యూపీలో ఒవైసీ, చంద్రశేఖర్ ఆజాద్ కూటమి.. 403 స్థానాల్లో పోటీకి సిద్ధం!

ఆంధ్రజ్యోతి, నవంబర్ 12: 2027 ఉత్తర్ ప్రదేశ్ శాసనసభ ఎన్నికలకు ముందు రాష్ట్ర రాజకీయాల్లో కీలక పరిణామం చోటుచేసుకుంది. ఆల్ ఇండియా మజ్లిస్-ఇ-ఇత్తెహాదుల్ ముస్లిమీన్ (AIMIM) అధినేత అసదుద్దీన్ ఒవైసీ, ఆజాద్ సమాజ్ పార్టీ (కాన్షీరామ్) నేత చంద్రశేఖర్ ఆజాద్ చేతులు కలిపి కొత్త రాజకీయ కూటమిని ఏర్పాటు చేశారు.ఈ కూటమికి 'సామాజిక్ పరివర్తన్ మోర్చా' (Samajik Parivartan Morcha - SPM) అని నామకరణం చేసినట్లు గురువారం లక్నోలో జరిగిన సంయుక్త విలేకరుల సమావేశంలో ఇరువురు నేతలు ప్రకటించారు.

ఉత్తర్ ప్రదేశ్‌లోని మొత్తం 403 అసెంబ్లీ స్థానాల్లో తమ కూటమి పోటీ చేస్తుందని నాయకులు వెల్లడించారు. సామాజిక్ పరివర్తన్ మోర్చా (SPM) ప్రధాన అధ్యక్షుడిగా, ముఖ్యమంత్రి అభ్యర్థిగా చంద్రశేఖర్ ఆజాద్ పేరును అసదుద్దీన్ ఒవైసీ ప్రకటించారు. ఉత్తర్ ప్రదేశ్‌లో బీజేపీ వరుసగా మూడోసారి అధికారంలోకి రాకుండా అడ్డుకోవడమే తమ కూటమి ప్రధాన లక్ష్యమని ఒవైసీ పేర్కొన్నారు.

దళితులు, మైనారిటీలు, వెనుకబడిన తరగతులు (OBC), ఇతర అణగారిన వర్గాల సమస్యలపై తమ కూటమి పోరాడుతుందని ఒవైసీ తెలిపారు. ప్రధాన రాజకీయ పార్టీలు ఈ వర్గాలను కేవలం ఓటు బ్యాంకులుగా మాత్రమే వాడుకుంటున్నాయని ఆయన విమర్శించారు.

రాష్ట్రంలో క్షీణిస్తున్న విద్యా వ్యవస్థ, యువతలో నిరుద్యోగం, రైతులు ఎదుర్కొంటున్న సమస్యలను ప్రధాన అంశాలుగా ఎత్తుకుంటామని స్పష్టం చేశారు.

తమ కూటమిని కేవలం మూడో ప్రత్యామ్నాయ కూటమిగా కాకుండా, రాష్ట్రంలో ఒక 'సామాజిక మార్పు వేదిక'గా చూడాలని చంద్రశేఖర్ ఆజాద్ అన్నారు.

సామాజిక మార్పు ఉద్యమానికి నాంది పలుకుతూ నవంబర్ 26న నిర్వహించనున్న బహిరంగ సభకు ప్రజలు తరలిరావాలని ఒవైసీ పిలుపునిచ్చారు.

సమాజ్‌వాదీ పార్టీ (SP), కాంగ్రెస్‌లతో కలిసి సీట్ల సర్దుబాటు చర్చలలో పాల్గొనాలని ఒవైసీ ప్రతిపాదించినప్పటికీ, ఆ పార్టీల నుంచి సానుకూల స్పందన రాలేదు. అక్టోబర్ 2 గడువు ముగిసిన తర్వాత ఆయన ఆజాద్ పార్టీతో జతకట్టారు.

యూపీలో కీలకమైన దళిత, ముస్లిం ఓటర్లను ఏకం చేయడం ద్వారా తమ రాజకీయ ఉనికిని విస్తరించుకోవాలని ఇరు పార్టీలు భావిస్తున్నాయి. మరోవైపు బీఎస్పీ (BSP) అధినేత్రి మాయావతి 2027 ఎన్నికల్లో ఒంటరిగానే పోటీ చేస్తామని సంకేతాలిచ్చారు.

2022 యూపీ అసెంబ్లీ ఎన్నికల్లో బీజేపీ 255 స్థానాలు, సమాజ్‌వాదీ పార్టీ 111 స్థానాలు, కాంగ్రెస్ 2, బీఎస్పీ 1 స్థానం గెలుచుకున్నాయి. ఆ ఎన్నికల్లో 95 స్థానాల్లో పోటీ చేసిన AIMIM 0.49శాతం ఓట్లతో ఖాతా తెరవలేకపోగా, ఆజాద్ సమాజ్ పార్టీ కూడా ఒక్క సీటును గెలుచుకోలేకపోయింది. (UP Assembly Election 2027)

November 12, 2026

ఇవి కూడా చదవండి..

ఇరాన్‌తో యుద్ధాన్ని అమెరికా మొదలుపెట్టలేదు: డొనాల్డ్ ట్రంప్

ఎన్విడియా సీఈవో జెన్సెన్ హువాంగ్‌కు పదవీ గండం.. తెరపైకి మరో అఫైర్..