తిరుపతి నుంచి వారణాసి వరకు.. పుణ్యక్షేత్రాలకు పరుగులు తీస్తున్న Gen Z

ఇంటర్నెట్ డెస్క్: యువత సాధారణంగా గోవా, యూరప్ వంటి వినోదభరిత ప్రదేశాలనే ఇష్టపడతారని, ఆధ్యాత్మిక యాత్రలు కేవలం పెద్దవాళ్లు మాత్రమే చేస్తారని చాలామంది అనుకుంటారు. కానీ ఇప్పుడు ఆ అభిప్రాయం మారుతోంది. భారతదేశంలో జెన్ జెడ్ యువత బీచ్‌లు, పార్టీలు వంటి వినోద ప్రదేశాలకంటే ఆధ్యాత్మిక ప్రదేశాలకు ఎక్కువగా వెళ్తున్నారు. ప్రశాంతత కోసం తిరుపతి, రిషికేశ్, వారణాసి వంటి ప్రాంతాలను ఎంపిక చేసుకుంటున్నారు. 2026 సంవత్సరంలో ఆధ్యాత్మిక ప్రదేశాలకు వెళ్లే వారిలో 53 శాతం కంటే ఎక్కువ మంది జెన్ జెడ్ యువతే ఉన్నారని ఓ నివేదిక తెలిపింది.

భారతదేశంలో ఆధ్యాత్మిక పర్యాటకంలో జెన్ జెడ్ యువత ముందంజలో ఉన్నారు. వీరిలో ఎక్కువ మంది యువకులు కాగా, కొంతమంది యువతులు కూడా ఉన్నారు. యువత ఇప్పుడు కేవలం వినోదం కోసం కాకుండా, ఆధ్యాత్మిక అనుభవం, సంస్కృతి తెలుసుకోవడం, మనశ్శాంతి కోసం యాత్రలు చేస్తున్నారు. తిరుపతి.. యువతకు అత్యంత ప్రాధాన్యమైన ఆధ్యాత్మిక గమ్యస్థానంగా మారింది. బెంగళూరు–తిరుపతి, హైదరాబాద్–తిరుపతి మార్గాల్లో యువ ప్రయాణికుల సంఖ్య ఎక్కువగా పెరుగుతోంది. లక్షలాది మంది యువత తిరుమల శ్రీ వేంకటేశ్వర స్వామి దర్శనానికి వెళ్తున్నారు.

తిరుపతి తర్వాత రిషికేశ్, తంజావూరు, వారణాసి, ఉజ్జయిని, నాందేడ్ వంటి పుణ్యక్షేత్రాలకు కూడా యువత ఎక్కువగా వెళ్తున్నారు. యోగా, ధ్యానం కోసం ప్రసిద్ధి చెందిన రిషికేశ్‌కు వెళ్లే వారిలో సుమారు 59 శాతం మంది జెన్ జెడ్ యువతే ఉన్నారు. అలాగే ఉజ్జయినిలోని మహాకాళేశ్వర ఆలయం, వారణాసి కాశీ విశ్వనాథ ఆలయం, అయోధ్య, పూరీ జగన్నాథ ఆలయం వంటి ప్రదేశాలు కూడా యువతను ఎక్కువగా ఆకర్షిస్తున్నాయి.

2033 నాటికి భారతదేశ ఆధ్యాత్మిక పర్యాటక రంగం పెద్ద స్థాయిలో అభివృద్ధి చెందుతుందని నిపుణులు అంచనా వేస్తున్నారు. యువతలో ఆధ్యాత్మిక యాత్రలపై పెరుగుతున్న ఆసక్తి ఒక కొత్త సాంస్కృతిక మార్పుగా భావిస్తున్నారు. వినోదంతో పాటు విశ్వాసం, సంప్రదాయం, ఆత్మశాంతి కోసం యువత ఈ యాత్రలను ఎంచుకుంటున్నారు. డిజిటల్ ప్లాట్‌ఫారమ్‌లు, సోషల్ మీడియా, ఆన్‌లైన్ బుకింగ్ సౌకర్యాలు ఈ మార్పును మరింత వేగవంతం చేస్తున్నాయి.

Also Read:

విండ్ చైమ్.. ఈ ప్రదేశాల్లో అస్సలు పెట్టకండి

ఫిట్‌నెస్ కోసం భోజనం మానేస్తున్నారా? జాగ్రత్త..