యూకేలో లండన్ తెలుగు అసోసియేషన్ క్రికెట్ సమరం.. 15 వారాల పాటు హోరాహోరీ!

లండన్ (మే 17): యునైటెడ్ కింగ్‌డమ్(UK)లోని తెలుగు సమాజానికి క్రీడా ఉత్సాహాన్ని అందిస్తూ.. తెలుగు అసోసియేషన్ ఆఫ్ లండన్(TAL) తన ప్రతిష్ఠాత్మక 'TAL ప్రీమియర్ లీగ్(TPL)' 2026 17వ ఎడిషన్‌ను ఘనంగా ప్రారంభించింది. లండన్‌లోని గ్రీన్‌ఫోర్డ్ పరిధిలో ఉన్న ఈలింగ్ హాన్‌వెలియన్స్ క్రికెట్ మైదానంలో మే 16న ఈ టోర్నమెంట్ ప్రారంభోత్సవ వేడుకలు కన్నులపండువగా జరిగాయి. 2026 వేసవి క్రీడా సీజన్‌ను అధికారికంగా ప్రారంభిస్తూ వందలాది మంది తెలుగు కుటుంబాలు ఈ వేడుకలో పాల్గొన్నాయి.

15 వారాల పాటు హోరాహోరీ పోరు..

2009లో సాధారణ 'TAL క్రికెట్ లీగ్'గా ప్రారంభమైన ఈ టోర్నమెంట్, నేడు యూకేలోని ప్రవాస తెలుగువారికి అతిపెద్ద క్రీడా పండుగగా ఎదిగింది. ఏటా వేసవి కాలంలో ఆటగాళ్లను, వారి కుటుంబాలను, క్రీడాభిమానులను ఒకే వేదికపైకి తెస్తూ కమ్యూనిటీ స్ఫూర్తిని పెంపొందిస్తోంది. ఈ 17వ ఎడిషన్ టోర్నమెంట్‌లో మొత్తం 10 జట్లు తలపడుతున్నాయి. రాబోయే 15 వారాల పాటు లీగ్ మ్యాచ్‌లు, నాకౌట్ రౌండ్లు, క్వార్టర్ ఫైనల్స్, సెమీఫైనల్స్ అత్యంత ఉత్కంఠభరితంగా సాగనున్నాయి. చివరగా 2026 ఆగస్టు 16న స్లౌ క్రికెట్ క్లబ్‌లో గ్రాండ్ ఫైనల్ పోరుతో ఈ టోర్నమెంట్ ముగియనుంది.

కుటుంబాలను ఏకం చేయడమే లక్ష్యం: టాప్ ఛైర్మన్ రవి సబ్బా

ప్రారంభోత్సవ కార్యక్రమంలో క్రీడాకారులను, అభిమానులను ఉద్దేశించి TAL ఛైర్మన్ రవి సబ్బా ప్రసంగించారు. టోర్నమెంట్‌లో పాల్గొంటున్న అన్ని జట్లకు, ఆటగాళ్లకు ఆయన శుభాకాంక్షలు తెలియజేశారు. తెలుగు ప్రజలను ఒకతాటిపైకి తెచ్చే సాంస్కృతిక, క్రీడా కార్యక్రమాలను నిర్వహించడంలో TAL ఎల్లప్పుడూ ముందుంటుందని, యూకేలోని తెలుగు కమ్యూనిటీకి ఇది ఒక అద్భుతమైన వేదిక అని కొనియాడారు. బిజీ లైఫ్‌లో కుటుంబాలు, స్నేహితులు ఒకచోట కలుసుకుని ఆనందంగా గడపడానికి ఇలాంటి క్రీడలు దోహదపడతాయని ఆయన ఆకాంక్షించారు.

ఈ భారీ టోర్నమెంట్‌ను విజయవంతంగా నిర్వహించడానికి అహర్నిశలు శ్రమించిన ట్రస్టీ సత్య పెద్ది రెడ్డి, స్పోర్ట్స్ ఇన్‌చార్జ్ సింధూర చెరుకులకు ఆయన ప్రత్యేక కృతజ్ఞతలు తెలిపారు. వారితో పాటు ట్రస్టీ బోర్డు సభ్యులు అశోక్ మధిశెట్టి, వెంకట్ నీలా, రవి మొచెర్ల, అనిల్ అనంతుల, కిరణ్ కప్పేటల సహకారాన్ని, వాలంటీర్ల సేవలను ఛైర్మన్ ప్రత్యేకంగా అభినందించారు.

ఆరోగ్యం కోసం.. సమాజ సేవ కోసం '1 మిలియన్ అడుగుల ఛాలెంజ్'

క్రికెట్ టోర్నమెంట్‌తో పాటు సమాజ శ్రేయస్సు కోసం TAL '100 రోజులలో వన్ మిలియన్ అడుగుల ఛాలెంజ్' అనే వినూత్న ఫండ్‌రైజింగ్(నిధుల సేకరణ) కార్యక్రమాన్ని కూడా అధికారికంగా ప్రారంభించింది. ప్రవాస తెలుగువారిలో శారీరక దృఢత్వం, ఆరోగ్యాన్ని పెంపొందిస్తూనే.. సేకరించిన నిధులను తెలుగు సేవా సంస్థలకు, కమ్యూనిటీ సేవా కార్యక్రమాలకు ఉపయోగించడం దీని ముఖ్య ఉద్దేశం. ఈ వినూత్న కార్యక్రమాన్ని వెంకట్ తోటకూర, శ్రీహరి అరిగే, సునీత అరిగే, సింధూర చెరుకులు సమన్వయం చేస్తూ, ప్రవాసీయులు పెద్ద సంఖ్యలో పాల్గొనేలా ప్రోత్సహిస్తున్నారు.

యూకే అంతటా ఉన్న తెలుగు కుటుంబాలను ఒకే తాటిపైకి తెస్తూ.. అటు క్రీడల ద్వారా శారీరక శ్రేయస్సును, ఇటు సాంస్కృతిక సేవా కార్యక్రమాల ద్వారా సమాజ స్ఫూర్తిని రగిలిస్తూ 'టాప్' (TAL) నిరంతరం ముందుకు సాగుతోంది.

ఈ వార్తలనూ చదవండి:

యూఏఈ అణువిద్యుత్ కేంద్రంపై డ్రోన్ దాడి.. ఖండించిన భారత్

త్వరపడండి.. లేకపోతే మీకేమీ మిగలదు.. ఇరాన్‌కు ట్రంప్ వార్నింగ్