EPFO New Rule UAN: EPFO కొత్త రూల్ ఫేస్ ఆధారిత టెక్నాలజీతో UAN జనరేషన్.. ఎలాగంటే..
ABN , Publish Date - Aug 14 , 2025 | 12:15 PM
ఈ మధ్యనే మీరు కొత్తగా ఉద్యోగంలో చేరారా. అయితే ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) ఇటీవల ప్రవేశపెట్టిన కొత్త రూల్ గురించి తప్పక తెలుసుకోండి. ఇది 2025 ఆగస్టు 1 నుంచి అమల్లోకి వచ్చింది. ఆ వివరాలేంటో ఇక్కడ చూద్దాం.
ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) ఇటీవల కొత్త రూల్ను ప్రవేశపెట్టింది. ఇది కొత్తగా ఉద్యోగంలో చేరే వారికి చాలా ముఖ్యం. ఎందుకంటే ఇప్పుడు కొత్త యూనివర్సల్ అకౌంట్ నంబర్ (UAN) జనరేట్ చేయడానికి ఆధార్ ఆధారిత ఫేస్ ఆథెంటికేషన్ టెక్నాలజీ (FAT) తప్పనిసరిగా మారింది. ఈ కొత్త రూల్ ఆగస్టు 1, 2025 నుంచి అమల్లోకి వచ్చింది.
UAN అంటే ఏమిటి?
మీలో కొందరికి UAN గురించి ఇప్పటికే తెలిసి ఉండొచ్చు. కానీ కొత్తగా ఉద్యోగంలో చేరిన వాళ్ల కోసం క్లుప్తంగా తెలుసుకుందాం. UAN అంటే యూనివర్సల్ అకౌంట్ నంబర్. ఇది EPF స్కీమ్లో చేరిన ప్రతి ఉద్యోగికి ఇచ్చే 12 అంకెల ప్రత్యేక గుర్తింపు సంఖ్య. ఈ నంబర్ లేకపోతే, మీ PF బ్యాలెన్స్ చెక్ చేయడం, క్లెయిమ్లు సమర్పించడం లాంటి పనులు చేయడం కష్టం. అందుకే ప్రతి ఉద్యోగికి UAN చాలా కీలకం.
కొత్త రూల్ ఏంటి?
EPFO జూలై 30న ఒక సర్కులర్ జారీ చేసింది. దీని ప్రకారం, కొత్తగా UAN జనరేట్ చేయాలంటే ఆధార్ ఆధారిత ఫేస్ ఆథెంటికేషన్ తప్పనిసరి. అంటే, కొత్త ఉద్యోగులు తమ UANని UMANG యాప్ ద్వారా ఫేస్ ఆథెంటికేషన్ ఉపయోగించి జనరేట్ చేసుకోవాలి. ఈ రూల్ ఆగస్టు 1 నుంచి అమల్లో ఉంది. ఈ టెక్నాలజీతో UAN జనరేషన్ ప్రాసెస్ మరింత సురక్షితంగా, ఎలాంటి ఇబ్బందులు లేకుండా ఉంటుందని EPFO భావిస్తోంది.
UMANG యాప్ అంటే ఏంటి?
UMANG అంటే యూనిఫైడ్ మొబైల్ అప్లికేషన్ ఫర్ న్యూ-ఏజ్ గవర్నెన్స్. ఈ యాప్ ద్వారా కేంద్ర, రాష్ట్ర ప్రభుత్వాలు అందించే అనేక సేవలను యాక్సెస్ చేయవచ్చు. ఇప్పుడు కొత్త UAN జనరేషన్ కోసం ఈ యాప్ను ఉపయోగించుకోవచ్చు. ఈ యాప్లో ఆధార్ వివరాలతో ఫేస్ ఆథెంటికేషన్ పూర్తి చేస్తే, మీ UAN సులభంగా జనరేట్ అవుతుంది.
ఇప్పటికే UAN ఉన్నవాళ్లకు ఇది వర్తిస్తుందా?
ఇప్పటికే UAN ఉన్న ఉద్యోగులకు ఈ కొత్త రూల్ పెద్దగా ప్రభావం చూపదు. ఈ రూల్ కేవలం కొత్తగా UAN జనరేట్ చేసుకునే వారికి మాత్రమే వర్తిస్తుంది. అయితే, కొన్ని ప్రత్యేక కేసుల్లో, ఉదాహరణకు అంతర్జాతీయ ఉద్యోగులు లేదా నేపాల్, భూటాన్ పౌరుల కోసం, ఇప్పటికీ యజమాని ద్వారా UAN జనరేషన్ కొనసాగుతుంది.
కానీ సాధారణంగా కొత్త ఉద్యోగులు UMANG యాప్ ద్వారా ఫేస్ ఆథెంటికేషన్ ఉపయోగించాల్సిందే. ఈ కొత్త రూల్ వల్ల కొందరికి సమస్యలు ఎదురుకావొచ్చు. ముఖ్యంగా, స్టాఫింగ్ కంపెనీలు, మల్టీనేషనల్ కంపెనీలకు మానవ వనరులను అందించే సంస్థలకు ఇది సవాలుగా మారనుంది.
ఇవి కూడా చదవండి
ఈ తేదీకి ముందే ఐటీఆర్ దాఖలు చేయండి… ఆలస్య రుసుమును తప్పించుకోండి
రైల్వే టిక్కెట్లపై 20% తగ్గింపు ఆఫర్.. ఈ అవకాశాన్ని వినియోగించుకోండి
మరిన్ని జాతీయ, తెలుగు వార్తల కోసం క్లిక్ చేయండి
