ఖేలో ఇండియా గేమ్స్ విజయవంతం చేయాలి: అధికారులను ఆదేశించిన సంజయ్ జాజు

హైదరాబాద్, సెప్టెంబర్ 18: సమన్వయంతో ఖేలో ఇండియా గేమ్స్ విజయవంతం చేయాలని అధికారులకు తెలంగాణ ప్రభుత్వ ప్రధాన కార్యదర్శి సంజయ్ జాజు ఆదేశించారు. శుక్రవారం రాష్ట్ర సచివాలయంలో ఖేలో ఇండియా యూత్ గేమ్స్‌ నిర్వహణపై ఆయన ఉన్నతస్థాయి సమీక్ష నిర్వహించారు. ఈ ఏడాది డిసెంబర్ 11 నుంచి 22వ తేదీ వరకు ఖేలో ఇండియా యూత్ గేమ్స్ నిర్వహిస్తామని తెలిపారు. హైదరాబాద్‌తో పాటు రాష్ట్రంలోని మరో ఐదు నగరాల్లో క్రీడా పోటీలు నిర్వహిస్తామని ప్రకటించారు. ఆ నగరాలు.. హన్మకొండ, కరీంనగర్, నిజామాబాద్, మహబూబ్‌నగర్, ఖమ్మంలో నిర్వహిస్తామని వివరించారు.

18 ఏళ్ల లోపు క్రీడాకారులతో ఖేలో ఇండియా యూత్ గేమ్స్ నిర్వహిస్తున్నట్లు తెలిపారు. మొత్తం 27 క్రీడా విభాగాల్లో పోటీలు ఉంటాయని చెప్పారు. దాదాపు 6,050 మంది క్రీడాకారులు ఈ గేమ్స్‌లో పాల్గొంటారని సీఎస్ సంజయ్ జాజు పేర్కొన్నారు. 14 వ్యక్తిగత క్రీడలు.. 6 టీమ్ ఈవెంట్లు ఉంటాయని వివరించారు. మరో 6 ఇతర క్రీడా విభాగాల్లో పోటీలు కూడా ఉంటాయని చెప్పారు.

ఈ గేమ్స్ విజయవంతంగా నిర్వహించేందుకు 18 మందితో ఆర్గనైజింగ్ కమిటీ ఏర్పాటు చేశామన్నారు. ఈ కమిటీకి ముఖ్యమంత్రి రేవంత్ రెడ్డి చైర్మన్‌, అలాగే క్రీడా శాఖ మంత్రి కో-చైర్మన్‌గా ఉంటారని తెలిపారు. ఇక 28 మంది ఉన్నతాధికారులతో ఎగ్జిక్యూటివ్ కమిటీ ఏర్పాటు చేశామన్నారు. మరో18 ప్రత్యేక కమిటీల ఏర్పాటు చేశామని ప్రభుత్వ ప్రధాన కార్యదర్శి సంజయ్ జాజు పేర్కొన్నారు.