తెలంగాణలో కరువు తీవ్రత.. 365 మండలాలు కరువు ప్రాంతాలుగా ప్రకటన!

హైదరాబాద్, అక్టోబర్ 27: తెలంగాణ రాష్ట్రంలో వర్షాభావ పరిస్థితులు తీవ్ర ఆందోళన కలిగిస్తున్నాయి. ఖరీఫ్‌-2026 సీజన్‌కు సంబంధించి రాష్ట్ర ప్రభుత్వం తాజాగా కీలక ఉత్తర్వులు జారీ చేసింది. రాష్ట్రవ్యాప్తంగా 31 జిల్లాల పరిధిలోని 365 మండలాలను కరువు ప్రభావిత మండలాలుగా ప్రకటించింది. ఇందులో 111 మండలాలు తీవ్ర కరువు ప్రభావిత మండలాలు ఉండగా, మరో 254 మండలాలు మధ్యస్థ కరువు మండలాలుగా ఉన్నాయని ప్రభుత్వం తెలిపింది.

గత ఏడాదితో పోలిస్తే జూన్‌ 1 నుంచి సెప్టెంబర్‌ 30 వరకు కురవాల్సిన వర్షపాతంలో భారీగా కోత పడింది. సాధారణంగా రాష్ట్రంలో 740.6 మి.మీ. వర్షపాతం నమోదు కావాల్సి ఉండగా, కేవలం 615.5 మి.మీ. మాత్రమే పడింది. అంటే సుమారు 17 శాతం తక్కువ వర్షపాతం నమోదైంది. ఎల్‌నినో ప్రభావం, బలహీనపడిన అల్పపీడన వ్యవస్థల కారణంగా దీర్ఘకాలిక వర్షాభావం ఏర్పడి పంటలను దెబ్బతీసింది. ఫలితంగా వరి సాగు విస్తీర్ణం భారీగా తగ్గి, 69.19 లక్షల ఎకరాల నుంచి 57 లక్షల ఎకరాలకు పరిమితమైంది.

రైతులకు ప్రత్యేక భరోసా..

ఈ కరువు పరిస్థితుల్లో రైతులను ఆదుకునేందుకు ప్రభుత్వం కీలక చర్యలు చేపట్టింది. కరువు ప్రభావిత మండలాల్లోని రైతులకు ఇన్‌పుట్‌ సబ్సిడీ అందించడంతో పాటు, వ్యవసాయ పెట్టుబడి సాయాన్ని డీబీటీ (డైరెక్ట్ బెనిఫిట్ ట్రాన్స్‌ఫర్) ద్వారా నేరుగా రైతుల ఖాతాల్లో జమ చేయాలని ఆదేశాలు జారీ చేసింది. అంతేకాకుండా, తాగునీరు, పశుగ్రాసం కొరత తలెత్తకుండా ప్రత్యేక చర్యలు చేపట్టడంతో పాటు, ఉపాధి హామీ పథకం కింద అదనంగా మరో 50 రోజుల పని కల్పించాలని ప్రతిపాదించారు.

కేంద్ర సహాయం కోసం నేషనల్ డిజాస్టర్ రెస్పాన్స్ ఫండ్ (NDRF) నిధులకై మెమోరాండం సమర్పించనున్నట్లు రేవంత్ సర్కార్ వెల్లడించింది. క్షేత్రస్థాయిలో కరువు తీవ్రతను అంచనా వేసేందుకు కేంద్ర బృందాన్ని పంపాలని కోరింది. ఈ కరువుకు సంబంధించి విడుదలైన ఉత్తర్వ్యూలు రాబోయే ఆరు నెలల పాటు అమల్లో ఉంటాయని, దీనికి సంబంధించిన జాబితాను జిల్లా గెజిట్లలో ప్రచురించాలని అన్ని జిల్లాల కలెక్టర్లను రాష్ట్ర ప్రభుత్వం ఆదేశించింది.

ముఖ్యమైన గణాంకాలు:

• మొత్తం కరువు మండలాలు: 365

• తీవ్ర కరువు మండలాలు: 111

• మధ్యస్థ కరువు మండలాలు: 254

• కరువు ప్రభావిత జిల్లాలు: 31

• వర్షపాతం లోటు: 17 శాతం

ఈ వార్తలూ చదవండి:

ఏపీలో పలు జిల్లాల్లో కూటమికి ఏకగ్రీవంగా జడ్పీటీసీ స్థానాలు.. వివరాలివే..

హైదరాబాద్‌లో విషాదం.. రెండేళ్ల కూతురిని చంపేసి.

హైదరాబాద్‌లో దారుణం.. సెల్‌ఫోన్ కోసం యువతిని పొడిచి..