మురసు ఎఫెక్ట్.. చీరాల మున్సిపల్ ఎన్నికల కౌంటింగ్ వాయిదా..

బాపట్ల జిల్లా: ఆంధ్రప్రదేశ్ వ్యాప్తంగా మున్సిపల్ ఎన్నికల కౌంటింగ్ ప్రక్రియ రసవత్తరంగా సాగుతోంది. టీడీపీ, జనసేన, బీజేపీ కూటమి పలు కార్పొరేషన్లు, మున్సిపాలిటీలను కైవసం చేసుకుంటూ ప్రత్యర్థి వైసీపీకి భారీ షాక్ ఇస్తోంది. అయితే, కౌంటింగ్ ప్రక్రియపై మురసు తుపాను ప్రభావం పడింది. దీని కారణంగా పలు ప్రాంతాల్లో ఓట్ల లెక్కింపు ప్రక్రియ ఆలస్యంగా ప్రారంభం కాగా.. మరికొన్ని ప్రాంతాల్లో వాయిదా పడింది.

ఈ నేపథ్యంలో మురసు తుపాను ప్రభావంతో చీరాల మున్సిపాలిటీ ఎన్నికల కౌంటింగ్‌ను అధికారులు వాయిదా వేశారు. భారీ వర్షాల కారణంగా ఓట్ల లెక్కింపును వాయిదా వేసినట్లు రాష్ట్ర ఎన్నికల సంఘం ప్రకటించింది. కౌంటింగ్ కేంద్రం వద్ద గంటకు 100 కి.మీ. వేగంతో బలమైన గాలులు వీచే అవకాశం ఉండటంతో పాటు, వరద ముప్పు పొంచి ఉండటంతో ఈ నిర్ణయం తీసుకున్నట్లు ఎస్ఈసీ తెలిపింది. ఎన్నికల సిబ్బంది భద్రత, బ్యాలెట్ బాక్సుల రక్షణ, కమ్యూనికేషన్, విద్యుత్ అంతరాయం తదితర అంశాలను దృష్టిలో ఉంచుకుని కౌంటింగ్‌ను వాయిదా వేయాలని బాపట్ల జిల్లా కలెక్టర్ ఎన్నికల సంఘాన్ని కోరారు. దీంతో కౌంటింగ్‌ను నవంబర్ 6వ తేదీకి వాయిదా వేస్తూ ఎస్ఈసీ నిర్ణయం తీసుకుంది.

ఆ రోజు ఉదయం 8 గంటలకు మున్సిపాలిటీ ఓట్ల లెక్కింపు ప్రారంభం కానుంది. ఎంపీటీసీ/జెడ్పీటీసీ ఎన్నికల పోలింగ్, సహాయక చర్యల నేపథ్యంలో కౌంటింగ్ తేదీలో మార్పులు చేసినట్లు ఎన్నికల సంఘం తెలిపింది. మారిన కౌంటింగ్ తేదీ, సమయం గురించి అభ్యర్థులు, ఏజెంట్లు, మీడియాకు సమాచారం అందించాలని అధికారులను ఎస్ఈసీ ఆదేశించింది. ఈ మేరకు అధికారిక నోటిఫికేషన్ జారీ చేసింది.

ఈ వార్తలు కూడా చదవండి

పులివెందుల మున్సిపాలిటీ టీడీపీ కైవసం.. 13,875 ఓట్ల మెజారిటీతో భారీ గెలుపు

నెల్లూరు మున్సిపల్ ఎన్నికల్లో టీడీపీ హవా.. వరుస విజయాలతో వైసీపీకి షాక్