ప్రధాని మోదీకి ఫ్రాన్స్ అధ్యక్షుడు మెక్రాన్ ఫోన్

న్యూఢిల్లీ, ఏప్రిల్ 16: పశ్చిమాసియాలో (West Asia) మారుతున్న రాజకీయ పరిణామాల నేపథ్యంలో ప్రధాని నరేంద్ర మోదీ, ఫ్రాన్స్ అధ్యక్షుడు ఇమ్మాన్యుయేల్ మెక్రాన్ ఇవాళ (గురువారం) ఫోన్ ద్వారా చర్చలు జరిపారు. ఈ సందర్భంగా ఇరు దేశాల మధ్య ఉన్న వ్యూహాత్మక సంబంధాలతో పాటు అంతర్జాతీయ భద్రతపై వారు సుదీర్ఘంగా చర్చించుకున్నారు.

ప్రధానంగా హోర్ముజ్ జలసంధిలో (Strait of Hormuz) నెలకొన్న భద్రతా పరిస్థితులపై ఇరువురు నేతలు తమ ఆందోళనను వ్యక్తం చేశారు. అంతర్జాతీయ వాణిజ్యానికి ఈ ప్రాంతం అత్యంత కీలకమని, ఇక్కడ సముద్ర మార్గాల్లో నౌకల రాకపోకలకు ఎటువంటి ఆటంకం కలగకుండా చూడాల్సిన అవసరం ఉందని వారు అభిప్రాయపడ్డారు. ఇటీవల ఈ ప్రాంతంలో చోటుచేసుకున్న పరిణామాలు ప్రపంచ ఆర్థిక వ్యవస్థపై ప్రభావం చూపే అవకాశం ఉందని చర్చించారు.

ఇజ్రాయెల్-ఇరాన్ మధ్య నెలకొన్న ఉద్రిక్తతలు, పశ్చిమాసియాలో విస్తరిస్తున్న అస్థిరతపై మెక్రాన్, మోదీ చర్చించారు. ఈ సంక్షోభం మరింత ముదరకుండా చూడటానికి అన్ని పక్షాలు సంయమనం పాటించాలని వారు కోరారు. ప్రాంతీయ శాంతి, సుస్థిరత కోసం దౌత్యపరమైన మార్గాల్లో ప్రయత్నాలు జరగాలని ప్రధాని మోదీ ఈ సందర్భంగా నొక్కి చెప్పారు.

ఈ ఫోన్ సంభాషణలో ఇరుదేశాల ద్వైపాక్షిక సంబంధాలను మరింత బలోపేతం చేసుకోవాలని ఇరువురు నేతలు నిర్ణయించారు. రక్షణ, అంతరిక్షం, ఇంధన రంగాల్లో సహకారాన్ని కొనసాగించాలని పునరుద్ఘాటించారు. అంతర్జాతీయ వేదికలపై రెండు దేశాలు ఒకే విధమైన ఆలోచనలతో ముందుకు వెళ్తున్నాయని మెక్రాన్ ఈ సందర్భంగా ప్రశంసించారు.

ప్రపంచంలోని ప్రధాన భౌగోళిక రాజకీయ సమస్యలపై భారత్ అభిప్రాయానికి ఉన్న ప్రాముఖ్యతను ఈ చర్చలు మరోసారి చాటిచెప్పాయి. పశ్చిమాసియాలో శాంతిని నెలకొల్పేందుకు భారత్, ఫ్రాన్స్ సమన్వయంతో పనిచేయాలని నిర్ణయించుకున్నాయి.

ఇవీ చదవండి:

మహిళా రిజర్వేషన్ బిల్లు ముస్లిం ప్రాతినిధ్యాన్ని తుడిచివేసే చర్య: ఒవైసీ

డీలిమిటేషన్ బిల్లుపై ప్రతిష్ఠంభన.. ఎంపీలంతా హాజరుకావాలని కాంగ్రెస్ విజ్ఞప్తి