ప్రపంచం పాక్ వైపు ఉన్నా.. భారత్‌కు రష్యా అండగా నిలిచింది: జైశంకర్

పాశ్చాత్య దేశాల నుంచి తీవ్ర విమర్శలు వ్యక్తమవుతున్నప్పటికీ, రష్యాతో భారతదేశానికి ఉన్న చారిత్రక సంబంధాలను విదేశాంగ మంత్రి ఎస్. జైశంకర్ మరోసారి బలంగా సమర్థించారు. భారతదేశ భద్రతకు, సమగ్రతకు ముప్పు వాటిల్లిన ప్రతిసారీ మాస్కో (రష్యా) న్యూఢిల్లీకి తోడుగా నిలిచిందని ఆయన గుర్తుచేశారు. India Russia Historical Ties. ఢిల్లీలో నిర్వహించిన మ్యూనిచ్ లీడర్స్ సమావేశంలో 'ఫ్రమ్ న్యూఢిల్లీ టు న్యూ మొమెంటమ్' అనే అంశంపై ప్రసంగిస్తూ ఆయన ఈ వ్యాఖ్యలు చేశారు.

'ప్రజలు మంచి చరిత్రను గానీ, చెడు చరిత్రను గానీ మర్చిపోరు' అని జయ శంకర్ వ్యాఖ్యానించారు. 1950ల నుంచి ప్రపంచంలోని అత్యధిక దేశాలు పాకిస్థాన్ సైనిక రంగానికి మద్దతు పలికినప్పటికీ, సోవియట్ యూనియన్ (రష్యా) మాత్రం భారత్‌కే నిలకడగా అండగా నిలిచిందని తెలిపారు. (ముఖ్యంగా 1971 ఇండో-పాక్ యుద్ధ సమయంలో అమెరికా తన నౌకాదళాన్ని బంగాళాఖాతానికి పంపిన వేళ సోవియట్ భారత్‌కు అందించిన మద్దతును ఆయన పరోక్షంగా గుర్తుచేశారు).

ప్రతి దేశానికి సొంత అనుభవం ఉంటుంది: రష్యాతో భారత్ బంధాన్ని ప్రశ్నిస్తున్న పాశ్చాత్య దేశాలకు ఘాటుగా సమాధానమిస్తూ.. ప్రతి దేశం తన అనుభవాల ఆధారంగానే సంబంధాలను అంచనా వేస్తుందని పేర్కొన్నారు. రష్యా పట్ల భారత్ దృక్పథాన్ని ఐరోపా ఆమోదించలేనట్లే, రష్యాతో తమ అనుబంధం పూర్తిగా 'సానుకూలమైనది' అనే వాస్తవాన్ని వారు గుర్తించాలని స్పష్టం చేశారు.

రష్యా చమురు కొనుగోలుపై స్పష్టత: ఉక్రెయిన్ యుద్ధం వేళ రష్యా నుంచి ముడిచమురు కొనుగోలు చేయడంపై వెలువడుతున్న విమర్శలను తోసిపుచ్చారు. భారతీయ వినియోగదారుల ప్రయోజనాలను కాపాడటమే ప్రభుత్వ ప్రథమ ప్రాధాన్యమని, వివిధ మార్గాల ద్వారా ఇంధన సరఫరాను నిర్వహించడం భారత్ హక్కు అని స్పష్టం చేశారు.

ఉక్రెయిన్-రష్యా శాంతి చర్చలు: రష్యా-ఉక్రెయిన్ యుద్ధాన్ని కేవలం ప్రకటనలకే పరిమితం చేయకుండా, భారత్ దౌత్యపరమైన చర్చల్లో చురుగ్గా పాల్గొంటోందని చెప్పారు. నల్లసముద్రం ద్వారా ఓడల రక్షణ, ధాన్యాల ఎగుమతులు, ఇంధన సరఫరా, ఇరు దేశాల మౌలిక సదుపాయాలపై దాడులు నిలిపివేసే అంశాలపై భారత్ నిరంతరం ఇరు దేశాలతో మాట్లాడుతోందని వెల్లడించారు. 'ఇది యుద్ధాల యుగం కాదు.. నిరంతరాయంగా సాగే యుద్ధం కాస్తా, యుద్ధ ముగింపునకు దారితీయాలి' అన్న ప్రధాని నరేంద్ర మోదీ వ్యాఖ్యల్ని ఈ సందర్భంగా జైశంకర్ ప్రస్తావించారు.

విదేశాంగ వ్యవహారాల పార్లమెంటరీ సలహా కమిటీ సమావేశంలో కూడా పాల్గొన్న జైశంకర్, రష్యాతో వర్తక, వాణిజ్య, ఇంధన సంబంధాలను మరింత విస్తరించేందుకు భారత్ సిద్ధంగా ఉందని కమిటీ సభ్యులకు స్పష్టం చేశారు.

ఈ వార్తలూ చదవండి

పాక్ హనీట్రాప్‌లో భారత నేవీ ఉద్యోగి.. రక్షణ రహస్యాల లీక్ ఆరోపణలపై అరెస్ట్

క్షణాల్లో ఘోరం.. 100 మీటర్ల లోయలో పడ్డ కారు!