అంతర్జాతీయ టీ దినోత్సవం.. టీ నిజంగా ఆరోగ్యకరమేనా?

ఇంటర్నెట్ డెస్క్: అంతర్జాతీయ టీ దినోత్సవాన్ని మొదటిసారిగా 2005లో ప్రారంభించారు. ఆసియా, ఆఫ్రికా దేశాల్లోని టీ కార్మిక సంఘాలు, చిన్న టీ రైతులు, సామాజిక సంస్థలు కలిసి ఈ కార్యక్రమాన్ని ప్రారంభించాయి. టీ రైతులకు సరైన ధరలు లభించడం, కార్మికుల జీవన పరిస్థితులు, వేతనాల గురించి అవగాహన పెంచడం దీని ప్రధాన ఉద్దేశ్యం.

తర్వాత 2015లో ఐక్యరాజ్యసమితికి చెందిన ఆహార, వ్యవసాయ సంస్థ (FAO) అంతర్జాతీయ టీ దినోత్సవాన్ని అధికారికంగా నిర్వహించాలని ప్రతిపాదించింది. దీంతో ఐక్యరాజ్యసమితి ఆధ్వర్యంలో మొదటిసారిగా 2020 మే 21న ఈ దినోత్సవాన్ని నిర్వహించారు. అప్పటి నుంచి ప్రతి సంవత్సరం మే 21న ఈ రోజును జరుపుకుంటున్నారు.

మే 21నే ఎందుకు జరుపుకుంటారు?

ప్రపంచంలోని అనేక దేశాల్లో మే నెలలో టీ ఉత్పత్తి సీజన్ ప్రారంభమవుతుంది. అందుకే టీ ప్రాముఖ్యాన్ని గుర్తు చేసేందుకు ప్రతి సంవత్సరం మే 21న అంతర్జాతీయ టీ దినోత్సవాన్ని జరుపుకుంటారు. అలాగే టీ రైతులు, కార్మికుల జీవన పరిస్థితులు మెరుగుపడేలా అవగాహన కల్పించడం ప్రధాన లక్ష్యం.

భారతదేశంలో చాలామందికి టీ కేవలం ఒక పానీయం మాత్రమే కాదు.. అది రోజువారీ జీవితంలో ఒక భాగం. ఉదయం లేవగానే ఒక కప్పు టీ తాగడం నుంచి సాయంత్రం రిలాక్స్ కావడానికి టీ తాగడం వరకు చాలా మంది అలవాటుగా చేసుకుంటారు. అయితే మనం రోజూ తాగే టీ ఆరోగ్యానికి మంచిదా కాదా అనేది దాన్ని ఎలా తయారు చేస్తున్నామన్న దానిపై ఆధారపడి ఉంటుందని పోషకాహార నిపుణులు చెబుతున్నారు.

ఆరోగ్యానికి మంచిదే.. కానీ..

టీ ఆకుల్లో సహజంగా యాంటీఆక్సిడెంట్లు ఉంటాయి. ఇవి శరీరంలో రోగనిరోధక శక్తిని పెంచడంలో, గుండె ఆరోగ్యాన్ని కాపాడటంలో సహాయపడతాయి. అల్లం, యాలకులు వంటి మసాలాలు కలిపితే టీ మరింత ఆరోగ్యకరంగా మారుతుంది. ఇవి జీర్ణక్రియను మెరుగుపరచడంలో, శరీర వాపును తగ్గించడంలో సహాయపడతాయి. అయితే టీకి ఎక్కువ చక్కెర కలపడం ఆరోగ్యానికి మంచిది కాదు. చాలామంది రోజులో పలుమార్లు ఎక్కువ తీపి ఉన్న టీ తాగుతుంటారు. దీంతో కేలరీలు పెరిగి బరువు పెరగడం, మధుమేహం వంటి సమస్యలు వచ్చే అవకాశం ఉంటుంది.

ఒకటి లేదా రెండు కప్పుల టీ

రోజుకు ఒకటి లేదా రెండు కప్పుల టీ తాగడం సాధారణంగా సురక్షితమే. అయితే ఎక్కువగా తాగితే కొన్ని సమస్యలు రావచ్చు. టీ‌లో కాఫీ కంటే కెఫీన్ తక్కువగా ఉన్నప్పటికీ, ఎక్కువగా తాగితే నిద్రలేమి, ఎసిడిటీ, గుండె వేగంగా కొట్టుకోవడం వంటి సమస్యలు రావచ్చు. ముఖ్యంగా రాత్రి వేళల్లో ఎక్కువ టీ తాగకపోవడం మంచిది. అలాగే ఖాళీ కడుపుతో టీ తాగడం మంచిది కాదని నిపుణులు సూచిస్తున్నారు. టీ ఎక్కువగా తాగడం వల్ల డీహైడ్రేషన్ సమస్య వచ్చే అవకాశం కూడా ఉందని హెచ్చరిస్తున్నారు.

చిన్న చిన్న మార్పులు

టీని పూర్తిగా మానేయాల్సిన అవసరం లేదు. కానీ చిన్న చిన్న మార్పులు చేస్తే దాన్ని మరింత ఆరోగ్యకరంగా మార్చుకోవచ్చు. చక్కెర తగ్గించడం, తక్కువ కొవ్వు ఉన్న పాలు వాడటం మంచిది. కొన్నిసార్లు చక్కెరకు బదులుగా బెల్లం కూడా ఉపయోగించవచ్చు. అయితే దాన్ని కూడా మితంగా తీసుకోవాలి. మీరు రోజూ తాగే టీ ఆరోగ్యానికి మంచిదా కాదా అనేది అందులో ఏమి కలుపుతున్నారన్న దానిపై ఎక్కువగా ఆధారపడి ఉంటుంది.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

రోజూ 10 నిమిషాలు ధ్యానం చేస్తే ఎన్ని ప్రయోజనాలో తెలుసా?

ఫర్నిచర్‌కు చెదలు పట్టిందా? ఈ ఇంటి చిట్కాలు ట్రై చేయండి