ప్రభుత్వ ఉద్యోగం పేరుతో మహిళపై అత్యాచారం.. నిందితుడి అరెస్ట్‌

హైదరాబాద్, అక్టోబర్ 27: నగరంలోని ఘట్‌కేసర్‌ పరిధిలో ఉద్యోగం పేరుతో ఓ మహిళను మోసం చేసి.. ఆమెపై అత్యాచారానికి పాల్పడిన ఘటన కలకలం రేపింది. ప్రభుత్వ ఉద్యోగం ఇప్పిస్తానంటూ మహిళకు ఆశ చూపిన జగన్మోహన్‌ అనే వ్యక్తి.. మున్సిపల్‌ కార్యాలయంలో ఉద్యోగం ఇప్పించేందుకు ఉన్నతాధికారికి డబ్బులు ఇవ్వాలని నమ్మించాడు. ఇందుకోసం రూ.5 లక్షలు అవసరమవుతాయని చెప్పి మహిళ నుంచి విడతలవారీగా రూ.4.50 లక్షలు వసూలు చేసినట్లు సమాచారం. ఉద్యోగం వస్తుందన్న ఆశతో బాధితురాలు నిందితుడికి డబ్బులు ఇచ్చింది. అయితే..ఉద్యోగం ఇప్పిస్తానని నమ్మించిన నిందితుడు ఆమెను తన వెంట తీసుకెళ్లి అఘాయిత్యానికి పాల్పడినట్లు బాధితురాలు పోలీసులకు ఫిర్యాదు చేసింది.

మల్లాపూర్‌ నుంచి జగన్మోహన్‌ బాధితురాలిని కారులో భువనగిరికి తీసుకెళ్తానని బయలుదేరాడు. మార్గమధ్యంలో అవుషాపూర్‌లోని ఓ రిసార్ట్‌కు తీసుకెళ్లాడు. అక్కడ ఉన్నతాధికారి ఉన్నాడని మహిళను నమ్మించినట్లు తెలిసింది. అనంతరం ఆమెను బెదిరించి అత్యాచారానికి పాల్పడినట్లు ఫిర్యాదులో పేర్కొన్నట్లు సమాచారం. ఈ ఘటన తర్వాత నిందితుడు బాధితురాలిని కారులో తీసుకెళ్తూ వరంగల్‌ జాతీయ రహదారిపై కారు నుంచి కిందకు తోసేసి అక్కడి నుంచి పరారయ్యాడు. దీంతో బాధితురాలు పోలీసులను ఆశ్రయించింది. ఆమె ఫిర్యాదు మేరకు కేసు నమోదు చేసిన పోలీసులు దర్యాప్తు చేపట్టారు. విచారణ అనంతరం జగన్మోహన్‌ను అరెస్టు చేసినట్లు తెలిసింది. ఉద్యోగాల పేరుతో మోసాలకు పాల్పడే వ్యక్తుల పట్ల అప్రమత్తంగా ఉండాలని, ప్రభుత్వ ఉద్యోగాలు ఇప్పిస్తామంటూ డబ్బులు డిమాండ్‌ చేసే వారిని నమ్మవద్దని ఈ ఘటన హెచ్చరిస్తోంది.

ఈ వార్తలు కూడా చదవండి:

దేవాదాయ శాఖలో అక్రమాలపై.. విజిలెన్స్‌ నివేదికలు బుట్టదాఖలు

పంటకు మురుగు నీరే దిక్కాయె!

ఓటరు నమోదుకు గ్రాడ్యుయేట్ల నిరాసక్తి!

Read Latest AP News And Telangana News