Sachin Tendulkar: సచిన్ సహా స్టార్ ఆటగాళ్లకు నెలల్లోనే కోట్ల రూపాయల లాభం!

దేశీయ స్టాక్ మార్కెట్లు గురువారం కూడా మంచి లాభాల్లో కొనసాగాయి. ఈ క్రమంలో ఏరోస్పేస్ కాంపోనెంట్ టర్బైన్ తయారీ కంపెనీ ఆజాద్ ఇంజినీరింగ్ స్టాక్స్ బిఎస్‌ఇలో 35 శాతం ప్రీమియంతో లిస్టయ్యాయి. లిస్ట్ అయిన వెంటనే ఈ సంస్థకు చెందిన స్టాక్స్ లాభాల్లోకి చేరుకున్నాయి. దీంతో ఈ కంపెనీలో పెట్టుబడి పెట్టిన మదుపర్లతోపాటు పెట్టుబడిదారులు కూడా సంతోషం వ్యక్తం చేస్తున్నారు. ఈ సందర్భంగా ఆజాద్ ఇంజినీరింగ్ షేర్లు మొదటి రోజే భారీ లాభాలను అందించాయని ట్రేడ్ నిపుణులు అంటున్నారు.

బాంబే స్టాక్ ఎక్స్ఛేంజ్‌లో ఈ కంపెనీ షేర్లు 35 శాతం కంటే ఎక్కువ లాభంతో రూ.710 వద్ద లిస్టయ్యాయి. అదే సమయంలో కంపెనీ షేర్లు నేషనల్ స్టాక్ ఎక్స్ఛేంజ్‌లో 37 శాతానికి పైగా లాభంతో రూ.720 వద్ద లిస్టయ్యాయి. కంపెనీ ఐపీఓ ధర రూ.499 నుంచి రూ.524గా ఉంది. ఐపీఓలో ఆజాద్ ఇంజినీరింగ్ షేర్లను రూ.524గా కేటాయించారు. ఈ సంస్థలో మాస్టర్ బ్లాస్టర్ సచిన్ టెండూల్కర్ కూడా పెట్టుబడులు పెట్టడం విశేషం. CNBC-TV 18 నివేదిక ప్రకారం ఆజాద్ ఇంజినీరింగ్‌లో సచిన్ టెండూల్కర్ వాటా ప్రస్తుత విలువ 5 కోట్ల రూపాయల నుంచి 31.5 కోట్ల రూపాయలకు పెరిగిందని తెలిపింది. ఈ నేపథ్యంలో సచిన్ టెండూల్కర్ తన పెట్టుబడిపై 9 నెలల్లోనే 360% కంటే ఎక్కువ లాభం పొందుతాడని పేర్కొంది. ఆజాద్ ఇంజినీరింగ్ షేర్లు బిఎస్‌ఇలో రూ.710 వద్ద లిస్టయ్యాయి.

అంతేకాదు ఈ కంపెనీలో సచిన్ టెండూల్కర్, వీవీఎస్ లక్ష్మణ్, బాక్సింగ్ ఛాంపియన్ నిఖత్ జరీన్, బ్యాడ్మింటన్ స్టార్లు సైనా నెహ్వాల్, పీవీ సింధు సైతం పెట్టుబడులు పెట్టారు. అయితే వీరంతా ఎంత మొత్తంలో పెట్టుబడులు పెట్టారు. వారికి ఎంత లాభం వచ్చిందనే వివరాలు కూడా తెలియాల్సి ఉంది. ఆజాద్ ఇంజినీరింగ్ IPO మొత్తం 83.04 సార్లు సభ్యత్వం పొందింది. దీంతో కంపెనీ ఐపీఓలో రిటైల్ ఇన్వెస్టర్ల కోటా 24.51 రెట్లు సబ్‌స్క్రైబ్ అయింది. అదే సమయంలో నాన్-ఇన్‌స్టిట్యూషనల్ ఇన్వెస్టర్ల కోటా (NII) 90.24 రెట్లు సబ్‌స్క్రైబ్ చేయబడింది. కంపెనీ IPOలో క్వాలిఫైడ్ ఇన్‌స్టిట్యూషనల్ కొనుగోలుదారుల (QIB) కోటా 179.64 రెట్లు సబ్‌స్క్రైబ్ చేయబడింది.