South Kashi Travel Guide: పుణ్యక్షేత్రాల మధ్య ప్రకృతి అందాలు.. పర్యాటకుల ప్యారడైస్గా తెన్ కాశీ..
ABN , Publish Date - Jan 08 , 2026 | 09:49 AM
‘సౌత్ కాశీ’గా పేరొందిన ఈ ప్రాంతం భక్తులకు మాత్రమే కాదు, ప్రకృతి ప్రేమికులకు కూడా స్వర్గధామంలా ఉంటుంది. పశ్చిమ కనుమల ఒడిలో ఉన్న ఈ అందమైన పట్టణం ప్రతి సీజన్లో పర్యాటకులను ఆకర్షిస్తూ ప్రత్యేక గుర్తింపు సంపాదించుకుంది.
ఇంటర్నెట్ డెస్క్: తమిళనాడులోని ముఖ్యమైన పర్యాటక ప్రాంతాల్లో తెన్ కాశి ప్రత్యేక స్థానం కలిగి ఉంది. పచ్చని కొండలు, చల్లని జలపాతాలు, ప్రకృతి అందాలు, పురాతన ఆలయాలతో ఈ ప్రాంతం పర్యాటకులను ఆకర్షిస్తుంది. ఆధ్యాత్మికత, సంస్కృతి కలగలిసిన ఈ ప్రాంతాన్ని ‘సౌత్ కాశీ’గా కూడా పిలుస్తారు. భక్తులు పెద్ద సంఖ్యలో దర్శించుకునే పవిత్ర క్షేత్రంగా తెన్ కాశి ప్రసిద్ధి చెందింది.
తిరునల్వేలి నుంచి సుమారు 56 కిలోమీటర్ల దూరంలో ఉన్న తెన్ కాశి, కొల్లం నుంచి 100 కిలోమీటర్లు, త్రివేండ్రం నుంచి 109 కిలోమీటర్లు, కన్యాకుమారి నుంచి 132 కిలోమీటర్లు, మధురై నుంచి 160 కిలోమీటర్లు, చెన్నై నుంచి సుమారు 625 కిలోమీటర్ల దూరంలో ఉంది. మధురై–కొల్లం జాతీయ రహదారికి సమీపంలో ఉండటంతో రోడ్డు మార్గంలో చేరుకోవడం సులభం.
తెన్ కాశి ప్రాంతాన్ని మూడు వైపులా పశ్చిమ కనుమలు చుట్టుముట్టి ఉంటాయి. అందుకే ఇక్కడ అనేక జలపాతాలు, అరణ్య ప్రాంతాలు కనిపిస్తాయి. కాశీ విశ్వనాథ స్వామి ఆలయం, కులశేఖరనాథ ఆలయం, కన్నై మారమ్మన్ ఆలయం వంటి పుణ్యక్షేత్రాలు ఇక్కడ ఉన్నాయి. కౌట్రాళం వాటర్ ఫాల్స్ ఈ ప్రాంతానికి ముఖ్య ఆకర్షణ. అలాగే ఫైవ్ ఫాల్స్, తిరుమలాయ్ కోవిల్, మనిముతార్ డ్యామ్, చితిరి సభై ఆలయం, మనిముతార్ జలపాతం, తెన్ కాశి కోట, అగస్తియార్ ఫాల్స్, గుండార్ డ్యామ్, కన్నుప్పులి మెట్టు జలపాతం, కరుప్పానది డ్యామ్, అడవినైనార్ డ్యామ్ వంటి అనేక సందర్శనీయ ప్రదేశాలు ఉన్నాయి.
తెన్ కాశి చేరడం ఎలా?
తెలుగు రాష్ట్రాల నుంచి నేరుగా తెన్ కాశికి రైళ్లు లేవు. ముందుగా చెన్నై లేదా మధురై చేరాలి. చెన్నై నుంచి తెన్ కాశికి నేరుగా రైళ్లు, బస్సులు అందుబాటులో ఉంటాయి. మధురై నుంచి కూడా బస్సులు, ట్రైన్లు సులభంగా లభిస్తాయి. తెలుగు రాష్ట్రాల నుంచి వచ్చే బస్సులు సాధారణంగా చెన్నైలోని మాధవరం బస్ స్టాండ్లో ఆగుతాయి. అక్కడి నుంచి తెన్ కాశికి కనెక్టింగ్ బస్సులు అందుబాటులో ఉంటాయి. విమాన మార్గంలో రావాలనుకునేవారికి మధురై విమానాశ్రయం సమీపంలో ఉంది. అక్కడి నుంచి రోడ్డు మార్గం లేదా రైలు ద్వారా తెన్ కాశికి చేరుకోవచ్చు.
(Note: ఇందులోని సమాచారం ఇంటర్నెట్ ఆధారంగా మీకు అందించడం జరుగుతుంది. కేవలం మీ అవగాహన కోసమే.. ABN ఆంధ్రజ్యోతి దీనిని ధ్రువీకరించలేదు)
Also Read:
ఆఫీసులో ఈ 4 రకాల వ్యక్తులు ఎక్కువగా నష్టపోతారు..
For More Latest News
