కాళ్లు, చేతులు తిమ్మిర్లు.. ఈ చిట్కాలతో సులువుగా తగ్గించుకోవచ్చు!

ఇంటర్నెట్ డెస్క్: నేటి ఉరుకుల పరుగుల జీవితంలో చాలామంది ఎదుర్కొంటున్న సాధారణ ఆరోగ్య సమస్యల్లో 'తిమ్మిర్లు' ఒకటి. ఒక్కోసారి కాసేపు కూర్చొని లేచినా లేదా రాత్రి నిద్రలోనైనా హఠాత్తుగా కాళ్లు, చేతులు మొద్దుబారిపోయినట్లు అనిపిస్తుంటాయి. ఇలా తిమ్మిర్లు రావడమనేది సాధారణంగా రక్త ప్రసరణ సరిగ్గా జరగకపోవడం వల్ల లేదా నరాలు ఒత్తిడికి గురైనప్పుడు జరుగుతుంది. దీనికి గల కారణాలు కొన్ని నివారణ మార్గాలను గురించి తెలుసుకుందాం..

తిమ్మిర్లు రావడానికి ప్రధాన కారణాలు:

నరాలపై ఒత్తిడి:

ఒకే స్థితిలో ఎక్కువ సేపు కూర్చోవడం లేదా పడుకోవడం వల్ల నరాలపై ఒత్తిడి పడి మెదడుకు చేరే సంకేతాలు తాత్కాలికంగా ఆగిపోతాయి. దీనివల్ల ఆ భాగం మొద్దుబారుతుంది.

పోషకాహార లోపం:

శరీరంలోని నరాలు ఆరోగ్యంగా పనిచేయడానికి విటమిన్ B12, B6, మెగ్నీషియం ఎంతో అవసరం. వీటి లోపం ఏర్పడినప్పుడు నరాలు బలహీనపడి తిమ్మిర్లు వస్తుంటాయి.

మధుమేహం:

రక్తంలో చక్కెర స్థాయిలు దీర్ఘకాలం పాటు అదుపులో లేకపోతే, అది నరాల వ్యవస్థను దెబ్బతీస్తుంది. దీనిని 'డయాబెటిక్ న్యూరోపతి' అంటారు.

రక్త ప్రసరణ సమస్యలు:

శరీరంలోని చివరి భాగాలకు(చేతి వేళ్లు, కాలి వేళ్లు) రక్త సరఫరా సరిగ్గా జరగనప్పుడు కూడా తిమ్మిర్లు రావచ్చు.

వెన్నెముక సమస్యలు:

మెడ లేదా నడుము భాగంలో వెన్నుపూసల మధ్య నరాలు నొక్కుకుపోయినప్పుడు, ఆ నరం ప్రవహించే చెయ్యి లేదా కాలికి అంతా తిమ్మిర్లు పడుతుంటాయి.

నివారణకు చిట్కాలు:

వ్యాయామం:

రోజూ కనీసం 30 నిమిషాల నడక లేదా యోగా చేయడం వల్ల రక్త ప్రసరణ మెరుగుపడుతుంది. ముఖ్యంగా స్ట్రెచింగ్ వ్యాయామాలు తిమ్మిర్లను తగ్గిస్తాయి.

పోషకాహారం:

రాగిజావలో కాల్షియం, ఐరన్ సమృద్ధిగా ఉంటాయి. ఇవి ఎముకలు, నరాలకు శక్తినిస్తాయి. అరటిపండు(పొటాషియం కోసం), ఖర్జూరం, ఆకుకూరలు తీసుకోవాలి.

నీరు ఎక్కువగా తాగడం:

రోజుకు కనీసం 3-4 లీటర్ల నీరు తాగాలి. ఇది కండరాలు, నరాలు సాఫీగా పనిచేయడానికి సహాయపడుతుంది.

గోరువెచ్చని నూనె మర్దన:

తిమ్మిర్లు వచ్చేచోట కొబ్బరి నూనె లేదా ఆవనూనెతో సున్నితంగా మర్దన చేయడం వల్ల రక్త ప్రసరణ పెరుగుతుంది.

సరైన భంగిమ:

కూర్చున్నప్పుడు లేదా పడుకున్నప్పుడు నరాలపై ఒత్తిడి పడకుండా చూసుకోవాలి. ఎక్కువసేపు ఒకే భంగిమలో కూర్చోకుండా మధ్య మధ్యలో చిన్న విరామం తీసుకుని అటు ఇటూ నడవాలి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఆఫీసులో గంటల తరబడి కూర్చుంటున్నారా? మీ ఆరోగ్యం ప్రమాదంలో ఉన్నట్టే!

ప్రకృతి ప్రసాదించిన యాంటీ బయాటిక్స్.. రోగనిరోధక శక్తిని పెంచే 'సూపర్ మసాలాలు' ఇవే!

For More Latest News