అంకితభావంతో పనిచేస్తే సామాన్య కార్యకర్త కూడా సీఎం కావచ్చు: డీకే

బెంగళూరు, మే 31: 'పార్టీ కోసం ప్రాణం పెట్టి, అంకితభావంతో పనిచేసే ఏ సామాన్య కార్యకర్త అయినా భవిష్యత్తులో ముఖ్యమంత్రి కావచ్చని కర్ణాటక కాంగ్రెస్ అధినేత, కాబోయే ముఖ్యమంత్రి డీకే శివకుమార్ చెప్పారు. కాంగ్రెస్ శాసనసభా పక్షం (CLP) నేతగా నిన్న ఏకగ్రీవంగా ఎన్నికైన ఆయన, ఇవాళ (ఆదివారం) బెంగళూరులో మీడియాతో మాట్లాడుతూ తన సుదీర్ఘ రాజకీయ ప్రస్థానాన్ని గుర్తుచేసుకుని భావోద్వేగానికి లోనయ్యారు.

తన రాజకీయ ప్రయాణం గురించి డీకే శివకుమార్ మాట్లాడుతూ, 'నేను 1979-80 కాలం నుంచి కాంగ్రెస్ పార్టీలో ఉన్నాను. ఒక సాధారణ విద్యార్థి నాయకుడిగా నా ప్రస్థానం మొదలైంది. ప్రతి స్కూల్, కాలేజీ నుంచి యువతను, కార్యకర్తలను పార్టీ వైపు నడిపించాను. ఈ రోజు నేను ఈ స్థాయికి రావడం కాంగ్రెస్ శ్రేణులందరికీ సంతోషాన్నిచ్చే విషయం. కష్టపడే గుణం ఉంటే నాలాంటి సామాన్య కార్యకర్త ఎవరైనా సీఎం కావచ్చు' అని కార్యకర్తల్లో కొత్త ఉత్సాహాన్ని నింపారు.

మరోవైపు, మూడు సంవత్సరాల పాటు కర్ణాటక ఉప ముఖ్యమంత్రిగా పనిచేసిన డీకే శివకుమార్, జూన్ 3న మధ్యాహ్నం బెంగళూరులోని లోక్ భవన్‌లో ముఖ్యమంత్రిగా ప్రమాణ స్వీకారం చేయనున్నారు. మే 28న సిద్ధరామయ్య స్వచ్ఛందంగా రాజీనామా చేయడంతో, మే 30న శివకుమార్ గవర్నర్ థావర్ చంద్ గెహ్లాట్‌ను కలిసి ప్రభుత్వం ఏర్పాటుకు అనుమతి కోరుతూ లేఖ సమర్పించిన సంగతి తెలిసిందే.

విరాట్ కోహ్లీ, ఆర్‌సీబీకి డీకే శుభాకాంక్షలు

రాజకీయాలతో పాటు క్రీడలపై తనకున్న ఆసక్తిని డీకే శివకుమార్ చాటుకున్నారు. ఐపీఎల్ (IPL) ఫైనల్ మ్యాచ్ జరుగుతున్న తరుణంలో, రాయల్ ఛాలెంజర్స్ బెంగళూరు (RCB) స్టార్ బ్యాటర్ విరాట్ కోహ్లీకి ఆయన ప్రత్యేకంగా అభినందనలు తెలిపారు. 'ఈ ఏడాది కూడా విరాట్ కోహ్లీ అద్భుతంగా ఆడారు. కర్ణాటక ప్రజల తరపున, కోట్లాది మంది ఆర్‌సీబీ అభిమానుల తరపున, కర్ణాటక ప్రభుత్వం తరపున నేను అతనికి హృదయపూర్వక శుభాకాంక్షలు తెలియజేస్తున్నాను.' అన్నారు.

ఇవి కూడా చదవండి..

టీఎంసీలో అంతర్గత కుమ్ములాటలే అభిషేక్ బెనర్జీపై దాడికి కారణం... బీజేపీ

పాక్ కుట్ర.. ఉగ్రవాదులకు సాయంగా భారత్‌లోకి టెలికం సిగ్నల్స్