ఘోర రోడ్డు ప్రమాదం.. ట్రావెల్స్ బస్సు-కంటైనర్ ఢీకొని ముగ్గురి మృతి

ఆంధ్రజ్యోతి, జనవరి 22: నంద్యాల జిల్లా శిరివెళ్లమెట్ట దగ్గర కర్నూలు-చిత్తూరు 40వ జాతీయ రహదారిపై ఇవాళ(గురువారం) అర్ధరాత్రి ఘోర రోడ్డుప్రమాదం జరిగింది. ప్రైవేట్ ట్రావెల్స్(ARBCVR) బస్సు, కంటైనర్ లారీ ఢీకొని ముగ్గురు మృతిచెందారు. బస్సు టైర్ ఒక్కసారిగా పేలిపోవడంతో డివైడర్‌ను దాటి వెళ్లిపోయి.. ఎదురుగా వస్తున్న కంటైనర్ లారీని ఢీకొట్టింది. దీంతో బస్సులో మంటలు చెలరేగి లారీకి సైతం అంటుకున్నాయి. ఈ ప్రమాదంలో కడప జిల్లాకు చెందిన బస్సు డ్రైవర్ భాస్కర్, కంటైనర్ లారీలోని డ్రైవర్, క్లీనర్‌లు క్యాబిన్‌లో చిక్కుకుపోయి సజీవ దహనం అయ్యారు. వీరి మృతదేహాలు మాంసపు ముద్దలుగా మారిపోయాయి.

బస్సులోని ద్విచక్రవాహనాలు కూడా మంటల్లో కాలిపోయాయి. ప్రమాద సమయంలో బస్సులో సుమారు 36 మంది ప్రయాణికులు ఉన్నట్టు తెలుస్తోంది. మంటలు చెలరేగడంతో ప్రయాణికులు అప్రమత్తమై తమ ప్రాణాలను కాపాడుకున్నారు. కొందరు క్షతగాత్రులకు నంద్యాల ప్రభుత్వ జనరల్ ఆసుపత్రిలో చికిత్స అందిస్తున్నారు. ఈ ప్రమాదంలో బస్సు ప్రయాణికులు సురక్షితంగా బయటపడటానికి స్థానికులు, వాహనదారులు, బస్సు క్లీనర్ సహాయం చేశారు.

ప్రమాద సమాచారం తెలియగానే నంద్యాల జిల్లా ఎస్పీ సునీల్ షొరాణ్, ఆళ్లగడ్డ డీఎస్పీ ప్రమోద్ కుమార్ ప్రమాద స్థలానికి చేరుకున్నారు. శిరివెళ్ల మండల పరిధిలో జరిగిన ఈ ఘటన.. జిల్లాలో భయాందోళన కలిగించింది. పోలీసులు కంటైనర్ డ్రైవర్, క్లీనర్ వివరాలు సేకరిస్తున్నారు. ఈ ప్రమాదం కారణాలపై దర్యాప్తు జరుగుతోంది.

కావేరి ట్రావెల్స్ బస్సులో పొగలు.. ప్రయాణికుల హాహాకారాలు

మరోవైపు పశ్చిమగోదావరి జిల్లా భీమవరంలో ప్రైవేట్ ట్రావెల్స్ బస్సులో ఒక్కసారిగా పొగలు వ్యాపించాయి. దీంతో బస్సులోని ప్రయాణికులు భయాందోళనకు గురై హాహాకారాలు చేశారు. నరసాపురం నుంచి హైదరాబాద్ వెళుతున్న ఓ ప్రైవేటు ట్రావెల్స్ బస్సులో ఈ ప్రమాదం జరిగింది. ఏసీ కంప్రెషర్ బెల్ట్ నుంచి పొగ వచ్చినట్లు అధికారులు ప్రాథమికంగా భావిస్తున్నారు. భీమవరం పరిధిలో ప్రమాదం చోటుచేసుకోవడంతో ఆ ప్రాంత రవాణా శాఖ అధికారులు వెంటనే బస్సును నిలిపివేశారు. ప్రయాణికులు సురక్షితంగా బయటకు వచ్చారని, ఎవరికీ పెద్దగా గాయాలు కాలేదని తెలిపారు. బస్సును తనిఖీ చేసి, అవసరమైన చర్యలు తీసుకుంటామని రవాణా శాఖ అధికారులు చెప్పారు.

ఇవి కూడా చదవండి..

కాకినాడ పీబీసీ కాల్వలో స్పిరిట్ లారీ బోల్తా.. ప్రజలకు అధికారుల హెచ్చరికలు

భారత్, ఇజ్రాయెల్ ఆర్థిక సహకారానికి దావోస్ వేదిక: సీఎం చంద్రబాబు

Read Latest AP News And Telugu News