తెలంగాణలో భానుడి ప్రతాపం.. నిజామాబాద్‌లో 46 డిగ్రీల రికార్డ్ ఉష్ణోగ్రత

ఆంధ్రజ్యోతి, మే 3: తెలంగాణ వ్యాప్తంగా ఈ వేసవి కాలంలోనే అత్యధిక స్థాయిలో ఉష్ణోగ్రతలు తాజాగా నమోదవుతున్నాయి. రాష్ట్రంలోనే అత్యధికంగా నిజామాబాద్ జిల్లాలో 46 డిగ్రీల ఉష్ణోగ్రత నమోదైంది. ఈ సీజన్‌లో ఇదే అత్యధిక రికార్డ్ అని అధికారులు చెబుతున్నారు. నల్గొండ, నిర్మల్, సిద్దిపేట జిల్లాల్లో కూడా ఎండ తీవ్రత అధికంగా ఉంది. రాజధాని హైదరాబాద్‌లో కూడా ఎండలు ముదురుతున్నాయి. నగరంలోని ముషీరాబాద్, విఠల్ వాడి ప్రాంతాల్లో 42.5 నుంచి 42.6 డిగ్రీల ఉష్ణోగ్రతలు నమోదయ్యాయి. హైదరాబాద్ వాతావరణ కేంద్రం అధికారులు తెలిపిన వివరాల ప్రకారం, రేపు కూడా ఇదే స్థాయిలో ఎండలు కొనసాగే అవకాశం ఉంది. అయితే, ఎల్లుండి నుంచి ఉష్ణోగ్రతలు కొంతమేర తగ్గే అవకాశం ఉందని అంటున్నారు.