ఫ్లాట్‌లో యజమానికి పట్టపగలే చుక్కలు.. వీడియో వైరల్

ఇంటర్నెట్ డెస్క్: దేశ రాజధాని న్యూఢిల్లీ, దేశ ఆర్థిక రాజధాని ముంబై వంటి మహానగరాల్లో సొంత ఇల్లు ఉంటే కోటీశ్వరుడి కిందే లెక్క. ఈ నగరాల్లో ఇళ్ల ధరలు అలా ఇలా కాదు ఓ రేంజ్‌లో ఉంటాయి. ఇంకా చెప్పాలంటే వాటి ధరలు ఆకాశాన్ని తాకుతాయి. అలా కోట్ల రూపాయలు వెచ్చించి.. ఇల్లు కొనుగోలు చేశాడో వ్యక్తి. కానీ ఆ సంతోషం అంతలోనే ఆవిరైపోయింది.

న్యూఢిల్లీలో ఓ వ్యక్తి రూ.1.5 నుంచి రూ.2 కోట్లు వెచ్చించి అపార్ట్‌మెంట్‌లో ఓ ఫ్లాట్ కొనుగోలు చేశాడు. సొంత ఇంటి కల నెరవేరిందని ఆనందపడ్డాడు. అయితే అతడికి ఆ ఆనందం కొన్ని గంటల్లోనే ఆవిరైపోయింది. తన ఫ్లాట్‌లోని హాల్‌లో పైకప్పు నుంచి నీరు పెద్ద ధారగా కారుతోంది. ఆ నీటితో హాల్ మొత్తం నిండిపోతుంది. హాల్‌లోని వస్తువులన్నీ తడిసిపోయాయి. ఇది చూసి ఆ వ్యక్తి ఒక్కసారిగా షాక్ అయ్యాడు.

ఈ వైరల్ వీడియోను @SanjuGoyel అనే యూజర్ ఎక్స్‌‌లో షేర్ చేశారు. ఢిల్లీలోని ఓ హౌసింగ్ సొసైటీలో 13వ అంతస్తులోని ఓ ఫ్లాట్‌లో ఈ సంఘటన జరిగింది. పైపు పగిలిపోయి.. నీళ్లు ఇలా బయటికి వచ్చాయని తెలిసింది. పైపును సరిగ్గా అమర్చకపోవడం, స్లాబు సమయంలో నిర్మాణం సరిగ్గా లేకపోవడంతో ఇలా జరిగిందని తెలుస్తోంది.

ఈ ఘటనతో కలత చెందిన ఫ్లాట్ యజమాని పోలీసులను ఆశ్రయించాడు. దీంతో అపార్ట్‌మెంట్ నిర్మించిన వారిపై పోలీసులు కేసు నమోదు చేశారు. భవన నిర్మాణంలో నాసిరకం సామగ్రిని ఉపయోగించారని ఆ ఎఫ్ఐఆర్‌లో స్పష్టం చేశాడు. నిర్వహణ ఖర్చులను ఏజెన్సీ నుంచి తిరిగి చెల్లించాలని ఫ్లాట్ యజమాని డిమాండ్ చేస్తున్నాడు. ఈ వీడియో ప్రస్తుతం వైరల్ అవుతోంది.

ఈ వీడియోను వీక్షించిన నెటిజన్లు తమదైన శైలిలో స్పందిస్తున్నారు. నిర్మాణంలో నిర్లక్ష్యంగా ఉంటే ఈ తరహా ఘటనలే జరుగుతాయని వారు చెబుతున్నారు. నిష్పక్షపాతంగా విచారణ జరిపి బాధ్యులపై చర్యలు తీసుకోవాలని డిమాండ్ చేస్తున్నారు. ఇల్లు కొనుగోలు చేసేటప్పుడు.. కేవలం ప్రదేశం, ధర మాత్రమే కాకుండా.. నిర్మాణ నాణ్యతను కూడా పరిగణనలోకి తీసుకోవాలని కొనుగోలుదారులకు నెటిజన్లు స్పష్టం చేస్తున్నారు.