స్టార్‌లింక్ వివాదంపై రాహుల్ గాంధీకి మస్క్ స్పందన.. 'ఇది నిజంగా ఆందోళనకరం'
ABN , Publish Date - Oct 09 , 2026 | 07:00 AM
భారత్‌లో స్టార్‌లింక్ లైసెన్స్ జాప్యంపై ఎలాన్ మస్క్ చేసిన వ్యాఖ్యలు, రాహుల్ గాంధీ ఇచ్చిన స్పందనతో ఈ వ్యవహారం పీక్స్‌‌కు చేరింది. రాహుల్ Xలో ఇచ్చిన రిప్లైకు 'ఇది నిజంగా ఆందోళనకరం' అంటూ మస్క్ స్పందించడం ఇప్పుడు దేశంలో చర్చనీయాంశమైంది.
భారతదేశంలో శాటిలైట్ ఇంటర్నెట్ సేవల లైసెన్స్ కేటాయింపులో జరుగుతున్న జాప్యంపై ప్రపంచ కుబేరుడు, ప్రముఖ వ్యాపారవేత్త, టెస్లా, స్పేస్‌ఎక్స్ (SpaceX) సీఈఓ ఎలాన్ మస్క్ (Elon Musk), లోక్‌సభ ప్రతిపక్ష నేత రాహుల్ గాంధీ (Rahul Gandhi) మధ్య సోషల్ మీడియా వేదికగా జరిగిన సంభాషణ ఇప్పుడు దేశీయ రాజకీయాల్లో, టెక్ వర్గాల్లో, దేశ ప్రజల్లో తీవ్ర దుమారం రేపుతోంది. (Elon Musk Rahul Gandhi Starlink)
భారత నిబంధనలన్నింటినీ 5 ఏళ్లుగా పాటిస్తున్నప్పటికీ స్టార్‌లింక్‌కు లైసెన్స్ ఇవ్వడం లేదని మస్క్ చేసిన ఆరోపణలపై రాహుల్ గాంధీ స్పందిస్తూ 'భారత్‌లోకి స్వాగతం ఎలాన్.. మీరు రెండో వ్యక్తిని కూడా కలుసుకునే వరకూ ఆగండి' అని వ్యంగ్యంగా ట్వీట్ చేశారు. దీనికి ఎలాన్ మస్క్ బదులిస్తూ 'ధన్యవాదాలు రాహుల్.. ఇది నిజంగా చాలా ఆందోళనకరమైన విషయం'(This is indeed troubling) అని పేర్కొన్నారు.
అంబానీని లక్ష్యంగా చేసుకుంటూ ప్రశ్నలు!
ప్రపంచవ్యాప్తంగా 165 కంటే ఎక్కువ దేశాల్లో స్టార్‌లింక్‌కు లైసెన్స్ ఉందని, భారత్‌లోని అన్ని చట్టాలనూ గత ఐదేళ్లుగా పాటిస్తున్నప్పటికీ ఇంకా లైసెన్స్ ఎందుకు ఇవ్వడం లేదని మస్క్ ప్రశ్నించారు. భారత్‌కు నిజమైన బాస్ అంబానీయేనా? అనే రీతిన కూడా మస్క్ పరోక్షంగా నిలదీశారు. భారత్‌లోని బడా వ్యాపారవేత్తలు తమ ఏకఛత్రాధిపత్యాన్ని కాపాడుకోవడానికి స్టార్‌లింక్‌ను రాకుండా అడ్డుకుంటున్నారని, ఇది భారత ప్రజలకు వ్యతిరేకంగా జరుగుతున్న నేరమని మస్క్ మండిపడ్డారు.
స్పందించిన కేంద్ర టెలికాం మంత్రిత్వ శాఖ
మస్క్ వ్యాఖ్యలు సంచలనం సృష్టించడంతో కేంద్ర కమ్యూనికేషన్ల మంత్రిత్వ శాఖ క్లారిటీ ఇస్తూ అధికారిక ప్రకటన విడుదల చేసిన సంగతి తెలిసిందే. స్టార్‌లింక్‌పై ఎలాంటి వివక్ష చూపడం లేదని, నిబంధనలు అందరికీ సమానంగానే వర్తిస్తాయని స్పష్టం చేసింది. ఉపగ్రహాల ఆధారిత గ్లోబల్ మొబైల్ పర్సనల్ కమ్యూనికేషన్స్ (GMPCS) కోసం అభ్యర్థించిన మూడు సంస్థలకు అనుమతి ప్రక్రియ ఒకే దశలో ఉందని తెలిపింది. వినియోగదారుల డేటా భద్రతకు సంబంధించిన సీక్వెన్షియల్ ప్రొటోకాల్స్ ప్రస్తుతం పరిశీలనలో ఉన్నాయని పేర్కొంది. సెక్యూరిటీ అసెస్‌మెంట్ పూర్తయిన తర్వాతే స్పెక్ట్రమ్ కేటాయింపులు జరుగుతాయని, ఏ ఒక్క కంపెనీని ప్రత్యేకంగా అడ్డుకోవడం లేదని టెలికాం శాఖ స్పష్టం చేసింది.
మరోవైపు, తాజా ఇండియా మొబైల్ కాంగ్రెస్ 2026 లో స్పేస్‌ఎక్స్ వైస్ ప్రెసిడెంట్ లోరెన్ డ్రేయర్ మాట్లాడుతూ భారత్‌లో తమ కార్యకలాపాలను ప్రారంభించేందుకు ఇప్పటికే 20 గేట్‌వే సైట్‌లను, వందలాది యాంటెన్నాలను ఏర్పాటు చేశామని, భారత వినియోగదారుల డేటా ఏమాత్రం దేశ సరిహద్దులు దాటకుండా కఠినమైన సెక్యూరిటీ కంట్రోల్స్ అమలు చేస్తున్నామని వెల్లడించారు.
ఈ వార్తలు కూడా చదవండి:
శ్రీవారికి బంగారు పగడాల హారాల కానుక
Read Latest AP News And Telangana News