పెద్దపల్లిలో సింగరేణి ప్రాజెక్టులో ప్రమాదం.. ఐదుగురికి గాయాలు

పెద్దపల్లి, సెప్టెంబర్ 3: జిల్లాలోని రామగిరి సింగరేణి సంస్థ ఆర్‌జీ-3 ఏరియాలో ఉన్న అడ్రియాల లాంగ్‌వాల్ ప్రాజెక్టులో ప్రమాదం చోటుచేసుకుంది. నైట్ షిఫ్ట్ ముగింపు సమయంలో ఎయిర్ ట్యాంకర్ ఒక్కసారిగా భారీ శబ్దంతో పేలడంతో అక్కడ పనిచేస్తున్న కార్మికులు భయాందోళనకు గురయ్యారు. ఈ పేలుడు ధాటికి మొత్తం ఐదుగురు కార్మికులు గాయపడినట్లు సమాచారం. వారిలో ఇద్దరు కార్మికులు అస్వస్థతకు గురికాగా, మరో ముగ్గురికి గాయాలయ్యాయి. ప్రమాదం జరిగిన వెంటనే తోటి కార్మికులు అప్రమత్తమై గాయపడిన వారిని బయటకు తీసుకొచ్చారు. అనంతరం ఐదుగురు కార్మికులను చికిత్స నిమిత్తం గోదావరిఖని సింగరేణి ఏరియా ఆస్పత్రికి తరలించారు. ప్రస్తుతం ఆస్పత్రిలో బాధిత కార్మికులకు వైద్యులు చికిత్స అందిస్తున్నారు. ప్రమాదం జరిగిన సమయంలో భారీ శబ్దం వినిపించడంతో ప్రాజెక్టులో కొంతసేపు ఉద్రిక్త పరిస్థితి నెలకొంది.

ఈ ఘటనపై సమాచారం అందుకున్న సింగరేణి అధికారులు అప్రమత్తమయ్యారు. ఎయిర్ ట్యాంకర్ ఎలా పేలింది? ప్రమాదానికి దారితీసిన పరిస్థితులు ఏమిటి? ట్యాంకర్‌లో సాంకేతిక లోపం ఏమైనా ఉందా? అనే అంశాలపై అధికారులు విచారణ చేపట్టనున్నారు. ప్రమాదానికి ఖచ్చితమైన కారణాలను గుర్తించేందుకు ప్రాజెక్టులోని సంబంధిత విభాగాల నుంచి వివరాలు సేకరించడంతో పాటు భద్రతా ప్రమాణాల అమలుపై కూడా పరిశీలన చేసే అవకాశం ఉంది. మరోవైపు గాయపడిన కార్మికుల ఆరోగ్య పరిస్థితిని వైద్యులు పర్యవేక్షిస్తున్నారు. ప్రమాద ఘటనపై పూర్తి వివరాలు విచారణ అనంతరం వెల్లడయ్యే అవకాశం ఉంది. సింగరేణి ప్రాజెక్టుల్లో భద్రతకు అత్యంత ప్రాధాన్యత ఇస్తున్న నేపథ్యంలో ఈ ఘటనపై అధికారులు ప్రత్యేకంగా దృష్టి సారించినట్లు తెలుస్తోంది

ఇవి కూడా చదవండి...

గంజాయి డాన్ నీతు భాయ్ ఇంట్లో ఈడీ సోదాలు

రెండు చక్రాలపై ఆటో డ్రైవర్ ప్రమాదకర స్టంట్..

Read Latest Telangana News And Telugu News