జీలకర్ర మంచిదో కాదో.. ఇలా సింపుల్‌గా తెలుసుకోండి

ఇంటర్నెట్ డెస్క్: జీలకర్ర భారతీయ వంటల్లో తప్పనిసరిగా ఉపయోగించే మసాలా దినుసు. కూరలు, పప్పులు, మసాలా వంటకాలు, కషాయాలు ఇలా ఎన్నో వంటల్లో దీనిని ఉపయోగిస్తారు. అయితే ఇటీవల మార్కెట్లో కల్తీ జీలకర్ర విక్రయాలు పెరుగుతున్నాయి. ఇలాంటి జీలకర్ర.. ఆహారం రుచిని మాత్రమే కాదు, ఆరోగ్యాన్ని కూడా దెబ్బతీయవచ్చు. అందుకే మీరు కొనుగోలు చేసే జీలకర్ర అసలైనదా, కల్తీదా ఇలా సులభంగా తెలుసుకోవచ్చు.

వాసన, రంగును పరిశీలించాలి

అసలైన జీలకర్రకు సహజమైన ఘాటైన సువాసన ఉంటుంది. కల్తీ జీలకర్రకు వాసన చాలా తక్కువగా ఉంటుంది లేదా రసాయనాల వాసన వస్తుంది. అలాగే మంచి జీలకర్ర గింజలు ఒకే ఆకారంలో, లేత గోధుమ రంగులో కనిపిస్తాయి. కల్తీ జీలకర్ర గింజలు అసమాన ఆకారంలో ఉండి, మరీ ముదురు రంగులో కనిపించే అవకాశం ఉంది.

చేతుల్లో రుద్ది చూడాలి

కొన్ని జీలకర్ర గింజలను అరచేతుల్లో పెట్టుకుని బాగా రుద్దండి. రుద్దిన తర్వాత కూడా సహజమైన సువాసన వస్తే అవి మంచి నాణ్యత కలిగిన జీలకర్రగా భావించవచ్చు. ఒకవేళ చేతులకు నల్లటి రంగు అంటుకోవడం లేదా రసాయన వాసన రావడం గమనిస్తే, అలాంటి జీలకర్రను ఉపయోగించకపోవడమే మంచిది.

కొనుగోలు సమయంలో జాగ్రత్తలు

జీలకర్ర కొనుగోలు చేసే ముందు ప్యాకెట్‌పై తయారీ తేదీ, గడువు తేదీ, నాణ్యత గుర్తులు, FSSAI లోగో వంటి వివరాలను తప్పకుండా పరిశీలించాలి. చాలా తక్కువ ధరకు విక్రయించే జీలకర్ర విషయంలో అప్రమత్తంగా ఉండాలి. ఎప్పుడూ విశ్వసనీయ బ్రాండ్లు లేదా నమ్మకమైన దుకాణాల నుంచే కొనుగోలు చేయడం మంచిది.

నీటిలో పరీక్షించాలి

ఒక గ్లాసు నీటిలో ఒక చెంచా జీలకర్ర వేసి కొద్దిసేపు గమనించాలి. అసలైన జీలకర్ర బరువుగా ఉండటంతో సాధారణంగా అడుగుకు చేరుతుంది. ఒకవేళ ఇతర కల్తీ పదార్థాలు కలిపి ఉంటే అవి నీటిపై తేలుతాయి. అలాగే నీటి రంగు వెంటనే మారితే, జీలకర్రకు కృత్రిమ రంగులు వేసి ఉండే అవకాశం ఉంది. ఈ చిన్నచిన్న జాగ్రత్తలు పాటిస్తే కల్తీ జీలకర్రను సులభంగా గుర్తించి, మీ కుటుంబ ఆరోగ్యాన్ని కాపాడుకోవచ్చు.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

రెడీమేడ్ అల్లం-వెల్లుల్లి పేస్ట్‌కు గుడ్‌బై.. ఇంట్లోనే ఇలా తయారు చేసుకోండి

IRCTC అదిరిపోయే టూర్ ప్యాకేజీ..ఒకే ట్రిప్‌లో 6 ప్రముఖ పుణ్యక్షేత్రాలు..