Abhishek Sharma Yuvraj Singh: యువరాజ్ సింగ్ రికార్డు బ్రేక్ చేసిన అభిషేక్ శర్మ

దుబాయ్ ఇంటర్నేషనల్ క్రికెట్ స్టేడియంలో నిన్న ఆసియా కప్ 2025 సూపర్ ఫోర్ మ్యాచ్‌లో భారత ఓపెనర్ అభిషేక్ శర్మ (Abhishek Sharma) తన గురువు యువరాజ్ సింగ్‌ను (Yuvraj Singh) అధిగమించి కొత్త రికార్డ్ సృష్టించాడు. పాకిస్తాన్‌తో జరిగిన గత మ్యాచ్‌లో 74 పరుగులతో చెలరేగిన అభిషేక్, తాజాగా బంగ్లాదేశ్‌తో జరిగిన ఈ మ్యాచ్‌లో మరోసారి అర్ధ సెంచరీతో అభిమానులను ఆకట్టుకున్నాడు.

అభిషేక్ శర్మ అద్భుత ప్రదర్శన

ఈ మ్యాచులో అభిషేక్ మొదట్లో కాస్త నెమ్మదిగా ఆడినా, తర్వాత మంచి ఊపును కొనసాగించాడు. తొమ్మిది బంతుల్లో కేవలం తొమ్మిది పరుగులతో ఉన్న అభిషేక్, ఒక్కసారిగా గేర్ మార్చి, కేవలం 25 బంతుల్లోనే అర్ధ సెంచరీ సాధించాడు. ఎనిమిదో ఓవర్‌లో శుభ్‌మన్ గిల్ ఔటైన తర్వాత, అభిషేక్ తన ఆటతీరును మరింత పెంచి, బంగ్లాదేశ్ బౌలర్లను చీల్చిచెండాడాడు.

అభిషేక్ ఇప్పుడు..

ఈ అర్ధ సెంచరీతో అభిషేక్, టీ20 ఇంటర్నేషనల్ మ్యాచ్‌లలో 25 లేదా అంతకంటే తక్కువ బంతుల్లో అర్ధ సెంచరీ సాధించిన భారత ఆటగాళ్ల జాబితాలో యువరాజ్ సింగ్‌ను అధిగమించాడు. ఈ జాబితాలో అభిషేక్ ఇప్పుడు ఐదు సార్లు ఈ ఘనత సాధించి, యువరాజ్ (4 సార్లు) కంటే ముందుకు దూసుకెళ్లాడు.

టీ20ల్లో 25 లేదా తక్కువ బంతుల్లో అర్ధ సెంచరీ సాధించిన భారత ఆటగాళ్లు:

• 7 సార్లు: సూర్యకుమార్ యాదవ్

• 6 సార్లు: రోహిత్ శర్మ

• 5 సార్లు: అభిషేక్ శర్మ

• 4 సార్లు: యువరాజ్ సింగ్

• 3 సార్లు: కేఎల్ రాహుల్

అభిషేక్ ఆటతీరు..

ఈ రికార్డ్‌తో అభిషేక్, తన గురువైన యువరాజ్ సింగ్‌కు గర్వకారణంగా నిలిచాడు. అభిషేక్ ఒత్తిడిలోనూ స్థిరంగా ఆడే ఆటతీరు, సామర్థ్యం అతడిని భారత జట్టులో కీలక ఆటగాడిగా మార్చాయి.

ఇంకా ఎన్ని రికార్డులు

అభిషేక్ శర్మ ఈ ఆసియా కప్‌లో స్థిరమైన ప్రదర్శనతో జట్టుకు మంచి ఆరంభాన్ని ఇచ్చాడు. యువరాజ్ సింగ్ మార్గదర్శకత్వంలో శిక్షణ పొందిన అభిషేక్, ఇప్పుడు తన గురువు రికార్డు బ్రేక్ చేసి.. భారత క్రికెట్‌లో స్టార్‌ ఆటగాడిగా ఎదుగుతున్నాడు. ఈ క్రమంలో ఆసియా కప్ 2025లో అభిషేక్ శర్మ ఇంకా ఎన్ని రికార్డులు సృష్టిస్తాడో చూడాలి మరి.

ఇవి కూడా చదవండి

మరో స్కామ్‌ అలర్ట్.. మీ డబ్బు, ఫోన్‌ను ఇలా కాపాడుకోండి

సెప్టెంబర్ 2025లో బ్యాంక్ సెలవుల పూర్తి లిస్ట్..

మరిన్ని జాతీయ, తెలుగు వార్తల కోసం క్లిక్ చేయండి