దేశం పరువు తీయొద్దు.. కాంగ్రెస్‌పై ప్రధాని మోదీ విమర్శలు..

ఆంధ్రజ్యోతి, ఫిబ్రవరి 22: రాజధాని ఢిల్లీలోని భారతమండపంలో జరిగిన 'AI ఇంపాక్ట్ సమ్మిట్' వేదికగా చోటుచేసుకున్న పరిణామాలు భారత రాజకీయాల్లో వేడిని పుట్టించాయి. కృత్రిమ మేధ (AI) భవిష్యత్తుపై ప్రపంచ స్థాయి చర్చలు జరుగుతున్న వేదికను.. కాంగ్రెస్ పార్టీ, ఆ పార్టీ అగ్రనేత రాహుల్ గాంధీ తమ రాజకీయ నిరసనలకు వేదికగా మార్చుకున్నారని ప్రధానమంత్రి నరేంద్ర మోదీ తీవ్ర స్థాయిలో ధ్వజమెత్తారు.

వేదిక దుర్వినియోగం:

అంతర్జాతీయ ప్రతినిధులు, టెక్ దిగ్గజాలు పాల్గొన్న ఈ సదస్సులో కాంగ్రెస్ కార్యకర్తలు 'షర్ట్‌లెస్' (చొక్కాలు లేకుండా) నిరసనలు చేపట్టడంపై మోదీ అసహనం వ్యక్తం చేశారు. ప్రపంచం ముందు దేశం పరువు తీస్తున్నారని, భారతదేశం గ్లోబల్ టెక్ హబ్‌గా ఎదుగుతున్న తరుణంలో, ఇటువంటి చర్యలు దేశ ప్రతిష్ఠను దిగజార్చుతాయని ఆయన ఇవాళ నిర్వహించిన 'మన్ కీ బాత్' కార్యక్రమంలో మండిపడ్డారు.

'డర్టీ పాలిటిక్స్' వ్యాఖ్యలు:

సదస్సును కాంగ్రెస్ తన 'మురికి రాజకీయాలకు' (Dirty Politics) వాడుకుందని ప్రధాని మోదీ విమర్శించారు. ప్రపంచం మొత్తం భారతదేశం వైపు ఆశగా చూస్తోంది.. మన యువత మేధస్సును చూసి గర్విస్తోందని ప్రధాని మోదీ చెప్పారు. కానీ విపక్షాలు మాత్రం ఇలాంటి గొప్ప వేదికలపై బాధ్యతారహితంగా వ్యవహరిస్తూ దేశ అభివృద్ధికి అడ్డుపడుతున్నాయని విచారం వ్యక్తం చేశారు.

AI వల్ల ఉద్యోగ అవకాశాలు దెబ్బతింటాయని, లేదా నిర్దిష్ట అంశాలను లేవనెత్తుతూ కాంగ్రెస్ శ్రేణులు చొక్కాలు తీసి వినూత్న నిరసనకు దిగాయి. అయితే, టెక్నాలజీ సదస్సులో ఇటువంటి ప్రదర్శనలు అప్రస్తుతమని బీజేపీ వర్గాలు వాదిస్తున్నాయి. ఈ సమ్మిట్ కేవలం ఒక సమావేశం కాదని, ఇది భారతదేశాన్ని AI క్యాపిటల్‌గా నిలబెట్టే ప్రయత్నమని బీజేపీ నేతలు, ప్రభుత్వ పెద్దలు అంటున్నారు.

వేల కోట్ల పెట్టుబడులను ఆకర్షించే మార్గం ఇదని.. భవిష్యత్తు తరాలకు ఉపాధి కల్పించే దిశగా వేసిన అడుగు అని వాళ్లు చెప్పుకొస్తున్నారు. ఇలాంటి వేదికల్లో భారత పరువు నిలపాల్సిన ప్రతిపక్షాలు, విశ్వవేదికల సాక్షిగా స్వదేశపరువు తీసుకోవడం విడ్డూరంగా ఉందని బీజేపీ తీవ్రంగా ఆక్షేపించింది.

ఇవి కూడా చదవండి..

నమో భారత్ ట్రైన్, మీరట్ మెట్రోను ప్రారంభించిన మోదీ

ఏఐ సమ్మిట్ ఓ కీలక మలుపు! మన్‌ కీ బాత్‌లో ప్రధాని మోదీ