గంటల కంటే ఎక్కువ సమయం నిరంతరంగా కూర్చుని పని చేసే మహిళ ఆరోగ్యం త్వరగా క్షీణిస్తుందని ఈ పరిశోధనలో పేర్కొన్నారు. ఊబకాయం, కొలెస్ట్రాల్, అధిక రక్తపోటు, వాపు వంటి ప్రమాదకరమైన వ్యాధులు మహిళల్లో త్వరగా వస్తాయని, అందుకే ఫిట్‌నెస్ పై శ్రద్ధ వహించాలని సూచిస్తున్నారు నిపుణులు.

మరి ఏం చేయాలి..

ఎక్కువ సమయం కూర్చుని పని చేసే వారు.. నిరంతరాయంగా కూర్చోకుండా మధ్య మధ్యలో లేచి అటూ ఇటూ నడుస్తుండాలి. అలాగే ప్రతి రోజూ వాకింగ్ చేయాలి. ఆరోగ్యకరమైన ఆహారం తీసుకోవాలి. తద్వారా ఆరోగ్యంగా, చురుకుగా ఉంటారు.