ప్రధాని మోదీ బుల్లెట్ ప్రూఫ్ కాన్వాయ్ వివరాలు.. మెర్సిడెస్ మేబాక్ నుంచి రేంజ్ రోవర్ వరకు..

న్యూఢిల్లీ: ప్రధానమంత్రి నరేంద్ర మోదీ 76వ పుట్టినరోజు సందర్భంగా దేశవ్యాప్తంగా బీజేపీ సంబరాలు చేస్తోంది. ‘సేవా సంకల్ప్ అభియాన్’ పేరుతో నెల రోజుల పాటు వివిధ సేవా కార్యక్రమాలను నిర్వహించనుంది. ఈ సందర్భంగా రెండు దశాబ్దాలకు పైగా ఎన్నికైన పదవుల్లో కొనసాగుతున్న మోదీ.. ప్రజా జీవితంలోని కీలక అంశాలు మళ్లీ చర్చనీయాంశం అవుతున్నాయి. ఈ నేపథ్యంలో ఆయన కాన్వాయ్‌పై అందరి దృష్టి పడింది. ప్రధాని రక్షణ కోసం శత్రుదుర్భేధ్యంగా రూపొందించిన వీటిపై చర్చ మొదలైంది. స్పెషల్ ప్రొటెక్షన్ గ్రూప్ (ఎస్‌పీజీ) ఆధ్వర్యంలో నడిచే ఈ కాన్వాయ్‌లోని ప్రధాన వాహనాల గురించి ఇప్పుడు తెలుసుకుందాం..

మెర్సిడెస్-మేబాక్ ఎస్-650 గార్డ్..

ప్రధాని నరేంద్ర మోదీ ఫ్లీట్‌లోని అత్యంత సురక్షిత వాహనాల్లో మెర్సిడెస్-మేబాక్ ఎస్-650 గార్డ్ ఒకటి. దీని విలువ సుమారు రూ.12 కోట్లకు పైగా ఉంటుంది. ఇది వీఆర్-10 స్థాయి బాలిస్టిక్ రక్షణ కలిగి, అధిక క్యాలిబర్ గన్‌ఫైర్‌ను తట్టుకోగలదు. దీంట్లో బ్లాస్ట్-రెసిస్టెంట్ ఆర్మర్, రన్-ఫ్లాట్ టయర్లు, సీల్డ్ క్యాబిన్‌తో స్వతంత్ర గాలి సరఫరా వ్యవస్థ ఉన్నాయి. 6.0-లీటర్ ట్విన్-టర్బో వీ-12 ఇంజిన్ నుంచి 500 హెచ్‌పీకి పైగా శక్తి వస్తుంది. గంటకు 160 కి.మీ. టాప్ స్పీడ్‌తో వెళ్లగలదు.

రేంజ్ రోవర్ సెంటినెల్..

ప్రధాని కాన్వాయ్‌లో కీలకమైన వాహనం రేంజ్ రోవర్ సెంటినెల్. వీఆర్-8 స్థాయి బాలిస్టిక్ రక్షణతో 7.62 ఎంఎం ఆర్మర్-పియర్సింగ్ రౌండ్లను తట్టుకోగలదు. 15 కిలోల టీఎన్‌టీ సమానమైన పేలుళ్లు, గ్రెనేడ్ దాడులనూ తట్టుకునేలా రూపొందించారు. ఫైర్ సప్రెషన్ సిస్టమ్, స్వతంత్ర ఆక్సిజన్ సప్లై, పబ్లిక్ అడ్రస్ సిస్టమ్ అదనపు భద్రతనిస్తాయి. 5.0-లీటర్ సూపర్‌ఛార్జ్డ్ వీ-8 ఇంజిన్ 380 హెచ్‌పీ శక్తినిస్తుంది. అలాగే, 4.4 టన్నుల బరువు ఉన్నా 10.4 సెకన్లలోనే 0-100 కి.మీ. వేగానికి చేరుకుంటుంది. దీని టాప్ స్పీడ్ 193 కి.మీ.పీ.హెచ్‌.గా ఉంది.

ఆర్మర్డ్ టయోటా ల్యాండ్ క్రూజర్..

ఆర్మర్డ్ టయోటా ల్యాండ్ క్రూజర్ మరో ముఖ్య వాహనం. దీని 4.5-లీటర్ వీ-8 డీజిల్ ఇంజిన్ సుమారు 260 బీహెచ్‌పీ, 650 ఎన్‌ఎం శక్తిని ఉత్పత్తి చేస్తుంది. దీంట్లో 4x4 సామర్థ్యంతో పాటు బాలిస్టిక్ ఆర్మర్, బ్లాస్ట్-రెసిస్టెంట్ నిర్మాణం, కెమికల్ బెదిరింపుల నుంచి రక్షించే సీల్డ్ క్యాబిన్ ఉన్నాయి. స్వాతంత్ర్య దినోత్సవం సందర్భంగా రెడ్ ఫోర్ట్ సందర్శనలో ప్రధాని ఈ వాహనాన్ని ఉపయోగించడంతో ప్రజల దృష్టిని ఆకర్షించింది.

బీఎండబ్ల్యూ 760ఎల్‌ఐ హై సెక్యూరిటీ..

అత్యంత రక్షిత వాహనాల్లో ఒకటిగా బీఎండబ్ల్యూ 760ఎల్‌ఐ హై సెక్యూరిటీ నిలుస్తోంది. దీనిలో ఆర్మర్డ్ బాడీ ప్యానెల్స్, బుల్లెట్-రెసిస్టెంట్ గ్లాస్, రన్-ఫ్లాట్ టైర్లు, సెల్ఫ్-సీలింగ్ ఫ్యూయల్ ట్యాంక్, గ్యాస్ దాడుల నుంచి రక్షించే ఎమర్జెన్సీ ఆక్సిజన్ సప్లై ఉన్నాయి. 6.0-లీటర్ వీ-12 ఇంజిన్ 544 హెచ్‌పీ, 750 ఎన్‌ఎం శక్తినిస్తుంది. కేవలం 6.2 సెకన్లలోనే 0-100 కి.మీ.పీ.హెచ్‌.కి చేరుకుంటుంది. టాప్ స్పీడ్ 210 కి.మీ.పీ.హెచ్‌.కు పరిమితం.

టయోటా ఫార్చ్యూనర్ ఆర్మర్డ్..

ఎస్‌పీజీ ఎస్కార్ట్, టాక్టికల్ సపోర్ట్ వాహనంగా విస్తృతంగా ఉపయోగిస్తున్న బుల్లెట్‌ప్రూఫ్ ఎస్‌యూవీ ఇది. రష్యా అధ్యక్షుడు వ్లాదిమిర్ పుతిన్‌తో సహా వివిధ ప్రపంచ నాయకుల సమావేశాల్లో ప్రధానిని తీసుకెళ్లే సందర్భాల్లో ఈ వాహనం కనిపించింది. ఈ వాహనాలు ప్రధాని మోదీ ప్రతి ప్రయాణంలోనూ అత్యున్నత స్థాయి భద్రతను అందిస్తూ, ఆయన కార్యకలాపాలు నిర్విఘ్నంగా సాగేలా చూస్తున్నాయి.

ఈ వార్తలు కూడా చదవండి

వేరే యువతితో ప్రియుడు.. ప్రశ్నించినందుకు ఏం చేశాడంటే..?

ప్రతీ ఆశీర్వాదం నా సంకల్పాన్ని మరింత బలపరుస్తుంది: ప్రధాని మోదీ