మైక్రో డోసింగ్‌ సెల్ఫ్‌కేర్‌

రోజువారీ బిజీ లైఫ్‌లో పెద్ద పెద్ద మెడిటేషన్‌ సెషన్స్‌ కోసం గంటల సమయం కేటాయించాల్సిన అవసరం లేకుండా.. కేవలం 5 నిమిషాల ‘మైక్రో డోసింగ్‌’ సాధనతో మానసిక ఒత్తిడిని జయించి ఆరోగ్యంతో జీవించే అద్భుతమైన మార్గం ఇది!

నేటి ఉరుకుల పరుగుల జీవితంలో మహిళల బాధ్యతలు అనంతం. ఒకవైపు ఆఫీస్‌ డెడ్‌లైన్లు, మరోవైపు ఇంటి నిర్వహణ, పిల్లల సంరక్షణ, కుటుంబ సంబంధాలు.. ఇలా ప్రతీ క్షణం ఏదో ఒక పనిలో నిమగ్నమై ఉంటారు. ఈ బిజీ షెడ్యూల్‌లో సొంత ఆరోగ్యం, ప్రశాంతత గురించి ఆలోచించే సమయమే ఉండదు. చాలామంది మహిళలు ‘నాకు మెడిటేషన్‌ చేయడానికి, యోగా క్లాసులకు వెళ్లడానికి టైమ్‌ దొరకడం లేదు’ అని బాధపడుతుంటారు. అయితే, మానసిక ప్రశాంతత, రీచార్జ్‌ కోసం గంటల తరబడి సమయం కేటాయించాల్సిన అవసరం లేదని ఆధునిక సైకాలజీ చెబుతోంది. దీనికే ‘మైక్రో డోసింగ్‌ సెల్ఫ్‌కేర్‌’ అని పేరు. అంటే రోజంతా చిన్న చిన్న విరామాలలో కేవలం 5 నిమిషాల పాటు మైండ్‌ఫుల్‌నెస్‌ సాధన చేయడం.

ఏమిటీ మైక్రో డోసింగ్‌ సెల్ఫ్‌కేర్‌?

మనం మందులు వాడేటప్పుడు ఒకేసారి ఎక్కువ డోస్‌ తీసుకోకుండా, రోజులో చిన్న చిన్న డోస్‌లుగా ఎలా తీసుకుంటామో.. అలాగే మన మెదడుకు, శరీరానికి ప్రశాంతతనిచ్చే విరామాలను రోజంతా చిన్న చిన్న భాగాలుగా అందించడమే ఈ కాన్సెప్ట్‌. రోజులో 1-2 గంటలు ప్రత్యేకంగా కేటాయించలేకపోయినా, ప్రతి 2-3 గంటలకోసారి కేవలం 3 నుంచి 5 నిమిషాల సమయాన్ని మీ కోసం కేటాయించుకోవడమే దీని ముఖ్య ఉద్దేశం.

మైక్రో హ్యాబిట్స్‌

4-7-8 శ్వాస ప్రక్రియ: పని ఒత్తిడి ఎక్కువైనప్పుడు లేదా ఆందోళనగా అనిపించినప్పుడు 4 సెకన్ల పాటు ముక్కు ద్వారా శ్వాస తీసుకుని, 7 సెకన్ల పాటు ఆపి, 8 సెకన్ల పాటు నోటి ద్వారా మెల్లగా వదలాలి. రోజుకు 3 సార్లు ఈ 5 నిమిషాల ప్రక్రియ చేయడం వల్ల నరాల వ్యవస్థ తక్షణమే శాంతపడుతుంది.

మైండ్‌ఫుల్‌ టీ/కాఫీ సిప్‌: ఉదయం లేదా సాయంత్రం టీ తాగేటప్పుడు ఫోన్‌ చూడటం, వార్తలు చదవడం ఆపివేయండి. టీ కప్పు వెచ్చదనం, దాని సువాసన, రుచిని మాత్రమే అనుభవిస్తూ ప్రశాంతంగా 5 నిమిషాలు గడపండి.

బాడీ స్కాన్‌ రీసెట్‌: కుర్చీలో లేదా సోఫాలో ప్రశాంతంగా కూర్చుని కళ్లు మూసుకోండి. మీ తల నుంచి పాదాల వరకు ప్రతీ అవయవాన్ని మనసులో తలుచుకుంటూ, ఎక్కడైనా కండరాలు బిగుతుగా ఉంటే సడలించండి.

5-4-3-2-1 గ్రౌండింగ్‌ టెక్నిక్‌: మనసు గందరగోళంగా ఉన్నప్పుడు మీ చుట్టూ ఉన్న 5 వస్తువులను చూడండి, 4 వస్తువులను స్పర్శించండి, 3 శబ్దాలను వినండి, 2 సువాసనలను పీల్చండి, ఒక రుచిని అనుభవించండి. ఇది మిమ్మల్ని తక్షణమే వర్తమానంలోకి తెస్తుంది.

ప్రయోజనాలు

హార్మోన్ల సమతుల్యత: శరీరంలో స్ట్రెస్‌ హార్మోన్‌ అయిన ‘కార్టిసోల్‌’ స్థాయిలు తగ్గి, ప్రశాంతతను ఇచ్చే ‘సెరోటోనిన్‌’ పెరుగుతుంది.

నిద్రలేమికి పరిష్కారం: రాత్రి వేళల్లో ఆలోచనల ఒత్తిడి తగ్గి నాణ్యమైన నిద్ర పడుతుంది.

నిరంతర ఉత్సాహం: సాయంత్రం అయ్యేసరికి వచ్చే తీవ్ర అలసట మాయమవుతుంది.

ఈ వార్తలు కూడా చదవండి..

పారా అథ్లెట్‌... ట్రాక్‌లో హిట్‌
పిల్లలు సరిగా చదవట్లేదా..?

Read Latest Telangana News And AP News And National News

And Telugu News