క్రెడిట్ కార్డు ఇస్తామని మోసాలు.. సైబర్ నేరగాళ్ల అరెస్ట్

హైదరాబాద్, మే 16: క్రెడిట్ కార్డులు ఇప్పిస్తామంటూ అమాయకులను బురిడీ కొట్టించి, లక్షలాది రూపాయల వసూళ్లకు పాల్పడుతున్న అంతర్రాష్ట్ర సైబర్ నేరగాళ్ల ముఠాను సైబరాబాద్ సైబర్ క్రైమ్ పోలీసులు పట్టుకున్నారు. దేశవ్యాప్తంగా పలువురిని మోసం చేస్తూ తప్పించుకు తిరుగుతున్న ఈ ముఠా కదలికలపై నిఘా ఉంచిన పోలీసులు.. చివరకు భారత్-బంగ్లాదేశ్ సరిహద్దుల్లో అదుపులోకి తీసుకున్నారు. ఈ దాడిలో ముఠాకు నాయకత్వం వహిస్తున్న ప్రధాన నిందితుడితో పాటు అతనికి సహకరిస్తున్న మరో ఐదుగురు నిందితులను పోలీసులు అరెస్ట్ చేశారు.

ఈ కేసుకు సంబంధించిన వివరాల్లోకి వెళితే.. నిందితులు బ్యాంకు ప్రతినిధులమంటూ బాధితులకు ఫోన్లు చేసి, తక్కువ వడ్డీ రేట్లకు క్రెడిట్ కార్డులను మంజూరు చేయిస్తామని నమ్మించేవారు. వారి మాటలను నిజమని నమ్మి ప్రాసెసింగ్ ఫీజులు, ఇతర ఛార్జీల పేరిట బాధితులు పంపిన డబ్బును తమ ఖాతాల్లోకి మళ్లించుకున్నారు. ఆ తర్వాత ఫోన్లు స్విచ్చాఫ్ చేసుకుని పరారయ్యేవారు. బాధితుల నుంచి అందిన ఫిర్యాదులతో రంగంలోకి దిగిన సైబరాబాద్ సైబర్ క్రైమ్ విభాగం.. అధునాతన సాంకేతిక పరిజ్ఞానాన్ని ఉపయోగించి నిందితుల ఐపీ అడ్రస్‌లు, మొబైల్ లొకేషన్ల ఆధారంగా వారు బంగ్లాదేశ్ సరిహద్దు ప్రాంతంలో ఉన్నట్లు గుర్తించారు. వెంటనే అక్కడికి చేరుకున్న ప్రత్యేక పోలీసు బృందం నిందితులను అరెస్ట్ చేసింది. ఈ ముఠా వెనుక ఇంకా ఎవరైనా సూత్రధారులు ఉన్నారా, అలాగే ఇప్పటివరకు వీరు ఎంతమందిని మోసం చేశారనే కోణంలో దర్యాప్తు సాగుతోందని సైబరాబాద్ పోలీసులు వెల్లడించారు.

ఇవి కూడా చదవండి..

పరారీలో బండి భగీరథ్.. పోలీసుల గాలింపు

పెట్రోల్, డీజిల్ రేట్లను పెంచడం సామాన్యుల నడ్డి విరచడమే: సీఎం

Read Latest Telangana News And Telugu News