ఇంజినీరింగ్ డిగ్రీ లేదు.. అయినా ఎగిరే కారు తయారీ.. వీడియో వైరల్

ఇంటర్నెట్ డెస్క్: టాలెంట్ ఎవరి సొత్తూ కాదు అని నిరూపించాడో యువకుడు. ఉత్తరాఖండ్‌లోని అల్మోరా జిల్లాకు చెందిన రవి తమ్తా తన పట్టుదల, జిజ్ఞాసతో ప్రత్యేక గుర్తింపు పొందారు. ఎలాంటి అధికారిక సైన్స్ లేదా ఇంజినీరింగ్ విద్య లేకపోయినా.. ఇంటర్నెట్‌లో అందుబాటులో ఉన్న సమాచారాన్ని అధ్యయనం చేస్తూ.. స్వయంగా ప్రయోగాలు నిర్వహిస్తూ 13 ఏళ్ల పాటు తన ఆలోచనకు రూపమిచ్చారు. బ్యాచిలర్ ఆఫ్ ఆర్ట్స్ (బీఏ) పట్టభద్రుడైన ఆయన.. సొంతంగా నేర్చుకున్న సాంకేతిక పరిజ్ఞానంతో ఎలక్ట్రిక్ ఫ్లయింగ్ కారును రూపొందించారు. ఆయన అభివృద్ధి చేసిన ఈ వాహనానికి ‘హపిడా స్కైనెక్స్’ అని పేరు పెట్టారు. సాధారణ విద్యా నేపథ్యం నుంచి వచ్చినప్పటికీ.. తన ఆసక్తిని ఆచరణలో పెట్టి కొత్త ఆవిష్కరణ దిశగా అడుగులు వేయడం ద్వారా అందరి దృష్టినీ ఆకర్షించారు.

రవి తమ్తా రూపొందించిన ఎలక్ట్రిక్ ఫ్లయింగ్ వాహనం ఆగస్టులో ఒక పరీక్షా ప్రయోగాన్ని పూర్తి చేసింది. ఈ ప్రయాణంలో ఇంటర్నెట్ ద్వారా సమాచారాన్ని సేకరించడం, సుదీర్ఘకాలం ప్రయోగాలు చేయడం, కుటుంబ సభ్యుల మద్దతు ఆయనకు కీలకంగా నిలిచాయి. కొత్త విషయాలను నేర్చుకోవడానికి తరగతి గదులే పరిమితి కాదని, ఆసక్తి, నిరంతర అభ్యాసం, ఆచరణాత్మక ప్రయత్నాలతోనూ సాంకేతిక రంగంలో ముందడుగు వేయవచ్చని ఆయన ప్రయాణం తెలియజేస్తోంది. అయితే.. ఇలాంటి వినూత్న ఆలోచనలను పూర్తిస్థాయి సాంకేతిక పరిష్కారాలుగా మార్చేందుకు భద్రతా ప్రమాణాలు, ఇంజినీరింగ్ పరీక్షలు, అవసరమైన అనుమతులు కూడా కీలకమే. రవి తమ్తా ప్రయత్నం స్వీయ అభ్యాసం ద్వారా కొత్త ఆలోచనలకు రూపమివ్వవచ్చని చాటిచెబుతూ.. వినూత్న ప్రయోగాల పట్ల ఆసక్తి ఉన్నవారికి స్ఫూర్తినిస్తోంది.

ఇవి కూడా చదవండి..

రష్యా-ఉక్రెయిన్ యుద్ధానికి ముగింపు దగ్గరపడింది.. ట్రంప్ కీలక వ్యాఖ్యలు..

మళ్లీ తగ్గిన బంగారం ధరలు.. ఈ రోజు మీ నగరంలో ఎలా ఉన్నాయంటే..