ఈ తప్పులు చేస్తే ఫోన్ పేలిపోవచ్చు.. జాగ్రత్త

ఇంటర్నెట్ డెస్క్: ఈ రోజుల్లో మొబైల్ ఫోన్‌లు మన జీవితంలో భాగంగా మారాయి. కాల్స్ చేయడం నుంచి ఇంటర్నెట్ వినియోగం, ఆన్‌లైన్ చెల్లింపుల వరకు చాలా పనులు మొబైల్ ద్వారానే జరుగుతున్నాయి. అయితే మొబైల్ వినియోగం పెరుగుతున్న కొద్దీ భద్రతపై మాత్రం చాలామంది పెద్దగా దృష్టి పెట్టడం లేదు. ఇటీవలి కాలంలో మొబైల్ ఫోన్ పేలిన ఘటనలు కూడా కొన్ని చోట్ల చోటుచేసుకుంటున్నాయి. ఇలాంటి ప్రమాదాలు ఒక్కసారిగా జరగవు. చాలా సందర్భాల్లో మనం చేసే చిన్న చిన్న అజాగ్రత్తల వల్లే ఇవి జరుగుతాయి. కాబట్టి కొన్ని విషయాల్లో జాగ్రత్తలు తీసుకుంటే మొబైల్ పేలుళ్ల ప్రమాదాన్ని చాలా వరకు తగ్గించుకోవచ్చు.

డూప్లికేట్ ఛార్జర్ ఉపయోగించడం

మొబైల్ ఫోన్‌కు కంపెనీ ఇచ్చిన అసలు ఛార్జర్‌ను ఉపయోగించడం చాలా ముఖ్యం. డూప్లికేట్ లేదా లోకల్ ఛార్జర్‌లు వోల్టేజ్, కరెంట్‌ను సరిగా నియంత్రించలేవు. దీంతో బ్యాటరీపై ఒత్తిడి పెరిగి అది ఎక్కువగా వేడెక్కే అవకాశం ఉంటుంది. ఇది చివరకు ప్రమాదానికి దారితీయవచ్చు.

ఛార్జింగ్ సమయంలో ఫోన్ ఉపయోగించడం

మొబైల్ ఫోన్ ఛార్జింగ్‌లో ఉండగా ఎక్కువసేపు ఉపయోగించడం కూడా ప్రమాదకరం. ముఖ్యంగా గేమ్స్ ఆడటం, వీడియోలు చూడటం లేదా ఎక్కువసేపు కాల్స్‌లో మాట్లాడటం వల్ల బ్యాటరీ ఉష్ణోగ్రత వేగంగా పెరుగుతుంది. ఛార్జింగ్‌ సమయంలో ఫోన్ ఎక్కువగా ఉపయోగిస్తే బ్యాటరీ మరింత వేడెక్కి ప్రమాదం పెరిగే అవకాశం ఉంటుంది.

అలాగే, ఫోన్ ఛార్జ్ చేస్తున్నప్పుడు దిండు కింద, మంచం మీద లేదా గాలి సరిగా రాని ప్రదేశాల్లో పెట్టడం మంచిది కాదు. ఇలా చేస్తే ఫోన్ నుంచి వచ్చే వేడి బయటకు వెళ్లకుండా లోపలే నిలిచిపోతుంది. దీంతో బ్యాటరీ వేడెక్కి ప్రమాదం ఏర్పడే అవకాశం ఉంటుంది.

దెబ్బతిన్న బ్యాటరీని ఉపయోగించడం

ఉబ్బిన లేదా దెబ్బతిన్న బ్యాటరీని ఉపయోగించడం చాలా ప్రమాదకరం. బ్యాటరీలో చిన్న లోపం ఉన్నా అది పెద్ద ప్రమాదానికి కారణమవుతుంది. అలాంటి బ్యాటరీని వెంటనే మార్చించడం మంచిది.

రాత్రంతా ఛార్జ్‌లో పెట్టడం

చాలా మంది మొబైల్‌ను రాత్రంతా ఛార్జ్‌లో పెట్టి నిద్రపోతారు. దీని వల్ల ఓవర్ ఛార్జింగ్ జరిగి బ్యాటరీ పనితీరు తగ్గే అవకాశం ఉంది. దీర్ఘకాలంలో ఇది బ్యాటరీ దెబ్బతినడానికి, కొన్ని సందర్భాల్లో ప్రమాదాలకు కూడా కారణమవుతుంది. మొత్తానికి, ఈ చిన్న చిన్న జాగ్రత్తలు పాటిస్తే మొబైల్ ఫోన్‌ను సురక్షితంగా ఉపయోగించుకోవచ్చు. ప్రమాదాలను నివారించవచ్చని నిపుణులు సూచిస్తున్నారు.

Also Read

వేసవిలో బయటకు వెళ్లే ముందు ఈ స్కిన్‌కేర్ తప్పనిసరి

బొప్పాయి తినడానికి సరైన సమయం తెలుసా?

For More Latest News