మేనిఫెస్టో అమలుకు అత్యంత ప్రాధాన్యం: హిమంత బిశ్వ శర్మ

గువాహటి (అసోం), మే 11: రేపు (మే 12) ప్రమాణ స్వీకారం చేసిన తర్వాత, పార్టీ మేనిఫెస్టోను అమలు చేయడమే కొత్త ప్రభుత్వ ప్రధమ ప్రాధాన్యం అవుతుందని అస్సాం ముఖ్యమంత్రి హిమంత బిశ్వ శర్మ చెప్పారు. ఇవాళ ఆయన గువాహటిలో విలేకరులతో మాట్లాడారు. 'ప్రమాణ స్వీకారం చేసిన తర్వాత, మొదటి మంత్రివర్గ సమావేశాన్ని నిర్వహిస్తాం. మా మేనిఫెస్టోను అమలు చేయడమే మా మొట్టమొదటి ప్రాధాన్యం అవుతుంది.' అన్నారు.

ప్రమాణ స్వీకార కార్యక్రమంలో పాల్గొనడానికి ప్రధాని నరేంద్ర మోదీ ఈ రాత్రికి గౌహతికి చేరుకుంటారని హిమంత బిశ్వ శర్మ చెప్పారు. 'ప్రధాని ఈ రాత్రికి గౌహతికి చేరుకుంటారు. రేపు ఉదయం 11 గంటలకు, అస్సాంలో కొత్త ప్రభుత్వం ఏర్పాటవుతుంది. కేంద్ర హోం మంత్రి అమిత్ షా, రక్షణ మంత్రి రాజ్‌నాథ్ సింగ్, బీజేపీ అధ్యక్షుడు నితిన్ నబిన్, NDA పాలిత రాష్ట్రాల ముఖ్యమంత్రులు ఈ కార్యక్రమానికి హాజరుకానున్నారు. మా పార్టీ బూత్ స్థాయి కార్యకర్తలు సహా అనేక మంది ప్రజలు ఈ కార్యక్రమంలో పాల్గొంటారు.' అని శర్మ చెప్పారు.

రాష్ట్ర సర్వతోముఖాభివృద్ధి, నిరుద్యోగ నిర్మూలన, పేదరిక నిర్మూలన వంటి అంశాలకు పెద్దపీట వేస్తామని హిమంత వెల్లడించారు. పథకాల లబ్ధిని నేరుగా ప్రజలకు చేరవేసేలా పారదర్శకమైన పాలనను అందించడమే తమ లక్ష్యమని ఆయన పేర్కొన్నారు. గత ప్రభుత్వ హయాంలో చేపట్టిన అభివృద్ధి పనులను కొనసాగిస్తూనే, అస్సాం‌ను దేశంలోనే అగ్రగామి రాష్ట్రంగా నిలబెట్టడానికి కొత్త ప్రాజెక్టులను ప్రవేశపెడతామని హామీ ఇచ్చారు. రాష్ట్ర ఆర్థిక వ్యవస్థను బలోపేతం చేయడం, సామాజిక భద్రతను పెంపొందించడంపై కూడా ఈ కొత్త ప్రభుత్వం ప్రత్యేక దృష్టి పెట్టనుందని తెలిపారు.

ఈ వార్తనూ చదవండి:

ఇజ్రాయెల్‌కు షాకిచ్చిన హెజ్‌బొల్లా.. ఐరన్ డోమ్ యూనిట్ ధ్వంసం

భారత్‌కు పాక్ ఆర్మీ చీఫ్ వార్నింగ్