హోర్ముజ్ జలసంధిపై ట్రంప్ హెచ్చరికలతో గ్లోబల్ ట్రేడ్‌పై చైనా ఆందోళన

ఆంధ్రజ్యోతి, ఏప్రిల్ 13: ప్రపంచ ఇంధన రవాణాకు అత్యంత కీలకమైన హోర్ముజ్ జలసంధి (Strait of Hormuz) కేంద్రంగా అమెరికా-ఇరాన్ మధ్య ఉద్రిక్తతలు పతాక స్థాయికి చేరుకున్నాయి. అమెరికా అధ్యక్షుడు డొనాల్డ్ ట్రంప్ ఈ జలసంధిపై నౌకాదళ దిగ్బంధనాన్ని (Naval Blockade) ప్రకటిస్తామని హెచ్చరించడం అంతర్జాతీయంగా కలకలం రేపుతోంది. దీనిపై చైనా తీవ్రంగా స్పందిస్తూ, అంతర్జాతీయ వాణిజ్యానికి ఆటంకం కలగకుండా అడ్డంకులు లేని మార్గాన్ని కొనసాగించాలని పిలుపునిచ్చింది.

ఇరాన్‌తో జరుగుతున్న శాంతి చర్చలు విఫలం కావడంతో, ట్రంప్ అడ్మినిస్ట్రేషన్ కఠిన నిర్ణయాల వైపు అడుగులు వేసిన సంగతి తెలిసిందే. ఇరాన్ ఓడ రేవులకు వెళ్లే లేదా అక్కడి నుంచి వచ్చే నౌకలను అడ్డుకుంటామని ట్రంప్ సోషల్ మీడియా వేదికగా ప్రకటించారు. ఇరాన్ అంతర్జాతీయ చమురు సరఫరాను అడ్డుకుంటూ ప్రపంచాన్ని బెదిరిస్తోందని ట్రంప్ ఆరోపిస్తున్నారు. అమెరికా సెంట్రల్ కమాండ్ (CENTCOM) ఇప్పటికే ఇరాన్ తీర ప్రాంతాల్లో దిగ్బంధనాన్ని అమలు చేసేందుకు సిద్ధమవుతోంది.

చైనా విదేశాంగ శాఖ ప్రతినిధి గువో జియాకున్ బీజింగ్‌లో జరిగిన సమావేశంలో ఈ విషయంపై స్పందించారు. హోర్ముజ్ జలసంధి కేవలం ఒక ప్రాంతానికి సంబంధించినది కాదని, ఇది ప్రపంచ వాణిజ్యం , ఇంధన భద్రతకు వెన్నెముక అని పేర్కొన్నారు. ఉద్రిక్తతలు తగ్గించి, అన్ని పక్షాలు శాంతియుతంగా చర్చల ద్వారా సమస్యను పరిష్కరించుకోవాలని కోరారు. ప్రపంచవ్యాప్తంగా చమురు సరఫరాలో దాదాపు ఐదింట ఒక వంతు ఈ జలసంధి ద్వారానే జరుగుతుంది. ఒకవేళ ఇక్కడ దిగ్బంధనం జరిగితే చమురు ధరలు ఆకాశాన్ని తాకుతాయని, ఇది ప్రపంచ ఆర్థిక వ్యవస్థను దెబ్బతీస్తుందని చైనా హెచ్చరించింది.

మరోవైపు, చైనా.. ఇరాన్‌కు ఆయుధాలు సరఫరా చేస్తోందన్న ఆరోపణల నేపథ్యంలో, ట్రంప్.. చైనాపై 50 శాతం టారిఫ్‌లు విధిస్తామని బెదిరించారు. అదే సమయంలో, ఇరాన్ నుంచి చమురు కొనడం మానేస్తే, అమెరికా లేదా వెనిజులా నుంచి తక్కువ ధరకు చమురు సరఫరా చేస్తామని కూడా ట్రంప్ ఒక ఆఫర్ ఇచ్చారు.

ప్రస్తుతం హోర్ముజ్ జలసంధిలో నెలకొన్న అనిశ్చితి వల్ల గ్లోబల్ మార్కెట్లు ఒడుదుడుకులకు లోనవుతున్నాయి. చైనా ఈ విషయంలో తలదూర్చడం వల్ల, రానున్న రోజుల్లో అమెరికా తన దిగ్బంధన నిర్ణయాన్ని ఎంతవరకు అమలు చేస్తుందనేది ఆసక్తికరంగా మారింది.

ఇవి కూడా చదవండి

క్రూడాయిల్ పైకి.. స్టాక్ మార్కెట్లు కిందకి..

జీవితం నాశనం చేసే అలవాట్లు ఇవే.. ప్రతి పురుషుడు తప్పక తెలుసుకోవాల్సినవి