ఫర్నిచర్‌కు చెదలు పట్టిందా? ఈ ఇంటి చిట్కాలు ట్రై చేయండి

ఇంటర్నెట్ డెస్క్: చెక్క ఫర్నిచర్‌కు చెదలు పట్టడం చాలా మందిని ఇబ్బంది పెట్టే సాధారణ సమస్య. ముఖ్యంగా, తేమ ఎక్కువగా ఉన్న సమయంలో చెదలు వేగంగా పెరిగి చెక్కను లోపల నుంచే పాడుచేస్తాయి. సమస్యను ఆలస్యంగా గుర్తిస్తే ఫర్నిచర్‌కు భారీ నష్టం కలిగే అవకాశం ఉంటుంది. అయితే, కొన్ని సులభమైన ఇంటి చిట్కాలను పాటించడం ద్వారా చెదల సమస్యను చాలా వరకు తగ్గించవచ్చు.

వేప నూనె ఉపయోగించండి

చెదలను దూరం చేయడంలో వేప నూనె బాగా ఉపయోగపడుతుంది. ఇందులో సహజ కీటకనాశక గుణాలు ఉంటాయి. దూది లేదా స్ప్రే బాటిల్ సహాయంతో చెదలు పట్టిన ప్రదేశాల్లో వేప నూనె రాయాలి. ఇలా కొన్ని రోజులు చేస్తే మంచి ఫలితం కనిపిస్తుంది.

వెనిగర్, నిమ్మరసం మిశ్రమం

తెల్ల వెనిగర్‌లో కొద్దిగా నిమ్మరసం కలిపి చెదలు ఉన్న ప్రదేశాల్లో స్ప్రే చేయాలి. ఈ మిశ్రమం చిన్నస్థాయి చెదల సమస్యను తగ్గించడంలో సహాయపడుతుంది.

ఫర్నిచర్‌ను ఎండలో పెట్టండి

చెదలు ఎక్కువగా తేమ ఉన్న ప్రదేశాల్లో పెరుగుతాయి. చిన్న ఫర్నిచర్ అయితే కొన్ని గంటల పాటు నేరుగా ఎండలో ఉంచడం మంచిది. ఎండ వేడి వల్ల చెదలు తగ్గే అవకాశం ఉంటుంది.

ఉప్పు నీటి ద్రావణం

ఉప్పు నీటిని తయారు చేసి చెదలు పట్టిన చోట స్ప్రే చేయాలి. ఇది కూడా చాలామంది ఉపయోగించే సులభమైన ఇంటి చిట్కా.

కార్డ్‌బోర్డ్ ట్రిక్

తడిగా ఉన్న కార్డ్‌బోర్డ్ చెదలను ఆకర్షిస్తుంది. చెదలు దానిపై చేరిన తర్వాత ఆ కార్డ్‌బోర్డ్‌ను బయటకు తీసి నాశనం చేస్తే సమస్య కొంత వరకు తగ్గుతుంది.

శుభ్రత చాలా ముఖ్యం

ఇంటిని, ముఖ్యంగా చెక్క ఫర్నిచర్‌ను ఎప్పటికప్పుడు శుభ్రంగా ఉంచాలి. తేమ లేకుండా చూసుకోవడం వల్ల చెదలు పెరగకుండా ఉంటుంది.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

సిగరెట్లు తాగకపోయినా పెదాలు నల్లగా ఉన్నాయా? ఈ చిట్కాలు ట్రై చేయండి

రాగి బాటిల్‌లో నీళ్లు తాగుతున్నారా? ఈ తప్పులు మాత్రం చేయొద్దు