Hyderabad Famous Temples: హైదరాబాద్‌లో తప్పక దర్శించాల్సిన ప్రసిద్ధ ఆలయాలు ఇవే..

ఇంటర్నెట్ డెస్క్: హైదరాబాద్ నగరం కేవలం ఐటీ హబ్ గానే కాకుండా, ఆధ్యాత్మికంగా కూడా ఎంతో ప్రసిద్ధి చెందిన నగరం. కొండలపై ఉన్న దేవాలయాల నుంచి ప్రశాంతమైన కాలనీల్లోని చిన్న ఆలయాల వరకు.. నగరమంతా భక్తి భావంతో నిండి ఉంటుంది. ఇవి కేవలం ప్రార్థనా స్థలాలు మాత్రమే కాకుండా, ప్రజలకు శాంతి, విశ్వాసం, మనశ్శాంతిని అందించే కేంద్రాలు. అయితే, హైదరాబాద్‌లో తప్పక సందర్శించాల్సిన ముఖ్యమైన దేవాలయాలు కొన్ని ఉన్నాయి. అవేంటో ఇప్పుడు తెలుసుకుందాం..

బిర్లా మందిర్..

హుస్సేన్ సాగర్ సమీపంలోని కొండపై ఉన్న బిర్లా మందిర్ హైదరాబాద్‌లో అత్యంత ప్రసిద్ధ ఆలయాల్లో ఒకటి. తెల్లని పాలరాయితో నిర్మించిన ఈ ఆలయం ఉదయం, సాయంత్రం వేళల్లో ఎంతో ఆహ్లాదంగా ఉంటుంది. ఇక్కడి నుంచి భాగ్యనగరం అద్భుతంగా కనిపిస్తుంది.

చిలుకూరు బాలాజీ ఆలయం..

నగర శివార్లలో ఉన్న చిలుకూరు బాలాజీ టెంపుల్ కోరికలు తీర్చే ఆలయంగా ప్రసిద్ధి. ముఖ్యంగా విదేశీ ప్రయాణాల సంబంధించిన కోరికల కోసం భక్తులు ఎక్కువగా వస్తారు. ఈ ఆలయంలో విరాళాలు స్వీకరించరు. క్రమశిక్షణతో చేసే ప్రదక్షిణలకు ఈ ఆలయం పేరుగాంచింది.

జూబ్లీహిల్స్ వెంకటేశ్వర స్వామి ఆలయం..

జూబ్లీహిల్స్ వెంకటేశ్వర స్వామి ఆలయం, తిరుమల తిరుపతి దేవస్థానం (TTD) నిర్మించిన ఒక అందమైన 'మినీ తిరుపతి'. ఇది జూబ్లీహిల్స్ రోడ్ నెం. 92లోని చిన్న కొండపై ఉంది. తిరుపతి ఆలయ నిర్మాణ శైలిని పోలి ఈ ఆలయ నిర్మాణం ఉంటుంది.

జగన్నాథ ఆలయం, బంజారా హిల్స్

ఎర్ర ఇసుకరాయితో నిర్మించిన ఈ ఆలయం చూడడానికి చాలా అందంగా ఉంటుంది. రోడ్ నెం. 12లో, KBR పార్క్ సమీపంలో ఉన్న ఈ ఆలయం పండుగల సమయంలో భక్తులతో కిటకిటలాడుతుంది. ఇది పూరీ జగన్నాథ ఆలయ శైలిలో నిర్మించబడింది. ముఖ్యంగా రథయాత్రకు చాలా ప్రసిద్ధి చెందింది.

ఇస్కాన్ టెంపుల్

హైదరాబాద్‌లోని ఇస్కాన్ దేవాలయం నాంపల్లిలో ఉంది. ఇది ఆధునిక, సంప్రదాయ నిర్మాణ శైలుల కలయికతో ఉంటుంది. ఆధ్యాత్మిక అనుభూతిని పొందేందుకు, ప్రశాంతతను వెతుక్కునే వారికి ఇది సరైన ప్రదేశం.

Also Read:

విజయవాడ - హైదరాబాద్ హైవేపై భారీ రద్దీ.. పోలీసుల చర్యలివే..

మీ గుండె బలంగా ఉందో లేదో ఇలా తెలుసుకోండి..

For More Latest News