Share News

శాంతిస్థాపనకు ఏదైనా చేయాల్సిందే.. జిన్‌పింగ్‌, పుతిన్‌తో ట్రంప్ కామెంట్

ABN , Publish Date - Nov 19 , 2026 | 02:51 PM

షెన్‌జెన్ వేదికగా అమెరికా అధ్యక్షుడు డొనాల్డ్ ట్రంప్, చైనా అధినేత షీ జిన్‌పింగ్, రష్యా అధినేత వ్లాదిమిర్ పుతిన్‌ల సమావేశం ప్రారంభమైంది.

శాంతిస్థాపనకు ఏదైనా చేయాల్సిందే.. జిన్‌పింగ్‌, పుతిన్‌తో ట్రంప్ కామెంట్
USA, China, Russia Trilateral Meeting

ఇంటర్నెట్ డెస్క్: షెన్‌జెన్ వేదికగా అమెరికా అధ్యక్షుడు డొనాల్డ్ ట్రంప్, చైనా అధినేత షీ జిన్‌పింగ్, రష్యా అధినేత వ్లాదిమిర్ పుతిన్‌ల సమావేశం ప్రారంభమైంది. గ్లోబల్ పవర్స్‌గా పేరుపడ్డ ఈ దేశాల మధ్య జరుగుతున్న తొలి త్రైపాక్షిక సమావేశం ఇది. తాము కలిసి చర్చలకు కూర్చుకోవడం ఇదే తొలిసారని చైనా అధినేత షీ జిన్‌పింగ్ ఈ సందర్భంగా పేర్కొన్నారు. ఈ మీటింగ్‌కు ఎంతో ప్రాధాన్యం ఉందని అన్నారు. భేదాభిప్రాయలు ఉన్న దేశాలతో నేరుగా చర్చలు జరిపేలా కొత్త విదేశాంగ విధానాన్ని అనుసరిస్తున్నామని ట్రంప్ తెలిపారు.


మనకు ఆ సంకోచం వద్దు: ట్రంప్

‘మూడు అతిపెద్ద దేశాల అధినేతలుగా పారదర్శకమైన, గౌరవప్రదమైన, నిర్మాణాత్మకమైన చర్చలు జరపాల్సిన బాధ్యత మనపై ఉంది. యావత్ ప్రపంచంపైనా ప్రభావం చూపే అంశాల విషయంలో నిర్మాణాత్మకంగా ఉండాలి. విభేదాలు ఉన్న దేశాలతో నేరుగా చర్చలు జరిపేందుకు గత పాలకులు సంకోచించేవారు. కానీ మన ఆలోచన భిన్నమైనది’ అని అన్నారు. పరస్పర సహకారానికి, చర్చలకు ఉన్న అవకాశాలు కాదనుకున్నాక శాంతి స్థాపన సాధ్యం కాదని కూడా ట్రంప్‌ అన్నారు.

పరస్పర సహకారం ఉండాలి: షీ జిన్‌పింగ్

మూడు దేశాల మధ్య సహకారం పెరగాలని చైనా అధినేత జిన్‌పింగ్ కూడా అన్నారు. గ్లోబల్ శక్తుల మధ్య సానుకూల వాతావరణం తప్పనిసరి అని అన్నారు. ప్రపంచమే ఓ గ్రామంగా మారిపోయిందని అన్నారు. అందరి జీవితాలు ఒకదానితో మరొకటి ముడిపడి ఉన్నాయని చెప్పారు.


మానవాళి పట్ల శక్తిమంతమైన దేశాలకు ప్రత్యేక బాధ్యత ఉందని కూడా చైనా అధినేత వ్యాఖ్యానించారు. రష్యాతో తమకు ప్రత్యేక బంధం ఉందని అన్నారు. అమెరికాతో కూడా స్థిరమైన దౌత్యబంధం కోసం కృషి చేస్తున్నామని చెప్పారు. షెన్‌జెన్‌లోని కైలిన్ విల్లాలో ఈ సమావేశం జరుగుతోంది. మీటింగ్‌కు మునుపు ట్రంప్, జిన్‌పింగ్, పుతిన్‌లు కలిసి ఫొటో దిగారు.


ఉక్రెయిన్‌తో అందరి ప్రయోజనాలు ముడిపడి ఉన్నాయి: పుతిన్

రష్యా, చైనా, అమెరికా మధ్య సహకారం పెరిగితే అది ప్రపంచ భద్రతకు ప్రయోజనం చేకూరుస్తుందని రష్యా అధ్యక్షుడు పుతిన్ అన్నారు. అయితే, ఈ దిశగా మూడు దేశాలు నిర్మాణాత్మక కృషి చేస్తే ఇదంతా సాధ్యమవుతుందని చెప్పారు. ప్రపంచంలో శాంతిస్థాపనలో అర్థవంతమైన పాత్రపోషించాలని చెప్పారు. ఉక్రెయిన్ యుద్ధం పరిష్కారంతో అందరికీ ప్రయోజనం కలుగుతుందని చెప్పారు.

ఈ వార్తలనూ చదవండి:

ఇరాన్ యుద్ధంపై జేడీ వాన్స్ విమర్శలు.. ట్రంప్ ఆగ్రహం..

బంగ్లాదేశ్‌లో మళ్లీ భగ్గుమన్న హింస.. మహమ్మద్ యూనస్ పూర్వీకుల ఇంటికి నిప్పు!

Updated Date - Nov 19 , 2026 | 03:17 PM