ఉసేన్ బోల్ట్ కంటే వేగంగా.. గంటకు 45.6 కిలోమీటర్ల వేగంతో చైనా 'సూపర్‌మ్యాన్' రోబో..

ఇంటర్నెట్ డెస్క్: చైనాకు చెందిన రోబోటిక్స్ కంపెనీ యూనిట్రీ, 'సూపర్‌మ్యాన్' అనే కొత్త హ్యూమనాయిడ్ రోబోను ఆవిష్కరించింది. ప్రపంచంలోనే అత్యంత వేగవంతమైన రన్నర్‌గా పేరున్న ఉసేన్ బోల్ట్‌ను మించిన వేగంతో ఇది పరిగెత్తగలదు. ఇది సెకనుకు 12.66 మీటర్ల గరిష్ఠ వేగంతో, అంటే గంటకు సుమారు 45.6 కిలోమీటర్ల వేగంతో పరుగెత్తగలదని ఆ సంస్థ పేర్కొంది (China Superman robot).

2009లో బెర్లిన్‌లో జరిగిన 100 మీటర్ల ప్రపంచ రికార్డు పరుగులో ఉసేన్ బోల్ట్‌ గరిష్ఠ వేగం సెకనుకు సుమారు 12.42 మీటర్లుగా నమోదైంది. యూనిట్రీ సరికొత్త రోబో బోల్ట్ కంటే మరికొంచెం త్వరగా 12.66 మీటర్ల వేగంతో పరిగెత్తగలదు. సోమవారం విడుదల చేసిన ఒక వీడియోలో కంపెనీ ఆ రోబోను ప్రదర్శించింది. ఈ యంత్రాన్ని కేవలం మూడు నెలల్లోనే అభివృద్ధి చేశామని, ఇంకా మెరుగుపరచడానికి అవకాశం ఉందని యూనిట్రీ తెలిపింది (Unitree robot).

ఈ రోబోకు 0.85 మీటర్ల పొడవైన కాళ్లు ఉన్నాయని, నిలబడి ఉన్న స్థితి నుంచే రెండు మీటర్ల ఎత్తుకు దూకగలదని యూనిట్రీ తెలిపింది (Usain Bolt robot). చైనాలో హ్యూమనాయిడ్‌ రోబోటిక్స్‌ రంగం ఎంత వేగంగా అభివృద్ధి చెందుతోందోనని ఈ వీడియో చూసిన వారు ఆశ్చర్యపోతున్నారు. కాగా, యూనిట్రీ సంస్థ ఇప్పటికే పలు రకాల రోబోలను తయారు చేసింది. సంస్థ తెలిపిన ప్రకారం 2026లో ఇప్పటివరకు వివిధ నమూనాలకు చెందిన సుమారు 18,000 హ్యూమనాయిడ్‌ రోబోలను ఉత్పత్తి చేసింది.

ఇవి కూడా చదవండి..

స్వల్పంగా తగ్గిన బంగారం ధరలు.. ఈ రోజు మీ నగరంలో పసిడి ధరలు ఎలా ఉన్నాయంటే..

రూ.20 లంచం కేసులో 30 ఏళ్ల న్యాయ పోరాటం.. సుప్రీంకోర్టు కీలక తీర్పు..