ములుగు జిల్లాలో విషాదం.. వేధింపుల ఆరోపణలతో గర్భిణి ఆత్మహత్య

ములుగు, అక్టోబర్ 3: జిల్లాలోని ఏటూరునాగారం రోహీర్‌లో విషాద ఘటన చోటుచేసుకుంది. నాలుగు నెలల గర్భిణి స్వర్ణలత (25) పురుగుల మందు తాగి ఆత్మహత్యకు పాల్పడిన ఘటన స్థానికంగా కలకలం రేపింది. కుటుంబ సభ్యులు తెలిపిన వివరాల ప్రకారం.. అదనపు కట్నం, భూమి విషయంలో భర్త, అత్త, మామ కొంతకాలంగా స్వర్ణలతను వేధిస్తున్నారని ఆరోపించారు. ఈ వేధింపుల కారణంగానే ఆమె తీవ్ర మనస్తాపానికి గురై పురుగుల మందు తాగినట్లు కుటుంబ సభ్యులు పేర్కొన్నారు. పరిస్థితి విషమించడంతో ఆమెను ఆస్పత్రికి తరలించే ప్రయత్నం చేసినప్పటికీ అప్పటికే మృతి చెందినట్లు సమాచారం.

స్వర్ణలత మృతితో కుటుంబ సభ్యులు, బంధువులు తీవ్ర విషాదంలో మునిగిపోయారు. ఘటనపై సమాచారం అందుకున్న పోలీసులు కేసు నమోదు చేసి దర్యాప్తు ప్రారంభించారు. కుటుంబ సభ్యుల ఫిర్యాదు మేరకు స్వర్ణలత భర్త, అత్త, మామపై కేసు నమోదు చేసినట్లు పోలీసులు తెలిపారు. అదనపు కట్నం, భూమి విషయంలో వేధింపులు జరిగాయన్న ఆరోపణలపై పోలీసులు విచారణ చేపట్టి వివరాలు సేకరిస్తున్నారు. మృతదేహాన్ని పోస్టుమార్టం నిమిత్తం ఆస్పత్రికి తరలించి.. ఘటనకు దారితీసిన పరిస్థితులపై పూర్తి స్థాయిలో దర్యాప్తు కొనసాగిస్తున్నారు.

ఈ వార్తలు కూడా చదవండి:

కల్యాణలక్ష్మి రద్దుకు రేవంత్‌ కుట్ర

శ్రీవారి సర్వదర్శనానికి 18 గంటలు

Read Latest AP News And Telangana News