ఈ క్లిష్ట సమయంలోనూ సమతుల్యతను కాపాడుతున్నాం: రక్షణ మంత్రి రాజ్‌నాథ్ సింగ్

న్యూఢిల్లీ, ఏప్రిల్ 12: పశ్చిమాసియాలో ఉద్రిక్తతలు తారాస్థాయికి చేరుకున్న వేళ, అంతర్జాతీయ సముద్ర వాణిజ్యం, భద్రతలో భారత్ పోషిస్తున్న పాత్రను రక్షణ మంత్రి రాజ్‌నాథ్ సింగ్ స్పష్టం చేశారు. హోర్ముజ్ జలసంధి (Strait of Hormuz) మీదుగా అత్యధిక సంఖ్యలో నౌకలను నడుపుతున్న దేశంగా భారత్ అవతరించిందని, ఈ క్లిష్ట సమయంలోనూ సమతుల్యతను కాపాడుతున్నామని ఆయన పేర్కొన్నారు. ఉత్తరప్రదేశ్ రాజధాని లక్నోలో ఈ రోజు జరిగిన ఒక బహిరంగ చర్చా కార్యక్రమంలో ప్రసంగిస్తూ రాజ్ నాథ్ ఈ మేరకు స్పష్టం చేశారు.

ప్రపంచవ్యాప్తంగా చమురు సరఫరాకు అత్యంత కీలకమైన హోర్ముజ్ జలసంధి గుండా ప్రయాణించే వాణిజ్య నౌకలలో భారత్‌కు చెందినవే అత్యధికంగా ఉన్నాయని రాజ్‌నాథ్ సింగ్ వెల్లడించారు. ఉద్రిక్తతలు ఉన్నప్పటికీ భారత నౌకాదళం, వాణిజ్య నౌకలు ధైర్యంగా తమ కార్యకలాపాలను కొనసాగిస్తున్నాయని ఆయన ప్రశంసించారు.

అమెరికా-ఇరాన్ మధ్య సముద్ర దిగ్బంధనం వంటి తీవ్ర పరిణామాలు చోటుచేసుకుంటున్న తరుణంలో, భారత్ ఏ ఒక్క వైపు మొగ్గు చూపకుండా అంతర్జాతీయ నియమ నిబంధనలకు కట్టుబడి తన బాధ్యతను నిర్వర్తిస్తోందని ఆయన తెలిపారు. భారతీయ నౌకల రక్షణ కోసం ఇండియన్ నేవీ నిరంతరం నిఘా ఉంచుతోందని, సముద్రపు దొంగలు లేదా ఇతర దాడుల నుంచి మన నౌకలకు పూర్తి భద్రత కల్పిస్తున్నామని రక్షణ మంత్రి చెప్పారు.

హోర్ముజ్ జలసంధి ద్వారా చమురు సరఫరా ఆగిపోతే ప్రపంచవ్యాప్తంగా ఇంధన సంక్షోభం తలెత్తే అవకాశం ఉన్నందున, ఆ మార్గంలో శాంతియుత రాకపోకలు కొనసాగడం భారత్‌తో పాటు ప్రపంచ దేశాలన్నింటికీ అవసరమని ఆయన పేర్కొన్నారు.

ఇవి కూడా చదవండి

ఇజ్రాయెల్‌కు తుర్కియే వార్నింగ్.. దాడి చేయటం మా కర్తవ్యం..

చైనాకు ట్రంప్ వార్నింగ్.. స్పందించిన ఎంబసీ..