పెంపుడు కుక్క విషయంలో గొడవ.. యువకుడిపై వృద్ధుల దాడి

బెంగళూరు, మార్చి 8: పెంపుడు కుక్క విషయంలో చోటుచేసుకున్న గొడవ కారణంగా కొంతమంది వృద్ధులు యువకుడిపై దాడి చేశారు. విచక్షణా రహితంగా యువకుడిని చావచితక్కొట్టారు. ఈ సంఘటన కర్ణాటకలో ఆలస్యంగా వెలుగుచూసింది. ఇందుకు సంబంధించిన వివరాల్లోకి వెళితే.. బెంగళూరుకు చెందిన తరుణ్ అరోరా అనే యువకుడు బ్రిగేడ్ యుటోపియాలోని ఈస్ట్ ఆంటోపియా అపార్ట్‌మెంట్‌లో నివాసం ఉంటున్నాడు. ఓ ఉదయం తన పెంపుడు కుక్కను తీసుకుని అపార్ట్‌మెంట్‌లోని వాకింగ్ ఏరియాలోకి వాకింగ్‌కు వెళ్లాడు.

ఆ వాకింగ్ ఏరియాలో వృద్ధులు వ్యాయామాలు చేస్తున్నారు. ఆ ప్రదేశంలోకి తరుణ్ కుక్కను తీసుకురావటంపై వృద్ధులు అభ్యంతరం వ్యక్తం చేశారు. ‘ఇది కేవలం ముసలివాళ్లు వాకింగ్ చేయటం కోసం కేటాయించిన ప్రదేశం. ఇక్కడికి కుక్కను తీసుకురాకూడదు. అది ఎక్కడపడితే అక్కడ మూత్రం పోసి ఈ ప్రదేశాన్ని పాడుచేస్తుంది. వెంటనే ఇక్కడి నుంచి దాన్ని తీసుకెళ్లు’ అని అన్నారు. ఇందుకు తరుణ్ ఒప్పుకోలేదు. దీంతో గొడవ మొదలైంది. ఆ గొడవ కొద్దిసేపటికే చిలికిచిలికి గాలివానలా తయారైంది. వృద్ధులు గుంపుగా చేరి తరణ్‌పై దాడి చేయటం మొదలెట్టారు.

మొదట్లో తరుణ్ వారిపై ప్రతి దాడికి దిగాడు. కానీ, ఐదు, ఆరు మంది ఒకేసారి దాడి చేయటంతో తట్టుకోలేకపోయాడు. నేలపై కుప్పకూలిపోయాడు. ఆ వృద్ధులు కిందపడ్డా తరుణ్‌ని వదల్లేదు. ఇష్టం వచ్చినట్లు కొట్టారు. తరుణ్ భార్య వృద్ధులను ఆపడానికి ఎంత ప్రయత్నించినా ఆమె వల్ల కాలేదు. ఈ దాడికి సంబంధించిన దృశ్యాలు అక్కడి సీసీటీవీ కెమెరాలో రికార్డు అయ్యాయి. ఇక, ఈ దాడిపై బాధితుడు పోలీసులను ఆశ్రయించాడు. కేసు నమోదు చేసుకున్న పోలీసులు దర్యాప్తు చేపట్టారు. ప్రస్తుతం ఈ సంఘటనకు సంబంధించిన వీడియో ఒకటి సోషల్ మీడియాలో వైరల్‌గా మారింది.

ఇవి కూడా చదవండి

ఉన్న బిడ్డలకే దిక్కులేదు.. ముగ్గుర్ని కనాలా?

స్థిరంగా వెండి, బంగారం ధరలు.. ఈ రోజు ఎలా ఉన్నాయంటే.