Nightmares in AC Room: ఏసీ గదుల్లో పడుకునే వారికి పీడకలలు ఎక్కువగా వస్తాయా?

ఇంటర్నెట్ డెస్క్‌: చాలా మంది మంచి నిద్ర కోసం ఎయిర్ కండిషనర్లను పెట్టుకుంటారు. ఏసీ వల్ల హాయిగా నిద్రపోవచ్చని అనుకుంటారు. కానీ, కొంత మంది ఏసీ ఉన్న రూంలో పడుకోవడం వల్ల వింతైన, భయానక కలలు వస్తాయని అంటుంటారు. అయితే, ఏసీ గదుల్లో పడుకునే వారికి నిజంగా పీడకలలు ఎక్కువగా వస్తాయా? ఈ విషయంపై వైద్య నిపుణులు ఏమంటున్నారో ఇప్పుడు తెలుసుకుందాం..

నిద్ర.. శరీర ఉష్ణోగ్రత, పర్యావరణానికి నేరుగా సంబంధించినదని వైద్య నిపుణులు వివరిస్తున్నారు. ఏసీ గది ఉష్ణోగ్రతను చల్లబరుస్తుంది, ఇది త్వరగా నిద్రపోవడానికి సహాయపడుతుంది. కానీ, ఉష్ణోగ్రత ఎక్కువగా తగ్గిపోతే, మన శరీరం సాధారణంగా పని చేయదు. శరీరంలో అసాధారణ ప్రతిక్రియలు మొదలవుతాయి. ఈ పరిస్థితి మన మెదడులో జరిగే రాపిడ్ ఐ మూవ్‌మెంట్‌ (REM) అనే దశను ప్రభావితం చేస్తుంది. ఈ దశలోనే మనం ఎక్కువగా కలలు కంటామని నిపుణులు చెబుతున్నారు.

ఏసీ గదిలో స్వచ్ఛమైన గాలి ప్రవాహం తగ్గుతుంది. ఇది మెదడుపై ప్రభావం చూపుతుంది. ఈ కారణంగా నిద్రలో అవాంఛిత లేదా భయానక కలలు ఎక్కువగా వచ్చే అవకాశం ఉంది. శరీరం చాలా చల్లగా అనిపించినప్పుడు, మెదడు అసౌకర్యంగా అనిపిస్తుంది. ఇది నిద్ర నాణ్యతను దెబ్బతీస్తుంది. ఏసీ శరీరానికి విశ్రాంతినిస్తుంది , కానీ మానసిక ఒత్తిడి, చల్లని నిద్ర కలయిక తరచుగా ప్రతికూల కలలను రేకెత్తిస్తుంది. అలా అని పీడకలలకు ఎప్పుడూ ఏసీనే కారణం అని అనుకోలేమని, కొన్నిసార్లు ఒత్తిడి, నిరాశ , అర్థరాత్రి వరకు మొబైల్ వాడటం, ఆహారం ఎక్కువగా తిన్న తర్వాత నిద్రపోవడం వంటి కారణాలు కూడా ఉండొచ్చని చెబుతున్నారు.

మంచి నిద్ర కోసం..

• ఏసీ ఉష్ణోగ్రతను 26 డిగ్రీల వరకు ఉంచండి.

• నిద్రపోయేటప్పుడు గదిలో తేలికపాటి వెంటిలేషన్ ఉండేలా చూసుకోండి.

• రాత్రిపూట ఎక్కువగా తినడం లేదా కెఫిన్ తీసుకోవడం మానుకోండి.

• నిద్రపోయే ముందు విశ్రాంతినిచ్చే సంగీతం వినడం , ధ్యానం చేయడం లేదా పుస్తకం చదవడం అలవాటు చేసుకోండి.

• ఏసీ గదులకు, పీడకలలకు మధ్య సంబంధం ఉండవచ్చు, కానీ ఇది అందరికీ వర్తించదు. చాలా సందర్భాలలో, సమస్యకు కారణం సరైన ఉష్ణోగ్రత లేకపోవడం లేదా మానసిక ఒత్తిడి ఉండవచ్చు. మీరు కూడా ఏసీలో నిద్రపోతూ తరచుగా పీడకలలతో ఇబ్బంది పడుతుంటే, డాక్టర్ సలహా ప్రకారం మీరు నిద్రపోయే గది వాతావరణాన్ని సమతుల్యం చేసుకోవడం ముఖ్యం.

Also Read:

ఫ్రిజ్ లేకపోయినా టమోటాలు ఎక్కువ రోజులు నిల్వ ఉంచే మేజిక్ ట్రిక్ ఇదే!

రాత్రిళ్లు 9 గంటల పాటు నిద్రపోతే ఆరోగ్యం మెరుగవుతుందా

ఈ 3 ఫ్రూట్ జ్యూసులు రోజూ తాగుతున్నారా.. షుగర్ సహా ఈ సమస్యలు..!