నవరాత్రుల సమయంలో ఏం తినాలి? ఏం తినకూడదు?

ఇంటర్నెట్ డెస్క్: ఈరోజు (ఆదివారం) నుంచి శరన్నవరాత్రులు ప్రారంభమయ్యాయి. ఈ పవిత్రమైన సందర్భంలో భక్తులు ఉపవాసం ఉండి దుర్గాదేవిని పూజిస్తారు. కొందరు మొదటి రోజు, చివరి రోజు ఉపవాసముంటారు. ఇంకొందరు తొమ్మిది రోజులూ కేవలం పండ్లనే తింటారు. ఉపవాసం ఉన్నా లేకున్నా నవరాత్రుల సమయంలో సాత్విక ఆహారం మాత్రమే తినడం ఆనవాయితీ. ఈ తొమ్మిది రోజుల పాటు ఏం తినాలి? ఏం తినకూడదో తెలుసుకుందాం రండి.

ఏం తినాలి..?

• నవరాత్రుల సమయంలో సింగాడా పిండి, రాజ్‌గిరా పిండి, సగ్గుబియ్యం వంటివి తినవచ్చు.

• కూరగాయల్లో గుమ్మడికాయ, సొరకాయ, దోసకాయ, బంగాళదుంప, చేమదుంప, కంద, క్యారెట్, చిలకడదుంపలను తినొచ్చు.

• ఉపవాస సమయంలో టమోటాలు, అల్లం ఉన్న ఆహారాన్ని కూడా తీసుకోవచ్చు.

• మజ్జిగ, లస్సీ లాంటివి తాగొచ్చు

• పాల పదార్థాలు ( నెయ్యి, పెరుగు, జున్ను) తినవచ్చు.

• నవరాత్రి ఉపవాసాల్లో యాపిల్, అరటి, దానిమ్మ, బొప్పాయి, నారింజ వంటి పండ్లూ తినదగినవే.

• డ్రైఫ్రూట్స్‌లో జీడిపప్పు, వాల్‌నట్స్, వేరుశనగ లాంటివి తీసుకోవచ్చు.

• అలాగే నల్ల మిరియాల పొడి, జీలకర్ర, పచ్చి మిరపకాయలు, ధనియాలు, యాలకులు వినియోగించవచ్చు.

ఏం తినకూడదు..?

• నవరాత్రి సమయంలో బొంబాయి రవ్వ, ఓట్స్, గోధుమలు, బియ్యం, శనగపిండితో పాటు అన్ని రకాల పప్పుధాన్యాలను మానుకోవాలి.

• ప్రాసెస్ లేదా ప్యాక్ చేసిన ఆహార పదార్థాలు తినకూడదు.

• ఆహారంలో సాధారణ ఉప్పు, మసాలాలు వాడకూడదు. ఉప్పు స్థానంలో సైంధవ లవణాన్ని (రాతి ఉప్పు) వినియోగించాలి.

• అలాగే తామసిక ఆహారాలు తినరాదు.

• కుదిరితే తొమ్మిది రోజుల పాటు ఉల్లిపాయ, వెల్లుల్లిని తినకుండా ఉండాలి.

• మాంసాహారాలు ఎట్టిపరిస్థితుల్లో తినకూడదు. మద్యం సేవించకూడదు.

గమనిక : ఈ సమాచారమంతా మత విశ్వాసాలపై ఆధారపడి ఉంది. దీనిని మతపరమైన సమాచారంగానే పాఠకులు భావించాలి.

ఇవీ చదవండి

దేవీ శరన్నవరాత్రులు.. అమ్మవారి ఒక్కో రూపం వెనుక ఉన్న విశిష్టత ఇదే

ఇంద్రకీలాద్రిపై బాలా త్రిపురసుందరీ దేవిగా కనకదుర్గమ్మ.. అమ్మవారి అలంకార విశిష్ఠత ఇదే..