విజయవాడ మేయర్‌గా వంగవీటి రాధాకృష్ణ ఘన విజయం..

విజయవాడ, నవంబర్ 4: నగర రాజకీయాల్లో కీలక పరిణామం చోటుచేసుకుంది. కూటమి పార్టీల మేయర్ అభ్యర్థిగా బరిలో నిలిచిన వంగవీటి రాధాకృష్ణ ఘన విజయం సాధించి విజయవాడ మేయర్‌గా ఎన్నికయ్యారు. ప్రజల నుంచి ఆయనకు భారీ మద్దతు లభించడంతో ఏకంగా 1,30,872 ఓట్ల భారీ మెజారిటీతో విజయం తన ఖాతాలో వేసుకున్నారు.

ఈ విజయంతో కూటమి శ్రేణుల్లో.. వంగవీటి అభిమానుల్లో సంబరాలు అంబరాన్నంటాయి. విశేషమేమిటంటే.. రాధాకృష్ణ పుట్టినరోజు నాడే విజయవాడ మేయర్‌గా ఎన్నిక కావడం ఈ విజయానికి మరింత ప్రత్యేకతను తీసుకొచ్చింది. మేయర్‌గా ఎన్నికైనట్లు అధికారికంగా ధ్రువీకరణ పత్రం అందుకునేందుకు వంగవీటి రాధాకృష్ణ తన సతీమణితో కలిసి వచ్చారు. ఎన్నికల ఫలితాల్లో ప్రజలు తనపై చూపిన విశ్వాసం, అందించిన అపారమైన మద్దతు తన బాధ్యతను మరింత పెంచాయని ఆయన పేర్కొన్నారు. భారీ మెజారిటీతో విజయాన్ని అందించిన విజయవాడ ప్రజలకు ఆయన ప్రత్యేక కృతజ్ఞతలు తెలియజేశారు.

విజయవాడ అభివృద్ధికి కృషి చేస్తా: వంగవీటి రాధాకృష్ణ

మేయర్‌గా ఘన విజయం సాధించిన అనంతరం వంగవీటి రాధాకృష్ణ మాట్లాడుతూ.. తనపై ఎంతో నమ్మకంతో భారీ మెజారిటీ అందించిన విజయవాడ ప్రజల ఆశయాలకు అనుగుణంగా పనిచేస్తానని స్పష్టం చేశారు. ప్రజలు తనపై ఉంచిన విశ్వాసాన్ని ఎట్టి పరిస్థితుల్లోనూ వమ్ము చేయకుండా, నగర అభివృద్ధికి అంకితభావంతో కృషి చేస్తానని హామీ ఇచ్చారు. ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ సూచనలు, సహకారంతో విజయవాడ నగరాన్ని అభివృద్ధి పథంలో ముందుకు తీసుకెళ్తానని తెలిపారు. తనకు ఇంతటి భారీ విజయాన్ని అందించిన ప్రతి ఒక్కరికీ హృదయపూర్వక ధన్యవాదాలు తెలియజేశారు. పుట్టినరోజు నాడే మేయర్ పదవి దక్కడం ఎంతో ఆనందంగా ఉందని, ఈ విజయాన్ని విజయవాడ ప్రజలకు అంకితం చేస్తున్నాననే సందేశాన్ని ఆయన తన మాటల ద్వారా చాటిచెప్పారు.

ఈ వార్తలనూ చదవండి:

కుప్పంలో టీడీపీ జైత్రయాత్ర.. 32 వార్డులూ కైవసం

కూటమికే.. పట్టణం